Jihova Nzambi ka mesena kuila tu kala ni uôma mba hele ia ku zuela ni muéne o ibhindamu ietu. (Luka 18:1-7) Muéne uivua o misambu ietu mukonda ua tu zolo. Mukonda dia kuila o Tata ietu ia diulu ni henda ioso, u tu bhinga phala ku samba, ki tu tokala ku xikina?—Tanga Filipe 4:6.

Ki tu tokala ku samba ngó phala ku bhinga kikuatekesu. Mu veji dia kiki, o ku samba ku tu zukamesa kua Nzambi. (Jisálamu 8:3, 4) Kioso ki tu samba izuua ioso tu jikula o muxima uetu kua Nzambi, o ukamba uetu ni muéne u kola dingi.—Tanga Tiiaku 4:8.

Kioso ki tu samba, Nzambi ka mesena kuila tu sota izuelu ia fuama mba ku bhitulula musambu umoxi izuua ioso. Ka tu bhinga ué ku kala ni ukexilu umoxi ua ku samba. Jihova u tu bhinga ku samba ni muxima uoso. (Matesu 6:7) Mu kifika, m’ukulu Ana mukua Izalaiele, ua sambele kua Nzambi mu ku bhinga kikuatekesu phala ku di bhana kiambote ni maka a kexile mu bhita nau ku muiji. Mu ku bhita thembu kioso Nzambi kia tambuijila o musambu uê, muéne ua sangulukile kiavulu iu ua sakidila Nzambi ni muxima uoso.—Tanga 1 Samuuele 1:10, 12, 13, 26, 27; 2:1.

Ujitu ua dikota u tuala nau! Tu tena ku zukama ku Mubhangi uetu ni ku mu tangela o ibhindamu ietu. Tu tena ué ku mu ximana ni ku mu sakidila mu ioso iene mu tu bhangela. Sé phata etu ki tua-ndala ku dituna o ujitu iú ua dikota.—Tanga Jisálamu 145:14-16.