Go dayrɛkt to di men tin

Go dayrɛkt to di say we di difrɛn difrɛn atikul dɛn de

Yu “Lɛk Yu Kɔmpin Mɔtalman Lɛkɛ Aw Yu Lɛk Yusɛf”?

Yu “Lɛk Yu Kɔmpin Mɔtalman Lɛkɛ Aw Yu Lɛk Yusɛf”?

“Yu fɔ lɛk yu kɔmpin mɔtalman lɛkɛ aw yu lɛk yusɛf.”—MAT. 22:39.

SIŊ DƐN: 73, 36

1, 2. Aw di Baybul sho se lɔv impɔtant?

PAN ƆL di fayn fayn kwaliti dɛn we Jiova Gɔd gɛt, di men wan na lɔv. (1 Jɔn 4:16) Di fɔs pɔsin we Jiova mek na Jizɔs. Jizɔs bin dɔn de na ɛvin wit Jiova fɔ lɔng lɔng tɛm ɛn i dɔn lan aw Jiova de du tin wit lɔv. (Kɔl. 1:15) We Jizɔs bin de na ɛvin ɛn na dis wɔl, i sho se i rili ɔndastand se Jiova na Gɔd we gɛt lɔv, ɛn i falamakata am fɔ sho lɔv. So wi fɔ biliv se Jiova ɛn Jizɔs go kɔntinyu fɔ rul wit lɔv sote go.

2 We dɛn aks Jizɔs us lɔ we pas ɔl di ɔda lɔ dɛn, i tɔk se: “‘Yu fɔ lɛk di Masta we na yu Gɔd wit ɔl yu at, wit ɔl yu layf ɛn wit ɔl yu maynd.’ Dis na di lɔ we pas ɔl di ɔda wan dɛn. Di ɔda lɔ we impɔtant nain dis: ‘Yu fɔ lɛk yu kɔmpin mɔtalman lɛkɛ aw yu lɛk yusɛf.’”—Mat. 22:37-39.

3. Udat-ɛn-udat wi fɔ lɛk?

3 Jizɔs tɔk se na Jiova fɔs wi fɔ lɛk ɛn afta dat wi fɔ lɛk wi kɔmpin mɔtalman. Dis sho se i rili impɔtant fɔ lɛk ɔlman. If yu mared, di pɔsin we yu fɔ lɛk mɔ na yu man ɔ wɛf. Dɔn wi fɔ lɛk wi brɔda ɛn sista dɛn bak na di kɔngrigeshɔn, we wi ɔl de wɔship di tru Gɔd. Di ɔda pipul dɛn bak we wi fɔ lɛk na  di wan dɛn we wi kin go prich to. Aw di wan dɛn we de wɔship Jiova ɛn we de du di tin dɛn we in Pikin bin dɔn tɔk go sho se dɛn lɛk dɛn kɔmpin mɔtalman?

SHO SE YU LƐK DI PƆSIN WE YU MARED

4. Pan ɔl we wi nɔ pafɛkt, wetin go ɛp wi fɔ lɛ wi mared go bifo?

4 Jiova bin mek di fɔs mared we i mek Adam ɛn Iv ɛn briŋ dɛn kam togɛda. I bin want lɛ dɛn gɛt gladi at, de togɛda sote go, ɛn ful-ɔp di wɔl wit dɛn pikin dɛn. (Jɛn. 1:27, 28) Bɔt we Adam ɛn Iv tɔn dɛn bak pan Gɔd, dɛn ambɔg di fɔs mared ɛn briŋ sin ɛn day to ɔlman. (Rom 5:12) Bɔt di Baybul sho wi wetin go ɛp wi fɔ lɛ wi mared go bifo. Di Baybul gɛt di bɛst advays fɔ mared pipul dɛn bikɔs dɛn advays dɛn de kɔmɔt frɔm Jiova, we mek mared.—Rid Sɛkɛn Lɛta To Timoti 3:16, 17.

