1. Aw Jizɔs bin sho se di prichin wok impɔtant to am? Ɛksplen.

JIZƆS bin lɛk fɔ tɔk bɔt Gɔd in Kiŋdɔm. Di Baybul sho se i bin tɔk mɔ bɔt Gɔd in Kiŋdɔm pas ɛni ɔda tin. I bin tɔk bɔt am pas 100 tɛm we i bin de prich. Jizɔs bin rili lɛk di Kiŋdɔm.—Rid Matyu 12:34.

2. Ɔmɔs pipul dɛn bin de di tɛm we Jizɔs tɔk wetin de na Matyu 28:19, 20? Wetin mek wi se so? (Luk di futnot.)

² Jɔs afta Jizɔs gɛt layf bak, i bin mit wit pipul dɛn we pas 500 we go ebul fɔ prich bɔt di Kiŋdɔm. (1 Kɔr. 15:6) Sɔntɛm na da tɛm de i bin tɛl dɛn fɔ prich di gud nyus bɔt di Kiŋdɔm ɔlsay “na di wɔl.” Dis wok nɔ bin izi da tɛm de! * Dis big wok we Jizɔs bin tɔk bɔt go kɔntinyu “sote di wɔl dɔn” ɛn na so i dɔn de bi. Sɔntɛm yusɛf de prich so dat wetin Jizɔs dɔn tɔk go bi.—Mat. 28:19, 20.

3. Us tri tin dɛn dɔn ɛp wi fɔ prich di gud nyus fayn fayn wan?

 ³ Afta Jizɔs bin tɛl in disaypul dɛn fɔ prich, i prɔmis dɛn se: “A de wit una.” (Mat. 28:20) So na Jizɔs go kɔntrol dis prichin wok we dɛn go du ɔlsay na di wɔl. Ɛn Gɔd dɔn gi dɛn “ɔl dɛn gud tin” dɛn we go ɛp dɛn fɔ kɛr di prichin wok go bifo. (Ibru 13:20, 21) Insay dis atikul, wi go tɔk bɔt tri pan dɛn tin ya: (1) di tin dɛn we dɛn dɔn gi wi, (2) di difrɛn difrɛn we dɛn we wi dɔn yuz fɔ prich, ɛn (3) di trenin we wi dɔn gɛt. Fɔs, lɛ wi tɔk bɔt di tin dɛn we wi dɔn yuz insay di 100 ia we dɔn pas.

4. Wetin mek wi dɔn yuz difrɛn difrɛn tin dɛn we wi de prich?

⁴ Jizɔs bin kɔmpia di tin dɛn we i de tɔk “bɔt Gɔd in rul” to sid we dɛn kin plant na difrɛn difrɛn grɔn dɛn. (Mat. 13:18, 19) Pɔsin we kin plant kin yuz difrɛn difrɛn tin dɛn fɔ rɛdi di grɔn bifo i plant in sid dɛn. Semweso, insay di ia dɛn we dɔn pas, wi Kiŋ dɔn gi wi difrɛn tin dɛn we go ɛp wi fɔ rɛdi bɔku bɔku pipul dɛn at fɔ yɛri di gud nyus bɔt di Kiŋdɔm. Wi bin yuz sɔm pan dɛn tin ya fɔ lɛk tɛn ia so, bɔt ɔda wan dɛn de we wi dɔn yuz fɔ lɔng tɛm ɛn wi stil de yuz dɛn. Ɔl dɛn tin ya dɔn ɛp wi fɔ sabi prich gud gud wan.

5. Wetin na bin tɛstimoni kad? Aw dɛn bin de yuz am?

⁵ Wan pan di tin dɛn we bin ɛp bɔku brɔda ɛn sista dɛn fɔ bigin prich na di tɛstimoni kad, we dɛn bin bigin fɔ yuz insay 1933. Dis kad bin smɔl ɛn i bin gɛt shɔt Baybul mɛsej. As tɛm bin de go, dɛn bin de mek nyu kad dɛn we bin gɛt ɔda mɛsej dɛn frɔm di Baybul. Dis kad bin simpul fɔ prich wit. Wan brɔda we nem C. W. Ɛlanmaya, bin ol tɛn ia we i bigin fɔ yuz dis kad fɔ prich. I tɔk se: “Dɛn bin tɛl wi se we wi go prich wit dis kad, wi fɔ aks di pɔsin se, ‘Duya yu go lɛk fɔ rid dis kad?’ Afta di pɔsin rid di kad, wi kin gi am buk ɔ magazin ɛn go.”

