NTU A DIAMBU WA FUKWA | OLENDA KALA YE NGWIZANI AMBOTE YO NZAMBI
O Kala Nkundi a Nzambi i Diambu Disundidi o Wete
Adieyi ofwete vanga muna kala nkundi a Nzambi? Mambu tatu tubadikidi malenda kusadisa mu kala ye ngwizani ambote yo Nzambi:
-
Zaya yo sadila e nkumbu a Nzambi, Yave.
-
Mokenanga yo Nzambi muna sambu yo longoka Diambu diandi.
-
Kwamanana vanga mana meyangidikanga Yave.
Nga olungisanga mawonso mama muna finama Nzambi? Nga vena ye diambu ofwete singika? Ngolo divavanga muna lungisa mambu mama, kansi badika e nluta dilenda kutwasila.
Jennifer kuna Estados Unidos wavova vo: “E ngolo zawonso ovanga muna kala ye ngwizani ambote yo Nzambi nluta ye nsambu zayingi zikutwasila. E ngwizani yayi, isadisanga mpe mu bunda Nzambi e vuvu, zaya kiwuntu kiandi una ufwene yo toma kunzola. O kala nkundi a Nzambi i diambu disundidi o wete!”
Avo zolele kala ye ngwizani ambote yo Nzambi, Mbangi za Yave bekala ye kiese kia kusadisa. Balenda vanga e nkubika yalongoka yaku e Bibila lembi futa nzimbu. Olenda kwenda mpe muna tukutakanu twau muna Seka dia Kintinu. Muna tukutakanu twatu, owanana yo wantu beyangalelanga e ngwizani au yo Nzambi. * Avo ovangidi wo, omona e ziku kia mvovo mia ntozi a nkunga ona wavova vo: “Vo i mono, o finama Nzambi i wete oku ngina.”—Nkunga 73:28.
^ tini. 9 Muna lomba longi dia Bibila yovo zaya Seka dia Kintinu dina lukufi ye nzo aku, mokena yo muntu uvene nkanda wau yovo kota muna nzil’eto muna internete muna www.jw.org/kwy. Yovo twika ndomb’aku muna nzila zina vana lukaya lwa 2.
Nanga Oyangalela Mpe Malongi Mama
YUVU ITOMA YUVULWANGA
Ameyi Mevangamanga Muna Longi dia Bibila ye Mbangi za Yave?
Muna programa yayi ya ngovo ya longokela isadilwanga kwa Mbangi za Yave, olenda sadila kwaku konso nsekola ya Bibila. Olenda kwaku bokelesa esi nzo aku yawonso yovo akundi aku ana ozolele.