5. Wetin mek i impɔtant fɔ lɛ mared pipul dɛn lɛk dɛnsɛf?

5 Gɔd in Wɔd sho se fɔ lɛ tu pipul dɛn ɛnjɔy dɛn padi biznɛs, i impɔtant fɔ lɛ dɛn sho se dɛn lɛk dɛnsɛf. Fɔ tru, na so i fɔ bi na mared. We apɔsul Pɔl bin de rayt to wan kɔngrigeshɔn, i tɔk se: “If una lɛk una kɔmpin mɔtalman una go de bia wit dɛn; una go gɛt gud at fɔ dɛn; una nɔ go de jɛlɔs dɛn; una nɔ go prawd; ɔ fil se una bɛtɛ pas dɛn. Una nɔ go de du tin we go mek pipul nɔ rɛspɛkt una; una nɔ go want mek una yon biznɛs nɔmɔ go bifo; una nɔ go de vɛks; una nɔ go kip tin na una at; una nɔ go gladi fɔ ɛnitin we nɔ rayt, bɔt una go gladi fɔ yɛri ɛnitin we na tru. Una go ebul bia ɔltin we pipul du una; una go biliv gud tin bɔt pipul ɔltɛm; una go de abop ɔltɛm se bɛtɛ go fala dɛn; ɛn una nɔ go tap fɔ lɛk una kɔmpin mɔtalman wɛn tin traŋa. . .  . Lɛk go de sote go.” (1 Kɔr. 13:4-8) We mared pipul dɛn tink gud wan bɔt dis advays ɛn fala am, i go mek dɛn rili gɛt gladi at na dɛn mared.

Gɔd in Wɔd sho wi wetin go mek wi mared go bifo (Luk na paregraf 6 ɛn 7)

6, 7. (a) Wetin di Baybul se bɔt sɔmbɔdi we de oba in kɔmpin? (b) Aw maredman we na Kristian fɔ trit in wɛf?

6 Jiova dɔn disayd udat fɔ de oba di famili. Pɔl bin ɛksplen se: “A want mek una ɔndastand sɔntin: Na Krays de oba ɔlman, na di man de oba in wɛf, ɛn na Gɔd in wangren de oba Krays.” (1 Kɔr.  11:3) Bɔt i nɔ min se bikɔs na man dɛn de oba dɛn wɛf so dɛn fɔ trit dɛn bad. Fɔ ɛgzampul, pan ɔl we na Jiova de oba Krays, i de trit am fayn ɛn Jizɔs insɛf de du wetin Jiova want. Jizɔs gladi fɔ de ɔnda Gɔd, na dat mek i tɔk se: “A lɛk mi Papa.” (Jɔn 14:31) Jizɔs nɔ bin fɔ dɔn tɔk dis if Jiova bin de trit am bad ɔ tɛl am fɔ du sɔntin bay fos.

7 Pan ɔl we na di man dɛn de oba dɛn wɛf, di Baybul tɛl dɛn se dɛn fɔ “rɛspɛkt dɛn” wɛf. (1 Pit. 3:7) Wan we we maredman dɛn go sho se dɛn rɛspɛkt dɛn wɛf na we dɛn tink bɔt di tin dɛn we dɛn nid ɛn gri fɔ du wetin dɛn wɛf want pan sɔm tin dɛn. Na dat mek Gɔd in Wɔd tɔk se: “Maredman dɛn, una kɔntinyu fɔ lɛk una wɛf dɛn jɔs lɛk aw Krays lɛk di kɔngrigeshɔn ɛn gi in layf fɔ am.” (Ɛfi. 5:25, NW) Jizɔs bin ivin gi in layf fɔ di wan dɛn we bin de fala am. We di man falamakata di we aw Jizɔs bin de oba di wan dɛn we de fala am, dat go mek am izi fɔ lɛ in wɛf sɛf sho se i lɛk am, rɛspɛkt am, ɛn rɛdi fɔ de ɔnda am.—Rid Taytɔs 2:3-5.

LƐK DI WAN DƐN WE UNA ƆL DE SAV JIOVA

8. Aw wi fɔ si wi brɔda ɛn sista dɛn we de sav Jiova?

8 Bɔku bɔku pipul dɛn ɔlsay na di wɔl de wɔship Jiova, de tɔk bɔt in nem, ɛn di tin dɛn we i want fɔ du. Aw wi fɔ si wi brɔda ɛn sista dɛn we de sav Jiova? Gɔd in Wɔd se: “Una fɔ du gud to ɔlman, patikla wi kɔmpin Kristiɛn dɛn, bikɔs dɛn tan lɛkɛ wan fambul wit wi.” (Gal. 6:10; rid Lɛta Fɔ Rom 12:10.) Di apɔsul Pita bin rayt se: “Naw we una de fala dɛn tru tin we dɛn lan una bɔt Jizɔs Krays, we mek una dɔn lɛf fɔ du bad, ɛn mek una layf dɔn klin, ɛn mek una lɛk una kɔmpin Kristiɛn dɛn fɔ tru, una fɔ lɛk dɛn naw wit ɔl una at.” Pita bin tɛl in kɔmpin Kristian dɛn bak se: “Bɔt di tin we pas ɔl, na fɔ mek una lɛk una kɔmpin wit ɔl una at.”—1 Pit. 1:22; 4:8.

