ANDE dia ku tambuijila o kibhuidisu kiki, tu di longe ifundisu iiadi ia Nzambi i tanga o Bibidia—o Dilúvio mu izuua ia Noué ni kibuikilu kia akua Kanana.

IHI IENE MU ZUELA O ATHU: “Nzambi ua bhange kia iibha mu ku bheka o dilúvio dia buikisa athu oso ni ku bhulula ngó Noué ni muiji uê.”

IHI I ZUELA O BIBIDIA: Nzambi uambe: ‘Eme ki ngene mu uabhela o kalunga ka mukua phulu maji muéne a diele o njila iê ia iibha n’a kole muenhu.’ (Izekiiele 33:11) Kienhiki, Nzambi ka sanguluka mu kibuikilu kia athu mu izuua ia Noué, kana. Mu kiki-phe, mukonda diahi muéne ua buikisa o athu?

O Bibidia ilondekesa kuila, Nzambi ua buikisa o athu a iibha m’ukulu, phala ku “kale kijimbuete kua ió oso enda ni kubhuma.” (2 Phetele 2:5, 6) Kijimbuete kiahi?

Kia dianga, sumbala o kibuikilu kia athu mu izuua ia Noué, kia bhekela lamba ku muxima ua Jihova, muéne ua bhange kiki phala kulondekesa kuila ka uabhela o athu ala ni ukexilu ua iibha ni kuila u a fundisa mu ibhangelu iâ. Jihova hádia ua-nda zubha o kuiibha kuoso ni hadi iene mu ngongo.

Kia kaiiadi, o kibuikilu kia athu m’ukulu, kia londekesa ué kuila Jihova ni henda ioso, u dimuna o athu ande dia ku a buikisa. Noué ua kexile mu dimuna o athu maji ene ka mesenene ku muivua. O Bibidia i zuela: ‘Ka bhana mátui katé dilúvio dia menha ki dia tula di dia a kungulula ene oso.’—Matesu 24:39.

O kuila Nzambi uene hanji mu dimuna o athu lelu? Kiene. Mu kifika, muéne ua dimuna o mundu uê ua Izalaiele kuila, se a bhangele o ima ia iibha kála kia kexile mu bhanga o jixi ja mukuá, muéne ueji kuehela o jinguma jâ ku bokona mu ixi iâ ni ku buikisa o mbanza ia Jeluzaleme ni ku a ambata kala abhika. Akua Izalaiele a kuata ni ku bhanga o ima ia iibha—katé muene akexile mu bhana an’â kala sata ku jinzambi ja makutu. O kuila Jihova ua bhange kima? Muéne ua bhange kima. Maji ua dianga ku tumikisa mu veji javulu, o jipolofeta jê phala ku a dimuna ni ku lungulula o ukexilu uâ ua iibha phala ka a buikise. Muéne uambe: “Jihova kana-ku kima kia bhanga hé u kamba kuijidisa kikutu kiê kua abhik’ê, o jipolofeta.”—Amoji 3:7.

KIEBHI KIA KU TOKALA O MAKA ENHÁ: O ukexilu ua Jihova ua ku fundisa, ku tu bhana kidielelu. Tu tena ku dielela kuila, Nzambi ua-nda fundisa ni ku buikisa oso ió a bhanga ima ia iibha ni ku bhangesa akuâ ku tala hadi. O Bibidia i zuela:  ‘Mukonda oso a bhanga ima ia iibha, a xikamena ku a batula bhoxi . . . maji oso-phe a lenduka, ene a lundula o ixi; a kala ku ngalasa ni ku tululuka kuavulu.’ (Jisálamu 37:9-11) Ihi i u banza ia lungu ni ku zubha o kuiibha ni hadi mu ngongo? O kuila kima kia iibha inga kima kiambote?

IHI IENE MU ZUELA O ATHU: “Kala o ujibhangânga u tuene mu mona lelu, o kibuikilu kia akua Kanana, kiexile kituxi kia dikota.”

IHI I ZUELA O BIBIDIA: ‘O jinjila ja Nzambi ja iuka; muéne Nzambi ia kidi, mua muéne ki muene mangonha.’ (Matendelelu 32:4) O ima i bhanga Nzambi mu ku iuka kuê, ki tu i sokesa ni ita iene mu bhanga o athu lelu. Mukonda diahi? Mukonda Nzambi ka difu ni athu, muéne u tena ku mona o ima iala ku mixima ia athu.

Mu kifika, kioso Nzambi kia mesenene ku fundisa ni ku buikisa o mbanza ia Sodoma ni Ngomola, Mbalahamu, diiala dia fiiele, ua mesenene kuijiia se Nzambi ueji bhanga kiki ni ku iuka mba kana. Muéne ka tenene ku xikina kuila o Nzambi iê ia iuka, ueji ‘buikisa kumoxi ki kale ió a kumbidila ni iá a bhukumuka.’ Ni muanhu uoso, Nzambi ua mu tangela kuila se mu Sodoma mua kexile né muene ngó dikuinhi dia athu a iuka, Muéne keji buikisa o mbanza, kana. (Dimatekenu 18:20-33) Nzambi ua talele ku mixima ia athu oso akexile mu mbanza iu ua mono kuila, o mixima ia athu iezalele ni kuiibha.—1 Malunda 28:9.

Kiene ué kimoxi, Nzambi ua mono kuila akua Kanana exile athu a iibha, mukonda dia kiki, ua tumina o ku a buikisa. Akua Kanana a betele kua ejiia mu kuiibha kuâ, ene akexile mu kuoha o tuana tuâ ni muenhu mu ku a bhana kala sata phala o ji nzambi jâ ja makutu. * (2 Jisobha 16:3) O akua Kanana, ejidile kuila Jihova ua tumine o mundu ua Izalaiele ku tambula o ixi ioso. O ió a solele ku kala mu ixi ni ku bhânga, ka kexile ngó mu zoka ni akua Izalaiele kana, maji akexile mu zoka uá ni Jihova, ua alondekesele kuila ua kexile ni mundu uê.

Maji Jihova ua loloka o akua Kanana, a lungulula o ukexilu uâ ua iibha ia a xikina o ku belesela o ijila ia Jihova. Mu kifika, Lahaba, o kidianzunga, a mu bhulula kumoxi ni muiji uê. O athu a tungile mu Ngibiione, mbanza ia ixi ia Kanana, kioso kia bhingi muloloki kua Josuué, ene ni an’â oso ka a jibhile.—Josuué 6:25; 9:3, 24-26

KIEBHI KIA KU TOKALA O MAKA ENHÁ: O kibuikilu kia akua Kanana, ki tu longa disá dia dikota. Tua mu zukama ni lusolo mu ‘kizuua kia Kufundisa, kia ku buikisa athu a iibha.’ (2 Phetele 3:7) Se tu zola Jihova, tua-nda sanguluka kioso muéne kia-nda zubha o hadi ioso i tuene mu bhita na-iu ni ku buikisa oso ió a dituna o ungana uê ua iuka.

Jihova u tu lembalesa kuila, o ima i sola o jitata, i tena ku bhanga kiambote mba kia iibha ku an’â. O Mak’â Nzambi a zuela: ‘Sola-phe muenhu, n’u kale ku muenhu, n’eie ni mbutu iê. Kale-phe u zola Jihova Nzambi iê, u bhana mátui ku dízui diê, enda ni ku mu naminina ngó muene.’ (Matendelelu 30:19, 20) O kuila o izuelu íii ia Nzambi ia iibha, inga ia Nzambi ia henda ua mesena kuila, o athu a sola kiambote?