Ungunza 6. Salu kia Samun’e Nsangu Zambote mu nza Yawonso
Ungunza 6. Salu kia Samun’e Nsangu Zambote mu nza Yawonso
“E nsangu zazi zambote za kintinu zisamunwa muna nza yawonso.”—MATAI 24:14.
● Vaiatea, ku sanga kia Pacífico kezingilanga muna mbanz’a Arquipélago Tuamotu. Kana una vo e mbanza yayi yazungwa kwa 80 lwa sanga yakete, 16.000 ma wantu kaka bezingilanga mo. Kansi, Vaiatea ye mfinangani zandi bakingulwa kwa Mbangi za Yave. Ekuma? E kuma kadi, Mbangi za Yave bena ye luzolo lwa samuna e nsangu zambote za Kintinu kia Nzambi kwa wantu awonso, lembi sola e fulu kina bezingilanga.
MAMBU MEBWANGA NKIA ZIKU MESONGANGA? E nsangu za Kintinu zisamunwanga mu konko yawonso ya nza. Muna mvu wa 2010, Mbangi za Yave baviokesa tezo kia ola 1.000.000.000 muna salu kia samuna e nsangu zambote muna 236 za nsi. Ediadi disongele vo konso Mbangi a Yave miniti 30 kasala konso lumbu. Muna mvu miviokele Mbangi za Yave bakayanesa 20.000.000.000 ma nkanda misasilanga Nkand’a Nzambi.
WANTU ADIEYI BETOMA VOVANGA? E nsangu zina muna Nkand’a Nzambi, zisamunwanga vioka mazunda ma mvu.
NGA E MVOVO MIAU MIALUDI? Dialudi vo wantu ayingi besamunanga nsangu zina muna Nkand’a Nzambi. Kansi, mu kolo ye mu fulu yakete kaka bevanganga wo. Nswaswani ye wantu awaya, Mbangi za Yave besamunanga e nsangu zambote kwa nkama za mazunda ma wantu mu nza yawonso. Mbangi za Yave bezindalalanga mu salu kiau kia samuna nsangu zambote kana una vo besiwanga kitantu kwa ayadi ye kwa akaka. * (Maku 13:13) Vana ntandu, Mbangi za Yave kebefutwanga nzimbu ko mu salu besalanga kia samuna e nsangu zambote. Kansi, bekuyivananga kuna mvevo mu sadila e ntangwa au mu kaya e nkanda miau mu ngovo. E salu kiau mu tukau twamvevo kisadilwanga.
ADIEYI OBENZE? Nga e “nsangu zambote za kintinu” zisamunwanga o mu nza yawonso? Nga e ndungana ya ungunza wau yisonganga vo ke kolo ko mambu mambote mevangama ova nza?
[Mvovo Vana Yand’a lukaya]
^ tini. 6 Muna zaya diaka mambu makaka tala e vídeo “Fiéis sob Provas,” “Triângulos Roxos” ye “As Testemunhas de Jeová Resistem ao Ataque Nazista,” ikayaneswanga kwa Mbangi za Yave.
[Mvovo mia Sina mina muna lukaya lwa 9]
“Yavana o Yave kesoba mambu ova nza yayi, tukwamanana samuna e nsangu za Kintinu yo vema kwawonso yo sadila e ndekwa zawonso tulenda mu mokena yo wantu.”—ANUÁRIO DAS TESTEMUNHAS DE JEOVÁ 2010.
