Xinganeka o mbote ieji bheka o unguvulu u tumina o ngongo ioso. Lelu kuene athu avulu ene mu tala hadi mukonda dia uadiama, maji athu a mukuá jimvuama, ala ni kitadi kiavulu. Maji o ku kala ni unguvulu ua henda u tumina o ngongo ioso, ueji bhanga ioso phala mundu uoso n’a kale ni kia soko. Mudiê, o kuila ku hádia o athu a-nda tena ku kala ni unguvulu u bhanga kiki?—Tanga Jelemiia 10:23.

Tundé ukulu, o jinguvulu ene mu bhanga ioso phala ku bhana ku mundu uâ kota-kota ku jingadiama ioso ia bhindamena, maji a lembua. Saí jinguvulu ene mu tatesa ngó akuâ. (Ndongixi 4:1; 8:9) Maji o Nzambi ua Tena Ioso, ua kanena ku bheka unguvulu ua-nda bhingana o mautuminu moso a ngongo. O nguvulu uê ua-nda tumina kiambote o athu mu kua bhana ioso ia bhindamena.—Tanga Izaia 11:4; Daniiele 2:44.

Jihova Nzambi ua solo nguvulu ia tokala phala ku tumina o ngongo ioso—mon’ê Jezú. (Luka 1:31-33) Kioso Jezú kia kexile mu ixi, muéne ua zolele kiavulu o athu iu ua a kuatekesa. Kioso kia-nda mateka ku tumina o ixi, muéne ua-nda bhangesa athu oso ku kala kumoxi ni ku zubha o hadi iâ ioso.—Tanga Jisálamu 72:8, 12-14.

O kuila mundu uoso lelu ua-nda xikina Jezú kuila nguvulu? Kana. Maji Jihova mukua muanhu. (2 Phetele 3:9) Muéne ua mu bhana kithangana ku athu oso phala ku xikina Jezú kala sobha. Ku hádia Jezú ua-nda buika athu oso a iibha, ni ku bheka ku tululuka ni ku kondama mu ixi ioso.—Tanga Mikeia 4:3, 4.