Aweyi Olenda Kadila mu Luvuvamu Muna Kolo kia Vita?
Yakala dimosi una ye nkumbu Gary ona wakala soladi wavova vo: “Vitila yayantika longoka e Bibila, kiazaya ko e kuma e nza yazadila ye nsoki, kondwa kwa unsongi ye mambu mayingi mambi. Kansi owau, ngina ye luvuvamu lwa ntima. Kadi nzeye wo vo Yave wa Nzambi otomesa e nza yayi.”
Kansi ke Gary kaka ko una ye ngindu zazi. Tala una e Bibila kisadisilanga wantu ayingi.
BIBILA KIVOVANGA VO: “Ngeye, e Yave, wambote, wakubama muna loloka.”—Nkunga 86:5.
UNA E SONO KIAKI KISADISILANGA: “E sono kiaki kikunsadisanga mu kala ye ziku vo Yave nkwa nkenda. Nzeye wo vo wakubama kena muna kundoloka muna mawonso yavanga vava yakala mu kisoladi.”—Wilmar, Colômbia.
BIBILA KIVOVANGA VO: “Nsemene zulu diampa ye nz’ampa; mambu mantete ke mesungamenua diaka ko, ngatu kwiza diaka muna ntima.”—Yesaya 65:17.
UNA E SONO KIAKI KISADISILANGA: “Ikalanga ye lukendalalu lwasaka vava iyindulanga mana yavanga muna kisoladi. Kansi, e sono kiaki kikunsungamesanga vo ke kolo ko Yave ovanga diambu kimana yavilakana emvimba mawonso yavanga. Ke mekala diaka ko muna ngindu ngatu muna ntim’ame. Ediadi diambote kikilu dikala!”—Zafirah, Estados Unidos.
BIBILA KIVOVANGA VO: “Muna lumbu yandi, o nsongi osakumuka, luvuvamu luwokela yavana e ngonde ke ikala diaka ko.”—Nkunga 72:7.
UNA E SONO KIAKI KISADISILANGA: “Ntangwa zawonso iyindulanga e mvovo miami. Ke kolo ko e vita ye mpasi zawonso zitwasanga ke zikala diaka ko. Ke tutokana diaka ko mu kuma kia zingu kia awana tuzolanga.”—Oleksandra, Ucrânia.
BIBILA KIVOVANGA VO: “Mafwa maku mezinga. . . . Nusikama yo kaza ye kiese, oyeno nukalanga muna mbundukutu a ntoto.”—Yesaya 26:19.
UNA E SONO KIAKI KISADISILANGA: “Ndonga muna yitu yame bavondwa muna lubukumuku lwa kanda dia Tutsi. Kansi e sono kiaki kikunsadisanga mu kala ye ziku vo ikubamona diaka. Ngina ye tima dia wa e nding’au vava befuluka.”—Marie, Ruanda.
BIBILA KIVOVANGA VO: “Fioti kaka fisidi, yimpumbulu ke bekala diaka ko . . . Kansi alembami bevua nza, bezingila muna luvuvamu ye kiese kiayingi.”—Nkunga 37:10, 11.
UNA E SONO KIAKI KISADISILANGA: “Kanele vo e vita yafokoka, o umpumbulu ye wantu ambi bakinu. E sono kiaki kikunkumikanga kibeni. Yave omonanga mawonso ye obakulanga una imonanga. Osianga nsilu vo ke kolo ko mawonso mama mefokoka ye mevilakanua.”—Daler, Tajiquistão.
O wantu bavovelo mu Eyingidilu diadi bena muna buka kia ulolo wa Mbangi za Yave ana bavua lusadisu muna Bibila ye basolola luvuvamu. Balongoka una balenda sundila e fu kia menga akaka mu kuma kia nkand’a nitu, nsi, fulu kina o muntu kasansukila yovo diambu diankaka. (Efeso 4:31, 32) Mbangi za Yave ke bekuyisianga mu mambu ma tuyalu ko ngatu mu mambu mansoki.—Yoane 18:36.
Mbangi za Yave besadisanga mpe muntu yo nkwandi. (Yoane 13:35) Kasikil’owu, Oleksandra ona tuyikidi kala, watina yo mpangi andi mu nsi yankaka mu kuma kia vita. Wavova vo: “Vava twasauka kaka e mwingilu, vana vau twamona Mbangi za Yave za nsi yayina bayiza kututambula. E mpila yambote batutambulwila yatusadisa mu kulukilwa e zingu kiampa ku nsi yankaka kuna twatinina e vita.”
Yeto Mbangi za Yave tubokele wiza lungana yeto muna tukutakanu tweto kadi i muna tulongokelanga una tulenda sololwela o luvuvamu owau ye nsilu mia Bibila mia kusentu mia nza ya luvuvamu. Kota muna nzil’eto ya internete jw.org muna solola e fulu kia lukutakanu kina lukufi ye nzo aku yovo lomba e longi dia Bibila kwa mosi muna Mbangi za Yave lembi futa nzimbu, muna sadila o nkanda Zinga ye Kiese Yakwele Mvu!