9, 10. Wetin mek Gɔd in pipul dɛn gɛt wanwɔd?

9 Wi ɔganayzeshɔn rili spɛshal. Wetin mek wi se so? Na bikɔs wi lɛk wi brɔda ɛn sista dɛn we de ɔlsay na di wɔl wit ɔl wi at. Apat frɔm dat, bikɔs wi lɛk Jiova ɛn wi de obe in lɔ dɛn, i de sɔpɔt wi wit di tin we pawaful pas ɔl na di wɔl, dat na in oli spirit. Dis dɔn rili mek wi gɛt wanwɔd ɔlsay na di wɔl.—Rid Jɔn In Fɔs Lɛta 4:20, 21.

10 We Pɔl bin de tɛl in kɔmpin Kristian dɛn se dɛn fɔ lɛk dɛnsɛf, i rayt se: “Dat fɔ mek una gɛt sɔri at fɔ una kɔmpin, una fɔ de du gud to una kɔmpin, una nɔ fɔ tink se una bɛtɛ pas ɔda pipul, una nɔ fɔ dil wit ɔda pipul traŋa wan, ɛn una fɔ de bia wit pipul. Una nɔ fɔ vɛks if ɔda pɔsin du una bad, ɛn una fɔ padin dɛn if dɛn du una ɛnitin. Una fɔ padin una kɔmpin lɛkɛ aw di Masta dɔn padin una. Pantap ɔl dat, una fɔ lɛk una kɔmpin, dat go mek una gɛt wan at ɛn una go bi wan, ɛn nɔ ambɔg nɔ go de.” (Kɔl. 3:12-14) Wi rili gladi we wi lɛk wisɛf pan ɔl we wi mɛn difrɛn say dɛn ɛn wi kɔmɔt na difrɛn kɔntri dɛn. Dis dɔn mek wi gɛt wanwɔd.

11. Wetin de sho se dis na Jiova in ɔganayzeshɔn?

11 Jiova in savant dɛn rili lɛk dɛnsɛf ɛn dɛn gɛt wanwɔd. Dis dɔn sho se dɛn de na di tru rilijɔn. Wetin mek wi se so? Na bikɔs Jizɔs bin se: “If una lɛk una kɔmpin, ɔlman go no se una na mi lanin bɔy dɛn.” (Jɔn 13:34, 35) Ɛn di apɔsul Jɔn bin rayt se: “Gɔd in pikin dɛn ɛn  Setan in pikin dɛn difrɛn: ɛni bɔdi we nɔ de du wetin rayt ɛn we nɔ lɛk in kɔmpin, nɔto Gɔd in yon pikin. Na dat wi go tek no udat na Gɔd yon pikin dɛn ɛn udat na Setan yon. Di mɛsej we una bin dɔn yɛri di tɛm we una fɔs bi Kristiɛn nain dis: wi fɔ lɛk wi kɔmpin mɔtalman.” (1 Jɔn 3:10, 11) Bikɔs Jiova Witnɛs dɛn lɛk dɛnsɛf, dat dɔn mek dɛn rili gɛt wanwɔd. Dis dɔn sho se dɛn de fala Krays fɔ tru ɛn na dɛn Gɔd de yuz fɔ prich di gud nyus bɔt di Kiŋdɔm ɔlsay na di wɔl.—Mat. 24:14.

JIOVA DE GƐDA “BƆKU BƆKU PIPUL” DƐN

12, 13. Wetin di “bɔku bɔku pipul” dɛn de du naw? Wetin go apin jisnɔ we dɛn go si?

12 Plɛnti pan Jiova in savant dɛn de pan di “bɔku bɔku pipul we . . . bin kɔmɔt na ɔl dɛn trayb ɛn ɔl dɛn neshɔn na [di] wɔl, dɛn bin de tɔk ɔl dɛn difrɛn difrɛn laŋwej na [di] wɔl, sɔm bin wayt, sɔm bin blak.” Dɛn “tinap bifo di ay chia we kiŋ kin sidɔm, na di say we di Ship [Jizɔs Krays] insɛf bin de.” Udat na dɛn pipul ya? “Dɛn pipul ya na dɛn wan we bin tinap traŋa wɛn da big trɔbul bin fɔdɔm. Dɛn dɔn tek di Ship in blɔd was dɛn klos, mek dɛn wayt,” bikɔs dɛn dɔn sho se dɛn biliv se Jizɔs bin day fɔ dɛn. Dɛn “bɔku bɔku pipul” ya lɛk Jiova ɛn in Pikin ɛn ‘dɛn de na Gɔd in os de sav am’ “de ɛn nɛt.”—Rɛv. 7:9, 14, 15.

