Dilange ku Mibhetu ia Diabhu!

‘Ku tunda ku mubhetu ua Diabhu.’ —2 TIM. 2:26.

KIEBHI KI UEJI TAMBUIJILA?

Ihi i ua tokala o ku bhanga se u mona kuila uala ni kifua kia ku longolola?

Ihi ia ku longo o phangu ia Pilatu ni Phetele ia lungu ni ku kala ni uôma ni kijijidiku?

Kiebhi ki u tena ku dituna o muxima ua neme?

1, 2. Mibhetu iahi ia Diabhu i tua-nda di longa mu milongi íii?

O DIABHU ua mesena ku kuata o jiselevende ja Jihova. Muéne ka mesena ku a jibha, kála ki bhanga o dinhanga dia ngenga, kioso kia kuata o kiama. Mu veji dia kiki, o Diabhu ua mesena ku kuata o athu ni muenhu phala ku kala ku mbandu iê mua a bhangesa ioso ia mesena muéne.—Tanga 2 Timote 2:24-26.

² Phala ku kuata o kiama, o dinhanga u ta mibhetu iavulu ki i difu. Muéne u tena ku kuata o kiama, kioso ki ki tunda bhu ngenda iê, kiene kia ki kuata mu mubhetu uê. Mba u tena ku ki kuata mu kibhetu kio sueke, ka tena ku ki mona ku kiama. Kiene ué ki bhanga o Diabhu phala ku kuata o jiselevende ja Nzambi ni muenhu. Se ki tu mesena ku tu kuata ku mibhetu íii, tua tokala ku dilanga, ni kuijiia o ijimbuete ilondekesa kuila tua zukama ku mibhetu ia Diabhu. Mu milongi íii, tua-nda di longa kiebhi ki tu tena ku dilanga ku mibhetu itatu iene mu ta Diabhu phala ku kuata o jiselevende ja Nzambi, (1) ku kamba ku langa o dimi (2) o uôma ni kijijidiku (3) muxima ua neme. Mu milongi ia kaiela, tua-nda di longa dingi o mibhetu iiadi ia Satanaji.

JIMA O TÚBHIA, MU KU LANGA O DIMI

3, 4. O ku kamba ku langa o dimi, ku bheka maka ahi? Bhana phangu.

³ Phala ku kuata kiama kiala mu ngenda iê mba dizungu, o dinhanga di ta túbhia ku mbandu ia kitumba phala o iama i tunda mu ididi mua di suekela phala ku a kuata kioso kia tunda ni ku lenga mukonda dia túbhia. Kiene kimoxi ué mu ukexilu ua nzumbi, o Diabhu u ta túbhia mu kilunga. Se muéne u di tunda kiambote, u tena ku kuata o jiphange mu kilunga.  Kiebhi ki tu tena ku mu kuatekesa ku bhanga kiki, né muene se ku kijiia, tu tena ku bua mu kibhetu kiê?

⁴ O dixibulu Tiiaku, ua sokesa o dimi ni túbhia. (Tanga Tiiaku 3:6-8.) Se ki tu tena ku langa o dimi dietu, tu tena ku bambula túbhia mu kilunga mu ukexilu ua nzumbi. Kiebhi ki ki tena o ku bhita? Xinganeka kuila, a bhanga ngolokela mu kilunga kuma, saí phange ia muhatu, muboki ua thembu ioso. Kioso ki bhua o kiônge, phange jiiadi ja ahatu, a kuata o kuzuela ia lungu ni ngolokela. Phange imoxi u sanguluka, u mesena o mbote ia muboki ua thembu ioso. O phange ia mukuá uamba kuila, o phange iú ka mesena ngó ku kala muboki ua thembu ioso, saí ni kima kia mu bhangesa, ua mesena kijingu mu kilunga. Mu kiiadi kiâ, phange iebhi ueji mesena kuila u kala kamba diê? Ki ki bhonzo kuijiia nanhi ueji bheka maka mu kilunga mu ku kamba ku langa o dimi.

