Ngano Timfumu tia Nzambi mu mutima’aku tiena?
Mvutu ya Bibila
Kâni. Timfumu tia Nzambi ka tiena mu mitima mia Bakristo ko. a Bibila mbuka ya Timfumu disongelaka bu dizonzelaka “Timfumu tia ku mazulu.” (Matie 4:17) Tala bwe Bibila disongelaka ti guvernema yena yita yâla ku zulu.
Timfumu tia Nzambi tie na ntwarisi, bantu, misiku, na tisalu tia lungisa luzolo lwa Nzambi ku zulu na ha mutoto.—Matie 6:10; Nzabukusu 5:10.
Guvernema ya Nzambi, peleko Timfumu, mbo yiyâla “bantu, makanda, na mazu” mamansoni ma ha mutoto. (Daniele 7:13, 14) Lutumu lwa luyâlu lo kwe Nzambi lutûkaka, ka kwe bantu’â ko.—Mikunga 2:4-6; Izaya 9:7.
Yezu watêla ntumwa zandi za kwikama ti mbo baketi bâ tintwari ku zulu mu “zakala ha zulu miyâlu.”—Like 22:28, 30.
Timfumu tie na mbeni, zi tifukisa.—Mikunga 2:1, 2, 8, 9; 110:1, 2; 1 Bisi-Korente 15:25, 26.
Bibila ka dilongesaka ko ti Timfumu tia mazulu ku mu mutima wa muntu tiena mpe ni mô tiyâlaka. Kâ, disongele ti “zu dia Timfumu” peleko “nsangu za mbote za Timfumu” zilendi mpe zifweti tu simba mitima.—Matie 13:19; 24:14.
Ngano bwe “Timfumu tia Nzambi tie ku kati dieno?
Bantu bakaka ka babakulaka ko mbuka ye Timfumu tia Nzambi mu bungu dia mpila mbangululu zakaka za Bibila yi zibangurilaka Like 17:21. Mu tifwani, Bîbila kia Kintuâri ditêle ti ’Timfumu tia Nzambi mu beno beni tie.’ Mu tomo bakula verse yo, tufweti taluzula misamu mizungiriri yo.
Timfumu tia Nzambi ka tieri’â mu mitima mia mbi mia batantu ba Yezu ko
Yezu kwe Bafarize keri zonzaka, tikunku tia mfumu za mabundu zeri mu telamanka mpe zeri dingaka mu mu honda. (Matie 12:14; Like 17:20) Ngano wadelakana wena mu banza ti Timfumu tia Nzambi mu mitima mio mia mbi tieri? Yezu wabatêla ti: “Ku kati ba fuluka lwena mu bungungu na mu titantu.”—Matie 23:27, 28.
Mbangululu zakaka nkatika nsasa zihanaka ya nzonzolo ya Yezu mu Like 17:21: “Timfumu tia Nzambi ni hô tie na beno.” (Beto tusingase wo; Contemporary English Version) “Timfumu tia Nzambi ha kati dieno tiena.” (La Bible. Traduction du monde nouveau, note) Timfumu tia mazulu tieri “na” peleko “ha kati dia” Bafarize, mu bungu ti Yezu, wu basola kwe Nzambi mu bâ Mutinu, ha matu mawu kweri.—Like 1:32, 33.
a Mabundu mamingi ma bukristo malongesaka ti Timfumu tia Nzambi ku kati dia muntu tiena, mu mutima. Mu tifwani, ku Etats-Unis dibundu dia Convention baptiste du Sud disingase ti Timfumu tia Nzambi ni “luyâlu lwa Nzambi mu mutima na luzingu lwa muntu.” Mpila mosi mpe, mu buku diandi dia Jésus de Nazareth, Pape Benoît XVI wavutu tâ ti “Luyâlu lwa Nzambi mu mutima wa lemvoka lutûkaka.”—rad. D. Hornig, M.-A. Roy et D. Tassel, Paris, Flammarion, 2007, p. 170
Dzukula mpe...
ESSENTIAL BIBLE TEACHINGS
Ngano Timfumu tia Nzambi ni nti?
Yezu bu kabâ ha mutoto, wavulu zonzela Timfumu tia Nzambi. Tuka ntama bilandi biandi bisambila ngatu Timfumu tio tiza.
BIYUVU BITARIRI BIBILA
Ngano Timfumu tia Nzambi ntia misamu tilungisa?
Longoka misamu mi lendi kekolo mu ntangu guvernema ya Nzambi yiyâla mutoto.
