Obedo rabbo pi twero a leyi kede mitkom tutwal. Obedo pokko ŋec kede yikko dore kun onyuto cwer cuny i kom dukki me catto yer kom leyi kede ka pimmo leyi. Ocako daŋ eryoŋet anyen ame kwako kite me gwokko leyi. Pien okatto kede cik atek wek mitiwa cobere, pol kare onwoŋo omaro nwoŋŋo ayelayela i baŋ wegi twer. Omaka dok otera i nyim okiko tyen apol.

Meddo i kom parrana pi leyi, nenno pekki okene ame tye i twok lobo onwoŋo mia par daŋ. Momot, ate cakko kubere kede eryoŋete bala, Amnesty International kede Greenpeace. Aluŋu gupona luŋ i cwakko ticgi apapat. Abedo kop atek pi ocan, jo ame tye kede peko me ginacama, kede jo ame tye kede goro me kom apapat.

Cite, ate wotti niaŋ momot ni, pe a twere me an i lokko lobo. Akadi bed eryoŋete magi otemo yikko pekki mogo atitino, pekki adoŋo onwoŋo pwod nen bala tye adoko arac a medde ameda. Onwoŋo nen bala teko mogo areco onwoŋo omwonyo lobo oko luŋ dok pe tye ŋattoro keken ame onwoŋo tye aparo kadi acel. Awinyo ni teko otum i koma oko.

Akwanyo Baibulla ate cakko kwanno. Te bedo bala yat caŋo moro aber tutwal pi waŋ retta. Aneno waŋ Baibul apol ame pwonyowa kede kite me tero leyi i yore me kica. Me apor, Carokop12:10 kobo ni “ŋat a kite atira gwoko lee mere epito paco aber.” Ate dok niaŋ daŋ ni Obaŋa kara aye pe kelo pekki ame tye i lobo-ni. Akaka mannono, pekkiwa odoko arac akato pien pol a jo pe lubo tira mere. Ogudo cunya tutwal i kare ame apwonyo kop i kom mar a Jeova kede diyo cunye.—Jabuli 103:8-14.

I kare abedo bala man, abin anwoŋo kite me cwallo kwac pi buk me What Does the Bible Really Teach? eka daŋ ate cwallo kwacca oko. Ame pe orii, Ocaden a Jeova moro ame onyommere te bino i doggolena eka ote penynya me cakko kwanno Baibul, daŋ ate ye oko. Ate cakko daŋ doŋ wot oko i cokere Okricitayo i kacokere Ocaden a Jeova. Acalo adwoggi mere, ateni me Baibul te cakko guro lwite oko i cunya.

Atye kede pwoc pi Baibul, pien okonya me ketto alokaloka apol i kwona. Agiko matto taba kede mero. Ayiko cilo me koma kede koppa. Dok aketo alokaloka i kom cuny ame onwoŋo atye kede i kom wegi twer. (Jo Roma 13:1) Abin aweko daŋ kite kwo me caro caro kede tarwaŋ, tim ame nwoŋo doŋ oloo kwona galigali.

Alokaloka ame doŋ obedo atekka tutwal me timmo obedo lokko nenona i kom eryoŋet apapat ame tio pi lwak. Alokaloka man pe otimere i dye wor acel. I acakki, awinyo ni ka agiko tic kedgi, nwoŋo atimo rac tutwal i komgi. Cite, ate cakko bedo kede pwoc ni loc Obaŋa keken aye obedo gen me ateteni pi anyim aber pirwa. Ate mokko tamma me luŋŋu gupona luŋ i cwakko loccono kede konynyo jo okene me pwonynyo kop i kome.—Matayo 6:33.

Atye doŋ kede wic opye mot pien aweko jammi luŋ i ciŋ Jeova. Atye kede tekcuny ni en acalo Acwec, mom bino ye ni bed wunno leyi kede dano pi naka, nyo me ye ni bal lobowa amwonya wokki oko. Akaka mannono, en bino tic kede Loccere acocokki, me yikko jammi luŋ ame oballe. (Icaya 11:1-9) Kella yomcuny adwoŋ meicel pe ka me ŋeyo ateni magi ento daŋ me konynyo jo okene me ketto iyeegi iye. Pe doŋ awinyo ni myero atutte me lokko lobo. ▪