Go dayrɛkt to di men tin

Go dayrɛkt to di say we di difrɛn difrɛn atikul dɛn de

Jiova Na Gɔd We Lɛk Wi

Jiova Na Gɔd We Lɛk Wi

“Gɔd na di wan we nɔ de tap fɔ lɛk.”—1 JƆN 4:8, 16.

SIŊ DƐN: 18, 91

1. Wetin na di men kwaliti we Gɔd gɛt? We yu no dis, aw dat mek yu fil bɔt Gɔd?

JIOVA in Wɔd, di Baybul, tɛl wi se “Gɔd na di wan we nɔ de tap fɔ lɛk.” (1 Jɔn 4:8) Bɔt wetin dis rili min? Jiova gɛt bɔku fayn fayn kwaliti dɛn, bɔt di men wan na lɔv. I nɔ jɔs gɛt lɔv, bɔt in na lɔv. I rili wɔndaful fɔ no se di Wan we mek di wan ol wɔl ɛn ɔltin we gɛt layf na Gɔd we gɛt lɔv! Na lɔv de mek i du ɛnitin.

2. Di lɛk we Gɔd lɛk wi, wetin dis fɔ mek wi biliv? (Luk di pikchɔ nia dis atikul in taytul.)

2 Di lɛk we Gɔd lɛk mɔtalman mek wi biliv se ɔl wetin Gɔd want fɔ mɔtalman go apin di bɛst we, we go rili bɛnifit ɔl di wan dɛn we go gri fɔ lɛ i rul dɛn. Fɔ ɛgzampul, bikɔs Jiova lɛk wi, i “dɔn put tɛm we i go jɔj ɔlman ɛn nɔbɔdi nɔ go kɔmplen se Gɔd nɔ jɔj am tret. Gɔd dɔn pik di wan we go jɔj ɔlman,” dat na Jizɔs Krays. (Akt 17:31) Wi biliv se dis go apin. Di wan dɛn we de du wetin rayt ɛn we de obe Gɔd go ɛnjɔy blɛsin we go de sote go.

 WETIN ISTRI DƆN SHO?

3. Aw yu tink se layf bin fɔ dɔn tan lɛk if Gɔd nɔ bin lɛk mɔtalman?

3 Jɔs tink bɔt aw layf bin fɔ tan lɛk if Gɔd nɔ bin lɛk mɔtalman. Fɔ no aw i bin fɔ tan, wi jɔs nid fɔ tink bɔt di bad bad tin dɛn we dɔn de apin na di wɔl we mɔtalman de rul in kɔmpin ɔnda Setan we nɔ lɛk mɔtalman ɛn we vɛks ɔltɛm. (2 Kɔr. 4:4; 1 Jɔn 5:19; rid Rɛvɛleshɔn 12:9, 12.) Dis jɔs de sho se tumara bambay bin fɔ dɔn bad-ɔf if Gɔd nɔ bin lɛk wi.

4. Wetin mek Jiova alaw Setan fɔ chalenj di rayt we i gɛt fɔ rul?

4 We Setan tɔn in bak pan Jiova, i mek di fɔs man ɛn uman du di sem tin. I chalenj Gɔd se i nɔ gɛt rayt fɔ rul ɛn i nɔ de rul di rayt we. We Setan du dis, i bin de tray fɔ sho se di we aw i go rul go bɛtɛ pas aw Gɔd de rul. (Jɛn. 3:1-5) Pan ɔl we Jiova dɔn alaw Setan fɔ rul lɛ ɔlman si if na tru i de tɔk, i nɔ go alaw am fɔ rul te go. Bikɔs Jiova gɛt sɛns, i dɔn alaw sɔm tɛm fɔ pas fɔ lɛ ɔlman si se nɔbɔdi nɔ go ebul fɔ rul mɔtalman fayn fayn wan pas in we mek wi. Di bad bad tin dɛn we dɔn de apin na di wɔl dɔn sho se mɔtalman ɔ Setan nɔ ebul fɔ rul wi di rayt we.

