Ket koŋ ni mitte ni oyaŋi pi two moro ame tye oketo kwoni kan adiŋ. Mitini nwoŋo tye me bedo kede gen i kom dakatal ame yaŋo jo, kit acalo kwoni nwoŋo bino jeŋere i ciŋe. Pe itamo ni bino bedo me ryeko ka koŋ ikeboro ŋec i kom ticcere acalo dakatal?

I kite acel-li, bedo me ryeko ka koŋ ikeboro dini idiro. Ka itye i eryoŋettoro me dini, bedo bala ijalo kwoni me cuny i ciŋe. Man kwako naka gen ame itye kede pi nwoŋŋo lare.

Yecu omiowa cik a yie lac ame twero konynyowa me mokko ka ce diniwa obedo me ateni. En okobo ni: “Yat acel acel ŋeye i kom nyige.” (Luka 6:44) Me apor, ka ineno dini moro, kit nyig aŋo ame en nyako? Otela dini mere maro kop tutwal i kom cente? Jo ame tye iye lubo cik a yigi lac me Baibul akwako kop i kom lweny kede kit me kwo opore? Me agikki mere, tye dini moro ame genne? Okwai me koŋ keboro pwony magi.