LEYO KOP KEDE JIRANI
Itamo ni Obaŋa Daŋ Paro pi Pekkiwa?
Apor man nyuto leyo kop ame twero bedo i kin Acaden a Jeova moro kede jirani mere. Wek koŋ oket ni Acadennoro a nyiŋe Michelle obino i paco a dako moro a nyiŋe Sophia.
EN TWERO WEKKO MAN TIMERE NIŊO?
Michelle: Tin atye a nywakko tam i trak man kede jo luŋ i kabedo man. Wi koppere tye ni Imito Ŋeyo Kop Ateni? Megi ene.
Sophia: Ce ni man kobo i kom dini?
Michelle: Ee. Nen koŋ apenye abicel ame oryeo i pok ŋe. Mene i kin apenye magi—
Sophia: Gik kakanno. Pe daŋ ibal cawani ni i kop keda.
Michelle: Piŋo ikobo kittono?
Sophia: Ateni a kop tye ni, An apira kom pe aye i kom Obaŋa.
Michelle: Ber, Apwoi me yabbo cunyi baŋa. Koŋ apenyi ba, Anaka onwoŋo iwinyo kittono con?
Sophia: Pe, Adoŋo ame onwoŋo amaro wot i kanica. Ento agiko wot con tutwal mwakki mogo aŋec.
Michelle: Eee, tye kitto bo? Ento, wek koŋ anyutte baŋi. Nyiŋa Michelle.
Sophia: Mega Sophia.
Michelle: Apwoyo rwatte kedi, Sophia.
Sophia: An daŋ apwoyo.
Michelle: Pe abino kan me diyi tetek i kom dinina, Sophia. Kadi bed amanno, amito koŋ niaŋ. Nyo tye ginnoro atir atir ame oweko itye kede akalakala i kom tye Obaŋa?
Sophia: Ee. Ayawa onwoŋo can me dye gudu kede motoka mwakki 17 okato aŋec.
Michelle: Rac tutwal me winynyo koppono. En onwoŋo awano?
Sophia: Ee, kome tye ame okwe oko cakere i kare-naca.
Michelle: Manno rac tutwal. Dok twero bedo ni oturo cunyi tutwal.
Sophia: Tye kitto. Pe tye ginnoro ame atwero timmo iye ento abedo paro, Ka Obaŋa tye, piŋo en twero ye ni gin acal man timere? Piŋo Obaŋa oye ni wan oden can kit-ti?
ITAMO NI RAC ME PENYNYO PIŊO?
Michelle: Apenyeni kede kit ame iwinyo kede niaŋere gire. Ka otye ocanne kede pekki, pe rac me penynyo piŋo. I ateni, kadi naka co kede monnogo ame ogen daŋ openyo gini apenynyono!
Sophia: Ateteni?
Michelle: Ee. Itamo ni rac ka anyutti aporroro acel i Baibul?
Sophia: Pe rac.
Michelle: Nen koŋ apeny ame adwarpiny ame agen Abakuk openyo kede Obaŋa, kit acalo ocoo i Abakuk, cura 1, tyeŋ 2 kede 3: “Abino kok baŋi pi tim me byemi naka awene, kun mom ilara? Piŋo kara imia aneno gin arac, kun daŋ aneno kit ame jo neno kede can? Tim me nek kede byemi en ame odurre i nyima, da kede lweny timere kare luŋ.” Itamo ni apenye magi rwatte kede en ame ibedo penyere kede?
Sophia: Ee, rwatte gire.
Michelle: Obaŋa pe ocoko Abakuk pi penynyo kodi apenye magi, dok pe okobbi Abakuk ni iyee mere goro.
Sophia: Pat dok ba! Amaro.
JEOVA PE MARO PEKO
Michelle: Baibul pwonyo ni Obaŋa neno dok paro pi pekkiwa.
Sophia: Manno te koppere ŋo?
Michelle: Wek koŋ anyutti aporroro kan i Yaa 3:7. Itwero kwanno tyeŋŋono?
Sophia: Pe balo. Kobo ni: Jeova dok te kobbo ni, “Atyeko doŋ nenno can a jona i Miciri, awinyo kokogi i kom odoŋe a loogi i tic; aŋeo cangi-nono, daŋ atye aparo pire.”