13 I nɔ go te igen, Gɔd go dɔnawe wit dis wikɛd wɔl insay da big “trɔbul” we gɛt fɔ kam. (Mat. 24:21; rid Jɛrimaya 25:32, 33.) Bɔt bikɔs Jiova lɛk in savant dɛn, i go sev dɛn as wan grup ɛn i go kɛr dɛn go insay di nyu wɔl. Na lɛk 2,000 ia dɔn pas so frɔm we Gɔd bin se, “I go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen.” Yu go rili lɛk fɔ de na Paradays afta we “dɛn tin we bin de fɔs nɔ go de igen”?—Rɛv. 21:4.

14. Ɔmɔs na dɛn bɔku bɔku pipul dɛn ya?

14 We di las dez bigin insay 1914, na bin lɛk 5,000 pipul dɛn bin de wɔship Jiova na di wɔl. Bikɔs di anɔyntɛd Kristian dɛn we bin de da tɛm de bin lɛk dɛn kɔmpin mɔtalman ɛn Jiova in oli spirit bin de ɛp dɛn, dɛn bin kɔntinyu fɔ du di prichin wok. Dat dɔn mek, tide bɔku bɔku pipul dɛn gɛt di op fɔ liv na dis wɔl. Na lɛk 8,000,000 Jiova Witnɛs dɛn de na di wɔl ɛn i dɔn pas 115,400 kɔngrigeshɔn dɛn ɔlsay na di wɔl we dɛn de ol dɛn mitin dɛn, ɛn wi de kɔntinyu fɔ bɔku. Fɔ ɛgzampul, insay di 2014 savis ia, i pas 275,500 nyu wan dɛn we baptayz, we min se insay ɛni wik, na lɛk 5,300 pipul dɛn de baptayz.

15. Ɛksplen aw di prichin wok de go bifo tide.

15 Di we aw di prichin wok de go bifo, i rili wɔndaful. Naw, wi buk ɛn magazin dɛn we wi de yuz de insay pas 700 langwej dɛn so. Di Wachtawa na di buk we dɛn de sheb pas ɛni ɔda buk na di wɔl. Ɛvri mɔnt, dɛn kin print pas 52,000,000 kɔpi dɛn insay 247 langwej dɛn. Di buk we wi kin stɔdi pipul dɛn, we nem Wetin Rili di Baybul De Tich? de insay pas 250 langwej dɛn so ɛn dɛn dɔn print lɛk 200,000,000 kɔpi dɛn.

16. Wetin mek di pat pan Jiova in ɔganayzeshɔn we de na dis wɔl de go bifo?

16 Di rizin we mek di ɔganayzeshɔn de go bifo kwik kwik wan na bikɔs wi gɛt fet pan Gɔd ɛn wi gri se di Baybul na Gɔd in Wɔd. (1 Tɛs. 2:13) Ɛn wi si se Jiova de blɛs in pipul dɛn pan ɔl we Setan et dɛn ɛn i de mek dɛn sɔfa.—2 Kɔr. 4:4.

 SHO SE YU LƐK ƆDA PIPUL DƐN ƆLTƐM

17, 18. Aw Jiova in savant dɛn fɔ trit di wan dɛn we nɔ de wɔship Jiova?

17 Aw Jiova in savant dɛn fɔ trit di wan dɛn we nɔ de wɔship Jiova? We wi kin du di prichin wok, wi kin mit pipul dɛn we kin lisin to wi, bɔt sɔm nɔ kin lisin ɛn dɛn kin ivin vɛks pan wi. Bɔt ilɛk aw pipul dɛn biev, Gɔd in Wɔd sho wi wetin wi fɔ du. I se: “Wɛn una de tɔk wit pipul, una fɔ tɛl dɛn tin we go mek dɛn gladi fɔ yɛri wetin una de tɔk ɛn we go mek dɛn want fɔ yɛri mɔ, ɛn una fɔ no aw fɔ ansa ɔlman.” (Kɔl. 4:6) We wi de gi pipul dɛn rizin fɔ wetin wi biliv, wi “nɔ fɔ fos pipul fɔ biliv pan Krays” ɛn wi “fɔ de lisin to wetin dɛn de tɔk” bikɔs wi lɛk wi kɔmpin mɔtalman.—1 Pit. 3:15, 16.

