Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | AW GƆD DE SI WƆ?

Aw Gɔd De Si Wɔ Insay Wi Yon Tɛm

Aw Gɔd De Si Wɔ Insay Wi Yon Tɛm

Insay wi yon tɛm, dɛn de trit pipul dɛn bad. Bɔku pipul dɛn kin pre to Gɔd fɔ mek i ɛp dɛn ɛn dɛn kin wɔnda if i go ɛva ɛp dɛn. Yu tink se Gɔd de yɛri we dɛn de pre to am? Wetin yu tink bɔt di wan dɛn we kin fɛt wɔ fɔ mek dɛn lɛf fɔ trit dɛn bad? Yu tink se Gɔd de sɔpɔt wetin dɛn de du bikɔs i fil se dɛn gɛt rayt fɔ fɛt?

Amagɛdɔn go bi di wɔ we go mek ɔl ɔda wɔ dɛn dɔn kpatakpata

Fɔs, na fɔ no se: Gɔd de si di sɔfa we pipul dɛn de sɔfa na di wɔl ɛn i want fɔ du sɔntin bɔt dat. (Sam 72:13, 14) Gɔd prɔmis wi insay in Wɔd, di Baybul fɔ se “i go mek una we de sɔfa naw nɔ sɔfa igen.” Ustɛm i go du dat? I “go du dat di tɛm we Masta Jizɔs go kɔmɔt na ɛvin kam ɛn in enjɛl dɛn we gɛt pawa go fala am kam, . . . fɔ pɔnish dɛn pipul we nɔ gri mek Gɔd kam na dɛn layf ɛn dɛn pipul we nɔ gri tek wetin di Gud Nyuz bɔt wi Masta Jizɔs tɛl dɛn.” (Sɛkɛn Lɛta Fɔ Tɛsalonayka 1:7, 8) Di tɛm we Jizɔs go kam, na in di Baybul tɔk bɔt as “di wa we go bi da big de we Gɔd, we gɛt pawa pas ɔl, go sho in pawa.” Di Baybul kɔl am bak Amagɛdɔn.—Rɛvɛleshɔn 16:14, 16.

Insay da wɔ de, nɔto mɔtalman Gɔd go yuz. I go yuz in Pikin Jizɔs Krays wit ɔda pawaful enjɛl dɛn fɔ fɛt agens di wikɛd wan dɛn. Na dɛn Gɔd go yuz fɔ stɔp di wan dɛn we de trit pipul dɛn bad.—Ayzaya 11:4; Rɛvɛleshɔn 19:11-16.

Te to dis wi tɛm, di we aw Gɔd de si wɔ nɔ chenj. I stil de si wɔ as di rayt we fɔ stɔp dɛn pipul we de trit ɔda pipul dɛn bad. Lɛk aw i bin dɔn de bi frɔm trade, na Gɔd nɔmɔ gɛt di rayt fɔ sho ustɛm fɔ fɛt ɛn udat fɔ fɛt. As wi bin dɔn tɔk, Gɔd dɔn disayd fɔ se wan wɔ go de we go stɔp ɔl di wikɛd tin dɛn we pipul dɛn de du ɛn we go fɛt fɔ di wan dɛn we ɔda pipul dɛn de trit bad, ɛn na in  Pikin, Jizɔs Krays go fɛt da wɔ de. Dis min se Gɔd nɔ de sɔpɔt ɔl di wɔ dɛn we dɛn de fɛt insay wi yon tɛm ilɛk us rizin mek dɛn de fɛt.

Fɔ ɛgzampul: Imajin se tu brɔda dɛn bigin fɛt we dɛn papa nɔ de. Dɛn lɛf fɔ fɛt ɛn kɔl dɛn papa na fon fɔ le kɔmplen. Wan pan dɛn tɔk se na in kɔmpin fɔs bigin, ɛn di ɔda wan tɔk se in kɔmpin nɔ trit am fayn. Dɛn ɔl tu ɛksplen to dɛn papa, ɛn dɛn ɔl tu tink se dɛn papa go sɔpɔt dɛn. Bɔt we dɛn papa dɔn lisin to dɛn ɔl tu, i tɛl dɛn se mek dɛn lɛf fɔ fɛt, ɛn wet fɔ am te i kam na os dɔn dɛn go tɔk di kes. Fɔ sɔm tɛm, di tu brɔda dɛn lɛf fɔ fɛt. I nɔ tu te, dɛn bigin fɛt bak. We dɛn papa kam na os, i vɛks pan dɛn ɔl tu ɛn i pɔnish dɛn bikɔs dɛn nɔ lisin to am.

