Ndoe keikekalapo pano pa ntanda kupityila ku bukomo bwa muntu, ino i kupityila ku Bulopwe bwa Leza, umbikalo wa momwa mūlu uludikwa na Kidishitu Yesu. Tala byobya bitufundija Bible pa luno lukulupilo lwa kutendelwa.

1.   Leza ukafudija “mavita konsokonso pano pa ntanda,” ne kufikidija mulao wandi wa kuleta “pano panshi . . . ndoe mu bantu batōkēlwe.”—Ñimbo ya Mitōto 46:9; Luka 2:14.

2.   Bulopwe bwa Leza bukaludika ntanda yonso abo momwa mūlu. (Danyele 7:14) Byoudi umbikalo wa ntanda, ukatalula’ko mushipiditu wa kufwila ntanda, mwine uleta tuvutakanya tuvule.

3.   Yesu, Mulopwe wa Bulopwe bwa Leza, witwanga bu “Mfumu wa Ndoe,” kadi ukaleta ‘ndoe keikekalapo na mfulo.’—Isaya 9:6, 7.

4.   Bantu basumininwe kwikupila nyeke kebakatwelapo mu buno Bulopwe, mwanda “[Leza] ushikilwe yewa ense usenswe bya lūma.”—Ñimbo ya Mitōto 11:5; Nkindi 2:22.

5.   Leza ufundijanga babikalwa bandi mwa kwikadila mu ndoe. Bible ulombola bintu bilupukanga ku buno bufundiji amba: “Bakafula bipete byabo ke nkasu ne mikobe yabo ke bipete bya kukukula nabyo. Muzo keukatululapo kipete pa muzo mukwabo, kadi kebakefundepo monka divita.”—Isaya 2:3, 4.

 Batumoni ba Yehova midiyo ne midiyo kujokoloka ntanda yonso, bafundijibwanga kala na Leza mwa kwikadila mu ndoe. (Mateo 5:9) Nansha byotutambile mu tubila twishileshile kadi twikele mu matanda 230 ne kupita, tupelanga kusela mata kukalwa na bakwetu. Batumoni ba Yehova befundanga mwa kwikadila na ndoe dyalelo.