Mvutu za Yuvu ya Nkand’a Nzambi
Ekuma wantu ke belendelanga twasa luvuvamu ko ova nza?
Nkand’a Nzambi kuma yole uyikanga. Kiantete, kana una vo wantu bevanganga mambu mayingi mambote, ke bavangwa ye wisa kia singika ntambi zau ko. Kiazole, e nkubika zawonso za wantu zifunganga kadi ‘e nza yawonso mu wisa kia ndiona wambi ilele,’ i sia vo, Nkadi Ampemba wa Satana. Muna kuma kiaki, o wantu ke belendanga twasa luvuvamu ko ova nza.—Tanga Yeremiya 10:23; 1 Yoane 5:19.
Eketo y’eloko dia wantu i mambu makaka mpe mekakidilanga luvuvamu ova nza. Luyalu lumosi kaka lulenda twasa luvuvamu ova nza, i luna lulonganga o wantu mu vanga oma mansongi yo zola muntu yo nkw’andi.—Tanga Yesaya 32:17; 48:18, 22.
Nani otwasa luvuvamu ova nza?
Nzambi a Mpungu-ngolo wasia nsilu vo osikidisa luyalu lumosi kaka luyala wantu awonso. Luvinga vana fulu kia tuyalu twawonso twa nza. (Daniele 2:44) O Yesu wa Mwan’a Nzambi, oyala se Nkuluntu a Luvuvamu. Osukisa e mbi yawonso ova nza yo longa wantu una balenda zingila kuna luvuvamu.—Tanga Yesaya 9:6, 7; 11:4, 9.
Mu nza yawonso ana bena muna wisa kia Yesu belonganga wantu una balenda zingila kuna luvuvamu ye akaka. Ke kolo ko, o luvuvamu lukwiza mu nza yawonso.—Tanga Yesaya 2:3, 4; 54:13.