Kuna nza ankulu, Nzambi wasadilanga afundisi muna vuluza nkangu andi muna mpasi. (Afundisi 2:18) Nkand’a Nzambi usonganga vo e Lumbu kia Lufundisu lumbu kiakiese kikala, kadi Yave wa Mfundisi a nza yawonso ovuluza wantu muna mpasi.​—Tanga Nkunga 96:12, 13; Yesaya 26:9.

Nzambi wasola Yesu muna fundisa muna unsongi ana bena moyo ye ana bafwa. (Mavangu 10:42; 17:31) Wantu ayingi bafwa lembi zaya Nzambi. Muna Lumbu kia Lufundisu, Yesu ofutumuna wantu awaya kimana bazaya yo zola Nzambi aludi.​—Tanga Mavangu 24:15.

Amafwa befuluka muna kolo kia funda dia mvu. (Lusengomono 20:4, 12) Ntangwa divava kimana balongoka nzila za Nzambi yo kunlemvokela. Nswaswani ye ngindu za wantu ayingi, Nkand’a Nzambi usonganga vo wantu befundisilwa mun’owu wa mana bevanga vava befuluka.​—Tanga Roma 6:7.

Nkand’a Nzambi uvovelanga mpe lumbu kiankaka kia lufundisu kikwizila kuna kinsalukisa vitila lubantiku lwa funda dia mvu. E lumbu kiaki kiyikilwanga mpe vo lumbu kia lufwasu nze una tumwene kala muna malongi mavitidi. Muna lumbu kiaki, Nzambi ofwasa e mvimba yimpumbulu yawonso. (2 Petelo 3:7) Ozevo, tufwete sia ngolo za songanga o zola muna Nzambi.​—Tanga 2 Petelo 3:9, 13.