Insay wi yon tɛm, di pipul dɛn we de fɛt wɔ kin beg Gɔd fɔ sɔpɔt dɛn. Bɔt Gɔd nɔ de sɔpɔt ɛnibɔdi we de fɛt insay wi yon tɛm. Bifo dat, insay in Wɔd, di Baybul, i tɔk klia wan se: “If pɔsin du una bad, una nɔ fɔ tɔn di bad gi am bak,” ɛn “una nɔ fɔ tɔn bad gi ɛnibɔdi we du una bad.” (Lɛta Fɔ Rom 12:17, 19) Apat frɔm dat, i dɔn tɛl wi se wi nɔ fɔ “wɔri” wisɛf, wi fɔ wet fɔ am te i fɛt fɔ wi insay Amagɛdɔn. (Sam 37:7) We di pipul dɛn nɔ wet fɔ Jiova, bifo dat dɛn de fɛt fɔ dɛnsɛf, dat sho se dɛn de du tin we dɛn nɔ gɛt rayt fɔ du ɛn dat nɔ de mek i gladi. So insay Amagɛdɔn Gɔd go sho se i rili vɛks ɛn i go sɔlv ɔl di prɔblɛm dɛn we de mek pipul dɛn de fɛt bay we i go “mek ɔl udat de fɛt na [di] wɔl, lɛf fɔ fɛt.” (Sam 46:9; Ayzaya 34:2) Fɔ tru, Amagɛdɔn go bi di wɔ we go mek ɔl ɔda wɔ dɛn dɔn kpatakpata.

Wan pan di blɛsin dɛn we di Kiŋdɔm go kam wit na fɔ mek wɔ dɔn. Jizɔs bin tɔk bɔt da gɔvmɛnt de insay wan prea we bɔku pipul dɛn sabi. Insay de i bin tɔk se: “Lɛ yu Kiŋdɔm kam. Mek wetin yu want, bi na di wɔl lɛk aw yu want am na ɛvin.” (Matyu 6:10, NW) Nɔto wɔ nɔmɔ go dɔn ɔnda Gɔd in Kiŋdɔm bɔt i go mek di wikɛd tin dɛn we de mek pipul dɛn fɛt nɔ de igen. * (Sam 37:9, 10, 14, 15) No wɔnda Jizɔs in disaypul dɛn rili de wet fɔ ɛnjɔy di blɛsin dɛn we Gɔd in Kiŋdɔm go kam wit.—Pita In Sɛkɛn Lɛta 3:13.

Aw lɔng yu tink se wi fɔ wet fɔ mek Gɔd in Kiŋdɔm stɔp ɔl di tin dɛn we de mek wi sɔfa, we de mek pipul dɛn trit wi bad, ɛn we de mek pipul dɛn du wikɛd tin dɛn? Di tin dɛn we di Baybul bin dɔn tɔk, de sho se wi de na di tɛm we di wɔl wan dɔn. (Sɛkɛn Lɛta To Timoti 3:1-5) * I nɔ go te igen Gɔd in Kiŋdɔm go yuz Amagɛdɔn fɔ mek di wɔl dɔn.

Lɛk aw wi bin dɔn tɔk, di wan dɛn we go day na dis las wɔ go bi “dɛn pipul we nɔ gri tek wetin di Gud Nyuz bɔt wi Masta Jizɔs tɛl dɛn.” (Sɛkɛn Lɛta Fɔ Tɛsalonayka 1:8) Bɔt mɛmba se, Gɔd nɔ de gladi we mɔtalman dɛn de day, ivin di wan dɛn we wikɛd. (Izikɛl 33:11) Bikɔs “i nɔ want mek ɛnibɔdi day” insay di las wɔ, na dat mek naw i de mek “pipul go tɛl ɔlman na [di] wɔl” di gud nyus bɔt Jizɔs bifo di ɛnd kam. (Pita In Sɛkɔn Lɛta 3:8, 9, NW; Matyu 24:14; Fɔs Lɛta To Timoti 2:3, 4) Fɔ tru, di prichin wok we Jiova Witnɛs dɛn de du ɔlsay na di wɔl, de gi pipul dɛn chans fɔ no bɔt Gɔd, fɔ lisin to di gud nyus bɔt Jizɔs, ɛn fɔ de di tɛm we wɔ nɔ go de igen.

^ par. 9 Gɔd in Kiŋdɔm go mek mɔtalman in ɛnimi we na day nɔ de igen. Gɔd go gi layf bak to bɔku bɔku pipul dɛn we dɔn day, ivin di wan dɛnsɛf we day pan wɔ.

^ par. 10 If yu want fɔ no mɔ bɔt di tin dɛn we go apin we di wɔl wan dɔn, na fɔ rid chapta 9 na wan buk we dɛn kɔl Wetin Rili di Baybul De Tich? Na Jiova Witnɛs dɛn mek am.