6. Wetin dɛn bin de yuz di tɛstimoni kad fɔ?

⁶ Di tɛstimoni kad bin de ɛp wi bɔku bɔku we dɛn. Pan ɔl we wi bin rili want fɔ du di prichin wok, sɔm pɔblisha dɛn bin de shem ɛn dɛn nɔ bin no wetin fɔ se. Bɔt sɔm bin gɛt bɔku tin fɔ se. Dɛn go tɛl di pipul dɛn we dɛn go prich to ɔl di tin dɛn we dɛn no insay di shɔt tɛm we dɛn gɛt fɔ prich, bɔt dɛn nɔ kin tek tɛm fɔ tɔk wetin dɛn want fɔ se. Bɔt di tɛstimoni kad nɔ bin gɛt bɔku bɔku wɔd dɛn, dɛn bin dɔn tek tɛm pik di wɔd dɛn we de insay de, ɛn na di kad “bin de tɔk” fɔ di pɔblisha dɛn.

7. Wetin bin mek i nɔ izi fɔ yuz di kad fɔ prich?

⁷ Bɔt nɔto ɔltɛm i bin izi. Wan sista we nem Gres A. Istɛp, we bin dɔn prich fɔ lɔng tɛm, bin tɔk se: “Sɔm tɛm de, dɛn kin aks wi se, ‘Wetin di kad se? Yu nɔ go jɔs tɛl mi wetin i se?’” Dɔn sɔm pipul dɛn we wi kin mit nɔ kin ebul rid wetin de na di kad. Stil, ɔda pipul dɛn kin tink se di kad na fɔ jɔs tek am ɛn kip am, so dɛn kin tek am na di pɔblisha in an ɛn lɔk dɛn domɔt. If di pipul dɛn we wi mit nɔ lɛk di prichin wok, sɔntɛnde dɛn kin chɛr chɛr di kad. Bɔt stil, wi brɔda ɛn sista dɛn bin de lan aw fɔ tɔk to ɔlkayn pipul dɛn ɛn dɛn bin de mek ɔlman no se dɛn de fɔ Gɔd in Kiŋdɔm.

8. Ɛksplen aw dɛn bin de yuz di smɔl mashin we dɛn bin de kɔl gramafon. (Luk di pikchɔ nia dis atikul in taytul.)

⁸ Wan ɔda tin we dɛn bin de yuz fɔ prich insay dɛn 1930 ɛn dɛn 1940 na bin wan smɔl mashin we dɛn kɔl gramafon. Sɔm brɔda ɛn sista dɛn bin de kɔl dis mashin  Erɔn bikɔs na in mɔ bin de tɔk fɔ dɛn. (Rid Ɛksodɔs 4:14-16.) Bifo dɛn ple am, dɛn kin aks di pɔsin if i want fɔ lisin to wan mɛsej we kɔmɔt na di Baybul, if di pɔsin gri, dɛn kin ple am fɔ 4 ɛn af minit. Afta dat, dɛn kin gi di pɔsin sɔm buk ɛn magazin dɛn. Sɔm tɛm de, di wan ol famili kin gɛda fɔ lisin to dis mɛsej we kɔmɔt na di Baybul! Insay 1934, di Wach Tawa Sosayti bigin fɔ mek smɔl gramafon dɛn we di brɔda dɛn go yuz we dɛn de prich. As tɛm de go, dɛn bin gɛt 92 Baybul mɛsej dɛn we de tɔk bɔt difrɛn tin dɛn na di Baybul.

9. Aw di gramafon bin de ɛp di brɔda dɛn fɔ prich mɔ?

⁹ We wan man we nem Ilari Gɔslan bin yɛri dis Baybul tɔk, i aks di pɔblisha fɔ lɛnt am in gramafon fɔ wan wik so dat i go ple am fɔ lɛ in neba dɛn yɛri di mɛsej bɔt di Kiŋdɔm. We di pɔblisha kam bak, i kam si se plɛnti pipul dɛn we lɛk di mɛsej bin de wet fɔ am. Afta sɔm tɛm, bɔku pan dɛn pipul ya bin gi dɛn layf to Jiova, ɛn leta Ilari in tu gyal pikin dɛn bin go Giliad Skul ɛn dɛn bin sɛn dɛn na ɔda kɔntri fɔ go du di prichin wok. Jɔs lɛk di tɛstimoni kad, di gramafon bin ɛp plɛnti pan wi brɔda dɛn fɔ bigin du di prichin wok. Leta, di Kiŋ bin yuz di Tiokratik Ministri Skul fɔ tich dɛn aw fɔ prich.