5. Wetin mɔtalman in istri dɔn sho?

5 Insay di 100 ia we dɔn pas, i dɔn pas 100 milyɔn pipul dɛn we dɔn day pan wɔ. Tide, di tin dɛn we de apin na di wɔl jɔs de go frɔm bad to wɔs. Na dis Gɔd in Wɔd bin dɔn tɔk se go apin “jɛs bifo Jizɔs kam bak.” I bin se insay wi tɛm “wikɛd pipul ɛn dɛn wan we de mek pipul ful go de wɔs mɔ ɛn mɔ.” (2 Tim. 3:1, 13) Mɔtalman in istri dɔn sho se wetin di Baybul tɔk na tru, we i se: “PAPA GƆD, a no se wetin mɔtalman de du nɔ de nain yon an, ɛn mɔtalman nɔ ebul kɔntrol in yon layf ɔ dayrɛkt in stɛp dɛm.” (Jɛr. 10:23) Wi dɔn si klia wan se, Jiova nɔ mek mɔtalman fɔ lɛ dɛn ebul fɔ waka fɔ dɛnsɛf na layf ɛn dɛn nɔ gɛt di rayt fɔ rul dɛnsɛf if i nɔ sho dɛn aw fɔ du am.

6. Wetin mek Gɔd de alaw bad tin dɛn fɔ apin?

6 Apat frɔm we Gɔd dɔn sho se mɔtalman nɔ sabi rul, i gɛt ɔda rizin we mek i dɔn alaw bad bad tin dɛn fɔ apin fɔ sɔm tɛm naw. Dis dɔn sho klia wan se na Gɔd nɔmɔ go ebul fɔ rul mɔtalman di rayt we. Afta Jiova go dɔn dɔnawe wit ɔl di bad tin dɛn we de apin ɛn di wan dɛn we de du am, if ɛnibɔdi chalenj Jiova se i nɔ de rul fayn, Jiova nɔ go alaw da pɔsin de fɔ kɔntinyu fɔ liv. I go yuz mɔtalman istri as pruf fɔ sho se i gɛt rayt fɔ dɔnawe wit da pɔsin de kwik kwik wan so dat bad tin dɛn nɔ go bigin fɔ apin bak.

JIOVA DƆN ƆLRƐDI SHO SE I LƐK WI

7, 8. Jiova dɔn sho se i rili lɛk wi bɔku bɔku we dɛn, wetin na sɔm pan dɛn we ya?

7 Bɔku we dɛn de we Jiova dɔn sho se i rili lɛk wi. Fɔ ɛgzampul, tink bɔt di wɔndaful we aw Jiova mek di wan ol wɔl. Wi gɛt bɔku bɔku galaksi dɛn, ɛn ɛni wan pan dɛn galaksi ya gɛt bɔku sta ɛn planɛt dɛn we wi nɔ go ebul fɔ kɔnt. Wan pan di sta dɛn we de insay wi yon galaksi we dɛn kɔl di Milki We galaksi, na di san. If di san nɔ bin de, ɛnitin we gɛt layf nɔ bin fɔ ebul liv na di wɔl. Ɔl dɛn tin ya we Jiova mek sho se in na Gɔd ɛn i gɛt kwaliti dɛn lɛk pawa, sɛns, ɛn lɔv. Fɔ tru,  “ɔlman no gud gud se Gɔd gɛt pawa we nɔ de dɔn ɛn Gɔd na di tru Gɔd. Mɔtalman nɔ de si dɛn tu tin ya, bɔt dɛn go no dat bɔt Gɔd, bikɔs Gɔd dɔn mek dɛn tu tin ya plen to dɛn frɔm di tin dɛn we i mek.” —Rom 1:20.