Michelle: Apwoyo. Kun jeŋere i ginacoa man, ce ni Obaŋa neno ka jo mere tye a denno can?
Sophia: Ee, twero bedo ni en neno.
Michelle: Dok nyuto ni en pe ŋeo ka gin ame timere keken. Nen koŋ dok agikki me tyeŋŋono. Obaŋa okobo ni: “Aŋeo cangi-nono.” Itamo ni koppono winyere bala kop Obaŋa moro ame pe kede miti dok tye kan abor tutwal?
Sophia: Pe, pe kitto.
Michelle: Doŋ, Obaŋa pe neno ka pekkiwa keken ento daŋ winyo arac ka otye kede pekki.
Sophia: Ateteni.
Michelle: Kede mannono i tamwa, wek dok okwan gin okene ame kobo i kom kare ame jo Obaŋa onwoŋo tye a denno can. Tye ocoo i Icaya 63:9. Bute me acel me tyeŋŋono kobo ni: “I cangi luŋ, en daŋ oneno iye can.” Itwero kobo ni Obaŋa owinyo arac i kom pekki a jo mere?
Sophia: Ee, winyere gire amanno.
Michelle: Sophia, ateni a kop tye ni, Obaŋa paro pirwa tutwal, dok en dag nennowa otye odenno can. Ka cunywa tye acwer, en daŋ cunye cwer.
PIŊO EN PWOD TYE A GAL?
Michelle: Ame pe ru awoto, tye tam acel okene ame amito nywakko kedi.
Sophia: Ayela pe.
Michelle: Nen koŋ gin ame Baibul pwonyo i kom teko Obaŋa. Tyeŋ ame tye i tamma obedo Jeremia 10:12. Itwero timmo ber kwanno?
Sophia: Aya do. Kobo ni: “En oketo lobo i teko mere, dok en oketo lobo omio ocuŋ atek pi ryeko mere, en omio polo opette kite ame tye kede-ni pi ŋeccere.”
Michelle: Apwoyo kwanno. Wek koŋ otam anok i kom tyeŋ man. Itamo ni teko adwoŋ tutwal onwoŋo mitte me Obaŋa iketto wi podo kede jammi luŋ iye?
Sophia: Ŋeye aŋea.
Michelle: Doŋ, ka Obaŋa tye kede teko me cweyo jammi luŋ ame orumowa, pe itamo ni en tye kede teko me tello cweccere?
Sophia: Ee.
Michelle: Tam koŋ dok i kom ayawu. Piŋo cwero cunyi tutwal me nenno ka en tye a denno can?
Sophia: Pien amare. En obedo ayawa.
Michelle: Dok ka onwoŋo itye kede teko me caŋŋe oko i kare-ni, kono onwoŋo itimo, pe amanno?
Sophia: Ŋeye gire kene.
Michelle: Tam i kom tyen koppere. Baibul pwonyo ni Obaŋa neno pekkiwa, paro pirwa, dok en tye kede teko adwoŋ tutwal. Tam koŋ iye, kede teko adwoŋ ame Obaŋa tye kede-ni, itamo ni en pe tye a jukere ajuka kene ame oweko en pe ru ogiko pekkiwa?
Sophia: Anaka onwoŋo pwod pe atamo iye atut kittono.
Michelle: Pe twero bedo ni en tye kede tyen kop aber pe me bunyere kede gikko pekkiwa oko? a
Sophia: Haa, Atamo ni twero bedo amanno.
Michelle: Awinyo cimmi tye a kok, doŋ wek adwog adwoga i nino okene, eka dok ote nyammo pwony man atutut.
Sophia: Apwoyo. Atye i miti tutwal iye. b▪
Ce nyo itye kede wi pwonynyoro me Baibul ame ibedo tam iye? Imito ŋeyo kop i kom iyee nyo tic me iyee Ocaden a Jeova? Ka tye amanno, pe igalle kede penynyo Acaden a Jeova moro acel. Cunye bino bedo ayom me nyammo koppono kedi.