10, 11. Aw dɛn bin dɔn de yuz nyuspepa ɛn redio fɔ kɛr di gud nyus go bifo? Wetin mek wi go se dis na fayn we fɔ prich?

¹⁰ Di Kiŋ de ɛp Gɔd in pipul dɛn fɔ yuz difrɛn difrɛn we dɛn so dat dɛn go ebul fɔ prich di gud nyus bɔt di Kiŋdɔm to bɔku pipul dɛn. Dis bin rili impɔtant bikɔs ‘di wokman dɛn nɔ plɛnti.’ (Rid Matyu 9:37.) Fɔ ɛgzampul, dɛn bin de yuz nyuspepa fɔ prich di gud nyus to bɔku pipul dɛn. Ɛni wik, Chals Tez Rɔsɛl bin de gi wan shɔt tɔk ɛn yuz wan mashin we dɛn de kɔl tɛligraf fɔ sɛn am to wan ɔganayzeshɔn we de fɔ nyuspepa dɛn. Dɔn dis ɔganayzeshɔn kin tek am ɛn sɛn am to nyuspepa dɛn na Amɛrika, Kanada, ɛn Yurop. Bay di tɛm we i de rich dɛn 1913, Brɔda Rɔsɛl in tɔk dɛn bin dɔn rich 15,000,000 pipul dɛn ɛn na bin 2,000 nyuspepa dɛn bin de ɛp fɔ du dis!

¹¹ Afta we Brɔda Rɔsɛl day, dɛn bin stat wan ɔda fayn we fɔ kɛr di gud nyus go bifo. Epril 16, 1922, Brɔda Josɛf F. Rutafɔd bin gi wan pan in fɔs tɔk dɛn na redio. Na lɛk 50,000 pipul dɛn bin lisin to dis tɔk. Dɔn insay Fɛbwari 24, 1924, di ɔganayzeshɔn bin bigin in yon fɔs redio steshɔn we dɛn kɔl WBBR. Di Disɛmba 1, 1924, Wach Tawa bin tɔk bɔt dis tin we di ɔganayzeshɔn de yuz fɔ tich pipul dɛn. Di Wach Tawa bin se: “Wi biliv se we wi de yuz di redio fɔ prich, wi nɔ de spɛn bɔku ɛn na fayn we fɔ mek di gud nyus rich ɔlman. Dis redio we wi de yuz bɛtɛ pas ɔl di ɔda tin dɛn we wi bin dɔn de yuz.” Jɔs lɛk di nyuspepa, di redio insɛf bin fayn fɔ yuz fɔ prich to bɔku bɔku pipul dɛn we de na say dɛn we pɔblisha dɛn nɔ bɔku.

12. (a) Uskayn pɔblik prichin we yu lɛk fɔ du mɔ? (b) Wetin go ɛp wi fɔ lɛ wi nɔ de fred fɔ du pɔblik prichin?

¹² Naw di ɔganayzeshɔn de advays wi fɔ yuz mɔ tɛm fɔ du pɔblik prichin wit kat ɔ tebul we wi de prich usay gɔvmɛnt se motoka dɛn fɔ pak ɛn tek pasenja, bɔs steshɔn (tren steshɔn), dɛn motoka pak, opin say usay bɔku pipul dɛn kin gɛda, ɛn makit dɛn. If yu de fred fɔ prich dɛn we ya, duya pre to Jiova ɛn tink bɔt wetin wan travlin ovasia we nem Anjelo  Manira, Jinyɔ, we dɔn sav fɔ lɔng tɛm bin se. Anjelo Manira bin se: “Wi kin si ɛni nyu we fɔ prich as ɔda we fɔ sav Jiova, ɛn pruv se wi de obe am ɛn nɔ de kɔmɔt biɛn am. So wi kin gladi fɔ sho se wi rɛdi fɔ sav am ɛni we we i want.” We wi de yuz nyu we dɛn fɔ du di prichin wok, sɔntɛnde i nɔ kin izi fɔ yus to dɛn nyu we dɛn ya, bɔt i kin ɛp wi fɔ lɛ wi abop pan Jiova mɔ ɛn dis kin mek wi sabi fɔ prich mɔ.—Rid Sɛkɛn Lɛta Fɔ Kɔrint 12:9, 10.