8 Jiova mek ɔltin na dis wɔl fɔ bɛnifit mɔtalman ɛn di animal dɛn. Jiova mek wan fayn fayn gadin fɔ mɔtalman ɛn i gi dɛn pafɛkt maynd ɛn bɔdi we go mek dɛn ebul fɔ liv sote go. (Rid Rɛvɛleshɔn 4:11.) Apat frɔm dat, i “gi ɔltin we gɛt layf, tin fɔ it” ɛn “in lɔv [go] de sote go.”—Sam 136:25.

9. Pan ɔl we Jiova lɛk mɔtalman, wetin i et?

9 Pan ɔl we Jiova lɛk mɔtalman, i dɔn sho bak se i nɔ lɛk wetin bad. Fɔ ɛgzampul, Sam 5:4-6 tɔk bɔt Jiova se: “Yu na PAPA GƆD, we nɔ de tek rɔbish . . . Yu et ɔl udat bad.” Ɛn di Baybul kɔntinyu fɔ tɔk se: “PAPA GƆD, yu nɔ lɛk dɛn wan we gɛt bɛnbɛn ɔ we de lay ɔ we kin want fɔ kil pɔsin.”

I NƆ GO TE IGEN BAD TIN DƐN NƆ GO DE APIN IGEN

10, 11. (a) Wetin Jiova go du to di wikɛd wan dɛn? (b) Aw Jiova go blɛs di wan dɛn we de du wetin rayt?

10 We di rayt tɛm rich, Jiova go mek bad tin nɔ apin na di wɔl igen bikɔs in na Gɔd we gɛt lɔv ɛn i et wetin bad. Gɔd prɔmis se: “Di bad pɔsin go day insay in bad, bɔt udat put in op pan PAPA GƆD, go gɛt di land we i prɔmis. Smɔl bit mɔ, yu nɔ go si di bad man igen . . . Lɛk aw briz kin blo flawa na bush te natin nɔ lɛf, na so PAPA GƆD go skata in ɛnimi dɛn. I go skata dɛn lɛk smok.”—Sam 37:9, 10, 20.

11 Gɔd prɔmis bak se: “Udat dɛn de du wetin rayt go gɛt di land, ɛn dɛn go de de sote go.” (Sam 37:29) Dɛn pipul ya “go gɛt wetin PAPA GƆD prɔmis dɛn ɛn ɛnjɔy pis.” (Sam 37:11) Dis go apin bikɔs Gɔd we lɛk wi kin du wetin go bɛnifit in fetful savant dɛn ɔltɛm. Di Baybul tɛl wi se: “I go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen, bikɔs dɛn tin we bin de fɔs nɔ go de igen.” (Rɛv. 21:4) Fɔ tru, wɔndaful blɛsin de fɔ wi ɔl we rili gladi fɔ di lɛk we Jiova lɛk wi ɛn we de obe am as Rula!

12. Udat na di wan dɛn “we gud”?

12 Jiova in Wɔd tɛl wi se: “Wach di man we gud ɛn we de du wetin rayt; na pɔsin we gɛt kol at ɛn bɛtɛ go fala am ɔltɛm. Bɔt PAPA GƆD go dɔnawe wit di bad man; di bad man go gɛt in pe.” (Sam 37:37, 38) “Di man we gud” de kam fɔ no Jiova ɛn in Pikin ɛn du wetin Gɔd want. (Rid Jɔn 17:3.) Dis kayn pɔsin rili biliv se di wɔl ɛn ɔltin we de de “we pipul want bad bad go dɔn wande, bɔt di pɔsin we du wetin Gɔd want go de sote go.” (1 Jɔn 2:17) As di wɔl de nia fɔ dɔn, i rili mek sɛns fɔ lɛ wi “abop pan PAPA GƆD ɛn du wetin i se.”—Sam 37:33, 34.