18 Wi kin sho se wi lɛk wi kɔmpin mɔtalman ilɛksɛf dɛn vɛks pan wi we wi go prich to dɛn. Wi de falamakata Jizɔs: “Wɛn pɔsin tɛl am wɔd we go at am, i nɔba tɛl dɛn wɔd we go at dɛn bak; wɛn pipul mek i sɔfa, i nɔba se in go mek dɛnsɛf sɔfa, bɔt i kin lɛf in kes na [Jiova in] an, bikɔs Gɔd de jɔj tret wan.” (1 Pit. 2:23) Ilɛksɛf wi de wit wi brɔda ɛn sista dɛn ɔ wit ɔda pipul dɛn, wi fɔ put wisɛf dɔŋ ɛn fala di advays we se: “If pɔsin du una bad, una nɔ fɔ tɔn am gi am bak; if pɔsin kɔs una, una nɔ fɔ kɔs am bak, una fɔ aks Gɔd fɔ blɛs am.”—1 Pit. 3:8, 9.

19. Us advays Jizɔs bin gi fɔ di wan dɛn we nɔ lɛk wi?

19 We wi put wisɛf dɔŋ, wi de obe wan impɔtant advays we Jizɔs bin gi. We Jizɔs bin de prich ɔp wan mawnten, i tɔk se: “Una yɛri we dɛn bin se, ‘Una fɔ lɛk una padi dɛn, ɛn et dɛn wan we nɔ lɛk una.’ Bɔt mi de tɛl una se: una fɔ lɛk dɛn pipul we nɔ lɛk una, ɛn una fɔ pre fɔ dɛn pipul we de mek una sɔfa, so dat una go bi una Papa, we de na ɛvin, in pikin dɛn. Una Papa de mek di san shayn pan dɛn bad pipul ɛn pan dɛn gud wan. I de mek ren kam pan dɛn pipul we gud ɛn dɛn wan we bad.” (Mat. 5:43-45) As Gɔd in pipul dɛn, wi fɔ lan fɔ lɛk di wan dɛn ‘we nɔ lɛk wi’ ilɛksɛf dɛn trit wi bad.

20. Wetin mek wi go lɛk Gɔd ɛn wi kɔmpin mɔtalman insay di nyu wɔl? (Luk di pikchɔ nia dis atikul in taytul.)

20 Jiova in pipul dɛn fɔ sho se dɛn lɛk Jiova ɛn dɛn kɔmpin mɔtalman bay di we aw dɛn de biev ɛn bay di tin dɛn we dɛn de du. Fɔ ɛgzampul, ilɛksɛf sɔm pipul dɛn vɛks ɛn nɔ want fɔ lisin we wi de prich to dɛn bɔt Gɔd in Kiŋdɔm, wi fɔ stil sho se wi lɛk dɛn we dɛn nid sɔntin. Di apɔsul Pɔl bin rayt se: “Una nɔ fɔ o ɛnibɔdi dɛt, pas di dɛt we na fɔ lɛk una kɔmpin mɔtalman. Ɛnibɔdi we lɛk in kɔmpin mɔtalman de du wetin di Lɔ se. Di lɔ dɛn we Gɔd gi Mozis se, ‘Man nɔ fɔ lɛf in wɛf go kip ɔda uman ɛn uman nɔ fɔ lɛf in man go kip ɔda man; nɔ fɔ kil; nɔ fɔ tif; ɛn nɔ fɔ gɛt tifyay’ ɔl dɛn lɔ ya ɛn ɛni ɔda wan dɛn de insay wan lɔ we se, ‘Una fɔ lɛk una kɔmpin mɔtalman lɛkɛ aw una lɛk unasɛf.’ Ɛnibɔdi we lɛk in kɔmpin mɔtalman, nɔ go du am bad. If ɛnibɔdi lɛk in kɔmpin mɔtalman, da pɔsin de dɔn du ɔl wetin ɔl di ɔda lɔ dɛn se.” (Rom 13:8-10) As Jiova in pipul dɛn, wi fɔ sho se wi rili lɛk pipul dɛn na dis wɔl we Setan de kɔntrol, usay wanwɔd nɔ de ɛn usay pipul dɛn de fɛt-fɛt dɛnsɛf. (1 Jɔn 5:19) Fɔ tru, insay di nyu wɔl, ɔlman go de du tin wit lɔv we Setan ɛn in dɛbul dɛn nɔ go de igen. I go rili fayn fɔ si we ɔlman na di wɔl lɛk Gɔd ɛn dɛn kɔmpin mɔtalman!