13. Wetin wi Wɛbsayt dɔn de du? Aw yu dɔn de yuz am fɔ ɛp pipul dɛn?

¹³ Plɛnti pɔblisha dɛn dɔn de ɛnjɔy fɔ sho pipul dɛn wi Wɛbsayt, we na jw.org, so dat dɛnsɛf go ebul fɔ rid ɛn dawnlod wi buk ɛn magazin dɛn we de insay pas 700 langwej dɛn so. I dɔn pas 1,600,000 pipul dɛn we de go na wi Wɛbsayt ɛni de. Jɔs lɛk aw di redio bin de du trade, na so wi Wɛbsayt tide de mek bɔku pipul dɛn yɛri di gud nyus, ivin na dɛn fa fa say dɛn.

14. Uskayn trenin di pɔblisha dɛn bin nid? Us skul dɔn ɛp dɛn fɔ no aw fɔ prich fayn fayn wan?

¹⁴ Wi dɔn tɔk bɔt sɔm tin dɛn ɛn sɔm we dɛn we wi dɔn de yuz fɔ prich di gud nyus ɔlsay. Bɔt naw, uskayn trenin dɛn we wi dɔn gɛt? Lɛ wi se di pɔsin we yu go prich to nɔ gri wit wetin i yɛri frɔm di gramafon ɔ i want fɔ no mɔ bɔt wetin i rid na di tɛstimoni kad. So di pɔblisha dɛn bin nid fɔ no wetin fɔ se ɛn aw fɔ tɔk, mɔ we dɛn mit pɔsin we want fɔ yɛri di gud nyus. Di oli spirit bin ɛp Brɔda Netan H. Nɔ fɔ si di nid fɔ tren pɔblisha dɛn fɔ tɔk we dɛn de prich. Fɔ du dis, insay 1943, dɛn bin mek di Tiokratik Ministri Skul. Dis skul dɔn ɛp di brɔda ɛn sista dɛn na di difrɛn kɔngrigeshɔn dɛn fɔ no aw fɔ prich fayn fayn wan.

15. (a) Wetin dɔn apin to sɔm brɔda dɛn we dɛn de gi dɛn tɔk na di Tiokratik Ministri Skul? (b) Aw di prɔmis we Jiova tɔk na Sam 32:8 dɔn ɛp yu?

¹⁵ Fɔ bɔku pan wi brɔda ɛn sista dɛn, i bin tek tɛm fɔ lɛ dɛn yus fɔ tɔk bifo bɔku pipul dɛn. Wan Brɔda we nem Ulyo S. Ramu bin mɛmba in fɔs tɔk we i bin gɛt na di skul insay 1944. Wetin i bin gɛt fɔ tɔk bɔt? I bin gɛt fɔ tɔk bɔt wan man we nem Doɛg. Na jɔs 4 vas dɛn nɔmɔ na di Baybul dɛn tɔk bɔt dis man! I kam fɔ no se na dɛn 4 skripchɔ dɛn ya i fɔ yuz fɔ gi in tɔk. Ulyo bin ɛksplen wetin bin apin to am we i de gi di tɔk, i se: “Mi ni dɛn bin de nak nak dɛnsɛf, mi an dɛn bin de trimbul, ɛn mi tit dɛn bin de shek shek na mi mɔt.” I kɔntinyu fɔ tɔk se: “A gi mi tɔk insay tri minit. Dis na bin di fɔs tin we apin to mi na stej we a de gi mi tɔk, bɔt dis nɔ bin mek a lɛf fɔ gi tɔk.” Pikin dɛnsɛf bin de  jɔyn di skul, pan ɔl we i nɔ bin izi fɔ sɔm fɔ gi tɔk na di kɔngrigeshɔn. Anjelo Manira we wi bin dɔn tɔk bɔt, mɛmba di fɔs tɔk we wan smɔl bɔbɔ, we jɔs stat fɔ go praymari skul, bin gi. I se: “I bin so de fred dat we i bigin fɔ tɔk, i bin tan lɛk i de kray. Bɔt bikɔs i bin dɔn mekɔp in maynd fɔ gi di tɔk, i bin gi di tɔk pan ɔl we i bin de kray.” Yu nɔ kin kɔmɛnt na mitin bikɔs yu de shem ɔ bikɔs yu fil se yu nɔ ebul? Pre to Jiova fɔ mek i ɛp yu fɔ mek yu nɔ fred. Yu go notis se i go ɛp yu jɔs lɛk aw i bin ɛp wi brɔda dɛn we bin jɔyn di Tiokratik Ministri Skul trade.—Rid Sam 32:8.