DI TIN WE GƆD DƆN DU WE SHO SE I RILI LƐK WI

13. Aw Jiova dɔn sho se i rili lɛk di wan dɛn we dɔn sin?

13 Pan ɔl we wi nɔ pafɛkt, wi ebul fɔ ‘du wetin Jiova se.’ Wi kin gɛt tayt padi biznɛs bak wit Jiova bikɔs i dɔn sho se i rili lɛk wi. I mek Jizɔs Krays kam day fɔ wi, ɛn dis mek we fɔ lɛ mɔtalman dɛn we de obe am, kɔmɔt pan sin ɛn day we wi  gɛt frɔm Adam. (Rid Lɛta Fɔ Rom 5:12; 6:23.) Jiova bin rili biliv in wangren Pikin, we bin fetful to am fɔ lɔng lɔng tɛm we i bin de na ɛvin. As Papa we gɛt lɔv, Gɔd go mɔs dɔn fil am we dɛn bin de du Jizɔs bad tin dɛn we i bin de na di wɔl. Bɔt Jizɔs bin fetful to Gɔd, i sho se na Gɔd nɔmɔ gɛt di rayt fɔ rul, ɛn i sho bak se pafɛkt mɔtalman go ebul fɔ du wetin Jiova want ilɛk uskayn bad tin dɛn du am.

Bikɔs Gɔd lɛk wi, i sɛn in Pikin na di wɔl, ɛn in Pikin bin rɛdi fɔ kam (See paragraph 13)

14, 15. Wetin Jizɔs in day du fɔ wi?

14 Jizɔs bin kɔntinyu fɔ du wetin Jiova want ɛn i bin sho se na Jiova gɛt rayt fɔ rul pan ɔl we bad bad tin dɛn bin de mit am. I bin sho se i fetful to in Papa te i day. Wi fɔ rili tɛl Jiova tɛnki we i mek Jizɔs day fɔ wi sin ɛn mek we bak fɔ lɛ wi gɛt layf we go de sote go insay di nyu wɔl we I dɔn prɔmis! Di apɔsul Pɔl sho se Jiova ɛn Jizɔs rili lɛk wi we i tɔk se: “Di tɛm we sin bin plɛnti na wi layf, wi nɔ bin ebul ɛp wisɛf; Krays day fɔ wi we nɔ bin de du wetin Gɔd want, di rayt tɛm we Gɔd pik. I at fɔ mek ɛnibɔdi day fɔ pɔsin we de du ɔl wetin di Lɔ se nɔmɔ. I kin bi se pɔsin gri fɔ day fɔ sɔmbɔdi we gɛt sɔri at. Bɔt Gɔd dɔn sho wi aw i lɛk wi bikɔs pan ɔl we sin bin plɛnti na wi layf, Krays day fɔ wi.” (Rom 5:6-8) Apɔsul Jɔn bin rayt se: “Na di we dis we Gɔd sho wi se  in lɛk wi: I sɛn in wangren Pikin kam na [di] wɔl, so dat in Pikin kin mek wi gɛt layf. Wetin na lɛk? Nain dis: Nɔto fɔ se wi lɛk Gɔd, bɔt in lɛk wi ɛn i sɛn in Pikin kam na [di] wɔl fɔ sakrifays insɛf fɔ wi mek i go padin wi sin dɛn.”—1 Jɔn 4:9, 10.

15 Jizɔs bin sho wi aw Gɔd lɛk mɔtalman we i tɔk se: “Gɔd so lɛk mɔtalman dat i gi in wangren Pikin we i lɛk; so dat ɛnibɔdi we biliv pan am nɔ go day, bɔt i go gɛt layf we go de sote go.” (Jɔn 3:16) Gɔd so lɛk mɔtalman dat i gi in wangren Pikin fɔ day fɔ dɛn pan ɔl we i nɔ bin izi fɔ am. Gɔd go kɔntinyu fɔ lɛk mɔtalman sote go. Wi fɔ biliv dis ɔltɛm. Pɔl bin rayt se: “A shɔ se natin nɔ ebul tap wi fɔ fil di lɛk we i lɛk wi: day ɔ layf, enjɛl ɔ dɛn bad spirit we de rul ɔ dɛn pawa na di klawd, dis tɛm ya ɔ di tɛm we de kam; . . . natin nɔ de we Gɔd mek we go ebul mek di lɛk we Gɔd lɛk wi we Jizɔs Krays wi Masta dɔn sho wi, tap fɔ rich wi.”—Rom 8:38, 39.

