Itwero Genno Dini i Kop Akwako Cente?
Estelle a onwoŋo maro wot i kanica kare i kare kede itino okene apol. En okobo ni: “Akobbi apwonynya me kanica ni mitina tye me pwonynyo kop i kom Baibul.” Ento en pe oye me pwonynye. I agikki mere, Estelle te gikko wot i kanica oko. En omedde ni: “Otela me kanica ocoya waraga eka ote kobba ni ka pe atwero bino i kanica, acwal doŋ ka cente keken. Atamo ni, ‘Gin pe daŋ oparo pi bedona atye, mitigi tye ka i centena.’”
Angelina, ame pol kare onwoŋo obedo adini, okobo ni: “I kanicawa, dita me miyo mot beo tyen adek i cawa me woro acel acel, dok omito ni obed rayo mot i cawa magi ducu. Gin onwoŋo obedo penynyo pi cente kare i kare. Atamo pira kena ni, ‘Ope gini kede cuny Obaŋa.’”
Ce nyo dini ame tye i kabedo ame ikwo iye tio kede yo me diro ya nyo opoŋo lyeto i kom omemmagi me rayo cente atir atir? Itamo ni mannono rwatte kede pwony me Baibul?
BAIBUL PWONYO GIN AŊO?
Yecu, ame ocako dini Okricitayo, okobo ni: “Omiowu nono, wun daŋ mi wunu nono.” (Matayo 10:8) Kwena me Baibul tye me nono dok myero tun baŋ jo luŋ ame mito.
Okricitayo me kare acon onwoŋo culo pi jammi ame mito cente i kacokere niŋo?
Ŋat acel acel omio mottere “acalo en mito i cunye, aboŋo waŋyiccoro onyo diccoro. Pien Obaŋa maro ŋat a mio kede yomcuny.” (2 Jo Korinti 9:7) Akwena Paulo okobo ni: “I kare ame orabbiwu amut aber ame oya i baŋ Obaŋa, otio dyeceŋ kede dyewor me kur oket peko i kom ŋattoro i akinawu.” (1 Jo Tecalonika 2:9) Paulo otio acalo akwo kema me konynye i ticcere me pwony.—Tic Okwena 18:2, 3.
OCADEN A JEOVA COBO TICGI NIŊO?
Ocaden a Jeova cokere karacel i wudi mogo ame olwoŋo ni Kacokere [Kingdom Halls]. Gin culo pi jammi ame mito cente niŋo? Gin pe bebea kede dita me rayo cente i caa me lego dok pe opoko baaca baŋ jo kede miti me renno cente i ca ajo. Akaka mannono, ŋattoro keken ame tye kede pwoc pi yik me cuny twero miyo mottere i canduk me ketto mot i Kacokere.
Dini myero cul pe jammi ame mito cente niŋo?
Magajin man gire mito cente me goyo kede pokko. Aco kun pe ibino winynyo otye arabbo kwena me cato wil nyo cwallo kwac pi cente. Gin a pire tek obedo pokko kop ateni me Baibul.
Yin itamo niŋo: Ce ni cuny ame tye i ŋe yik magi rwatte kede kop a Yecu kede apor Okricitayo me kare acon?
a Nyiŋŋogo ame otio kede i wi pwony magi oloko oko.