16. (a) Udat dɛn Giliad Skul bin de tren trade? (b) Frɔm 2011, udat dɛn naw i de tren?

¹⁶ Nɔto jɔs di Tiokratik Ministri Skul Jiova de yuz fɔ tren in pipul dɛn. Mishɔnari ɛn ɔda brɔda ɛn sista dɛn dɔn bɛnifit we dɛn kin go Giliad Skul. Wan pan di ticha dɛn na di skul bin sho wetin dis skul de fɔ. I tɔk se dis skul “na fɔ ɛp di studɛnt dɛn fɔ rili lɛk di prichin wok.” Dɛn bin stat dis Giliad Skul insay 1943, ɛn frɔm da tɛm de i dɔn pas 8,500 brɔda ɛn sista dɛn we dɛn dɔn tren na dis skul. Di mishɔnari dɛn we dɛn dɔn tren na Giliad de prich di gud nyus naw na lɛk 170 kɔntri dɛn. Frɔm 2011, di ɔganayzeshɔn bin tɔk se na di wan dɛn we de yuz ɔl dɛn tɛm fɔ sav Jiova go atɛnd dis skul naw, lɛk spɛshal payɔnia dɛn, travlin ovasia dɛn, Bɛtɛlayt dɛn, ɔ mishɔnari dɛn we nɔ bin dɔn go dis skul yet.

17. Aw dis trenin frɔm Giliad dɔn ɛp fɔ kɛr di prichin wok go bifo?

¹⁷ Aw dis trenin dɔn de ɛp wi brɔda ɛn sista dɛn? Fɔ ɛgzampul, insay Ɔgɔst 1949, di pɔblisha dɛn we bin de na Jepan nɔ bin rich tɛn. Bɔt as di ia de dɔn, dɛn bin sɛn 13 mishɔnari dɛn de we bin dɔn tren na Giliad fɔ ɛp wit di prichin wok. Dat dɔn mek tide na lɛk 216,000 pɔblisha dɛn de na Jepan, ɛn we yu kɔnt 100 pɔblisha dɛn, na lɛk 42 pan dɛn na payɔnia!

18. Us ɔda skul dɛn dɔn ɛp wi brɔda ɛn sista dɛn fɔ gɛt strɔng fet?

¹⁸ Ɔda skul dɛn, lɛk di Kiŋdɔm Ministri Skul, di Payɔnia Savis Skul, di Skul fɔ Pipul dɛn We De Prich bɔt Gɔd in Kiŋdɔm, di Skul fɔ Sakit Ovasia dɛn ɛn Dɛn Wɛf dɛn, ɛn di Skul fɔ Branch Kɔmiti Mɛmba dɛn ɛn Dɛn Wɛf dɛn, dɔn ɛp di brɔda ɛn sista dɛn fɔ gɛt strɔng fet ɛn fɔ prich fayn fayn wan. Wi nɔ go dinay se di Kiŋ de kɔntinyu fɔ tren in pipul dɛn!

19. Wetin Brɔda Chals Tez Rɔsɛl bin tɔk bɔt di prichin wok? Aw dis dɔn kam fɔ bi tru?

¹⁹ I dɔn pas 100 ia we Gɔd in Kiŋdɔm bigin rul. Wi Kiŋ, Jizɔs Krays, de kɔntinyu fɔ tren wi. Bifo Brɔda Chals Tez Rɔsɛl day insay 1916, i bin se di prichin wok go go bifo ɔlsay na di wɔl. I bin tɛl wan brɔda we bin de nia am se: “Di wok de go bifo kwik kwik wan, ɛn i go kɔntinyu fɔ go bifo, bikɔs bɔku wok de fɔ du ɔlsay na di wɔl fɔ prich di ‘Gud Nyuz bɔt wɛn Gɔd go rul.’” (Faith on the March, we A. H. Makmilan bin rayt, pej 69) Wetin i bin tɔk na tru. Wi gladi we di Gɔd we de gi pis de kɔntinyu fɔ gi wi wetin wi nid so dat wi go ɛnjɔy fɔ du di prichin wok! Fɔ tru, i de gi wi “ɔl dɛn gud tin” dɛn we wi nid fɔ du in wok!