Wanzole wa Petelo 3:1-18
3 Azolwa, owau i nkanda wanzole inusonekene, omu nkanda wau ye una wantete, nsikamese nyindu mieno mia kiá muna kunususumuna,+
2 kimana nuasungamena mambu mateka vovua* kwa ngunza zavauka yo nkanikinu a Mfumu yo Mvuluzi una nuazayiswa muna ntumwa zeno.
3 Vana ntandu, nuzaya wo vo, muna lumbu yambaninu mukwiza akwa luvezo ye tuvezo twau, belanda e zolela yau+
4 yo vova vo: “Wau kasia nsilu vo vutuka kevutuka, akweyi kena?+ Kadi tuka muna lumbu kina mase meto baleka muna lufwa, mambu mawonso makinu wauna makala kuna lubantiku lwa nsema.”+
5 Kadi kuna lukanu, ke bazolele zaya e ziku kia diambu diadi ko vo: tuka kuna nkulu vakala e zulu ye ntoto wasikidiswa tuka muna maza, muna kati kwa maza muna mvovo a Nzambi;+
6 muna mambu mama, e nza ya tandu kiakina yafwasilwa vava yazala yo maza.+
7 Muna mvovo wau umosi e zulu ye nza ina owau yalundilwa muna tiya, yakinu lundwa yamuna lumbu kia lufundisu ye kia lufwasu lwa yimpumbulu.+
8 Dianu vo, azolwa, ke nuvilakani diambu diadi ko, e lumbu kimosi kuna kwa Yave* kina nze funda dia mvu, e funda dia mvu mpe nze lumbu kimosi.+
9 O Yave* ke nkwa fuki ko* muna lungisa o nsilu andi,+ nze una wantu ankaka beyindulanga vo nkwa fuki, kansi ozindalalanga kaka, kadi kazolele ko vo vafwa kana muntu mosi, kansi awonso balwaka muna luviluku lwa ntima.+
10 E lumbu kia Yave*+ nze mwivi kikwizila,+ muna lumbu kiakina e zulu divempoka+ muna mazu mayingi, e lekwa ya zulu ye ya nza izelokela muna mbangazi, e nza ye mavangu mandi mesenzekwa.+
11 Wau vo e lekwa yayi yawonso izeloka nzeloka yayi, nutoma yindula e mpila wantu nufwete kala muna kadilu kiavauka ye mavangu ma vumi wa Nzambi,
12 wau nuvingilanga yo sutila* e ngiz’a lumbu kia Yave,*+ kina kikala vo e zulu dibomonua+ muna tiya, e lekwa izeloka muna mbangazi!
13 Kansi mun’owu wa nsilu andi, tuvingilanga e zulu diampa ye nz’ampa,+ i mûna mukala unsongi.+
14 Dianu vo, azolwa, wau nuvingilanga mambu mama, nuvanga mawonso kimana kanuwana kuna luvuvamu, nuakondwa e tona ye twangu.*+
15 Vana ntandu, nubadikila luzindalalu lwa Mfumu eto se luvuluzu, wauna Paulu wa mpangi eto anzolwa kanusonekena mun’owu wa ngangu zina kavewa,+
16 vava kayika mambu mama nze una kavanga muna nkanda miandi miawonso. Kansi, o mambu mankaka mena mo mampasi kikilu muna bakula, mena vo ana bena ku bubu* yo lembi sikila bebendomonanga mo, nze una bevanganga mpe muna Sono yankaka, muna lufwasu lwa yau kibeni.
17 Vo i yeno azolwa, wau nutekele zaya mambu mama, nuyikenga kimana nualembi vukumunua entwadi kwa malongi maluvunu ma yimpumbulu yo lembi vengomoka muna nzil’a unsongi.+
18 Kansi, nukwamanana nungunuka muna ngemba yo zayi wa Mfumu eto ye Mvuluzi Yesu Kristu. Kuna kwa yandi nkembo, tuka owau yamu mvu ya mvu. Amen.
Mvovo vana yand'a lukaya
^ Yovo “mambu masakulwa.”
^ Yovo “ke nanganga ko.”
^ Yovo “lakukila o moyo.”
^ Yovo “mvindu.”
^ Yovo “balembele zaya.”