GƆD IN KIŊDƆM DƆN BIGIN RUL

16. Wetin na di Kiŋdɔm? Udat Jiova dɔn pik fɔ rul in Kiŋdɔm?

16 Gɔd in gɔvmɛnt we na in Kiŋdɔm na wan ɔda tin we de sho se i lɛk mɔtalman. Jiova dɔn ɔlrɛdi pik in Pikin fɔ rul dis Kiŋdɔm. Ɛn in Pikin lɛk mɔtalman ɛn i rili fit fɔ rul dɛn. (Prɔv. 8:31) We di 144,000 pipul dɛn go gɛt layf bak fɔ go rul na ɛvin wit Jizɔs, dɛn go yuz di tin dɛn we dɛn bin dɔn lan di tɛm we dɛn na bin mɔtalman fɔ ɛp di pipul dɛn we dɛn go de rul. (Rɛv. 14:1) Di men tin we Jizɔs bin de tich pipul dɛn na bɔt Gɔd in Kiŋdɔm, ɛn i bin tich in disaypul dɛn fɔ pre se: “Papa Gɔd we de na ɛvin: Na yu wangren na Gɔd, mek ɔlman pre to yu ɛn ɔna yu; wi de pre mek yu rul wi; mek wetin yu want, bi na dis wɔl, lɛkɛ aw i de bi na ɛvin.” (Mat. 6:9, 10) Di wan dɛn we de obe Gɔd go ɛnjɔy bɔku blɛsin dɛn we Gɔd go ansa dɛn kayn prea ya!

17. Aw Jizɔs in rul difrɛn frɔm di we aw mɔtalman de rul?

17 Di we aw Jizɔs de rul bɛtɛ fa fawe pas di we aw mɔtalman de rul bikɔs mɔtalman dɔn mek bɔku bɔku pipul dɛn dɔn day pan wɔ. Jizɔs rili bisin bɔt di wan dɛn we i de rul ɛn i de falamakata Gɔd in fayn fayn kwaliti dɛn. Di kwaliti mɔ we i de falamakata na lɔv. (Rɛv. 7:10, 16, 17) Jizɔs bin tɔk se: “Una kam to mi, una ɔl we dɔn taya fɔ tot ebi lod, a go pul di lod kɔmɔt pan una ed, mek una go blo. Una opin una at fɔ di tru tin dɛn we a de lan una, ɛn una lan ɔl wetin a de tɛl una, bikɔs a de bia wit una ɛn a nɔ de tɔk pan una; if una du dat, una go blo. Dɛn tin we a de lan una nɔ at fɔ lan ɛn dɛn tin we a de gi una fɔ du nɔ at fɔ du.” (Mat. 11:28-30) Dis tin we Jizɔs tɔk sho se i rili lɛk mɔtalman!

18. (a) Wetin Gɔd in Kiŋdɔm dɔn de du frɔm we i bigin fɔ rul? (b) Wetin wi go tɔk bɔt insay di nɛks atikul?

18 Di tin dɛn we di Baybul bin dɔn tɔk sho se Gɔd in Kiŋdɔm bigin fɔ rul insay di ia 1914. Frɔm da tɛm de, dɛn dɔn de gɛda di balans anɔyntɛd Kristian dɛn we go rul wit Jizɔs na ɛvin ɛn di “bɔku bɔku pipul” dɛn we go sev we dis wɔl go dɔn ɛn we gɛt de na di nyu wɔl. (Rɛv. 7:9, 13, 14) Ɔmɔs dɛn bɔku bɔku pipul ya dɔn rich naw? Wetin Gɔd want lɛ dɛn du? Di nɛks atikul go ansa dɛn kwɛstyɔn ya.