5. Phala ku jima o túbhia kua ku kamba ku langa o dimi, ihi i tua tokala o ku bhanga?

⁵ Kiebhi ki tu tena ku jima o túbhia tuijila mu ku kamba o ku langa o dimi? Jezú uambe: ‘Kioso kiala ku muxima kiene ki zuela o dikanu.’ (Mat. 12:34) Kienhiki, o kima kia dianga, o ku tonginina o muxima uetu. O kuila tu dituna o ibanzelu ia iibha, i bhangesa ku kamba ku langa o dimi? Mu kifika, kioso ki tuívua kuila phange ua mu suua mbambe mu kilunga, ki kima kiambote o ku xikina kuila muéne ua mu bhanga kiki ni muxima uambote, anga tu fika kuila muéne ua mesena ku di zangeleka? Se tuala ni kifua kia ku longolola, tua tokala kuijiia kuila kiene ué kia banze Diabhu kua Jobe. (Jobe 1:9-11) Se tua mu longolola o jiphange jetu, tua tokala tuijiia se mukonda diahi tua mu bhanga kiki. O kuila saí kima kia mu tu bhangesa o ku kala ni ukexilu ua ku longolola? O kuila o muxima uetu a u nganala ué ni ukexilu ua mundu iú ua iibha ua ku kamba o henda?—2 Tim. 3:1-4.

6, 7. (a) Ima iahi i tena ku tu bhangesa ku longolola akuetu? (b) Kiebhi ki tua tokala ku tambuijila se a tu xinga?

⁶ Tu di longe ima ia mukuá i tena ku tu bhangesa ku longolola akuetu. Kia dianga, o vondadi ietu ia ku di zangeleka. Mba tua mesena ku kala ku thandu dia akuetu. Anga tu mesena ku sueka o kifua kietu kia ku kamba ku bhanga o kima kiambote. Se tu kala ni ukumbu, ni luímbi, mba tu di mona kala ki tuala ni valolo, ki tena ku tu bhekela kiluezu kia dikota.

⁷ Nange tu mona kuila kia bhingi muene ku longolola muthu. Nange muthu iú ua ku longoluele ué kiá. O ku mu longolola ué, ki kiene o kima kia tokala.  Se u bhanga kiki, ua mu bandekesa ngó o túbhia, ua mu bhanga o vondadi ia Diabhu, kua mu bhanga o vondadi ia Nzambi kana. (2 Tim. 2:26) Kima kiambote se tu kaiela o phangu ia Jezú. O kia mu xingile ku athu, “ka vutuile ndaka.” Maji ‘mulonga uê-phe ua uehela Nzambi muenhó mukua kufundisa ni ku iuka.’ (1 Phe. 2:21-23) Jezú ua dielele kuila Jihova ueji batula o maka mu kithangana Kiê kia tokala. Tua tokala ué ku dielela kua Nzambi. Se tu langa o dimi dietu, tu kuatekesa o kilunga ku ‘tululuka.’—Tanga Efezo 4:1-3.

LENGA O MUBHETU UA UÔMA NI KIJIJIDIKU

8, 9. Mukonda diahi Pilatu ua balakala Jezú?

⁸ O kiama kia kuata ku mubhetu, ki ki tena ku di bhulula. Kiene kimoxi ué o muthu u kala ni uôma ua kijijidiku, ka tena ku bhanga dingi kima ni muenhu uê. (Tanga Jisabhu 29:25.) Tua-nda di longa phangu ia athu kiiadi akexile ni uôma ua kijijidiku, ni ihi i tu longa o phangu iâ.

⁹ O Nguvulu ia Loma, Pônsio Pilatu uejidile kuila Jezú uexile muthu uambote, ka mesenene ku mu bhanga kia iibha. Pilatu uambe kuma Jezú ‘ka kexile ni kituxi kia bhingile ku mu jibha.’ Maji né kiki, Pilatu ua mu balakala kufuá. Mukonda diahi? Mukonda Pilatu ua kexile ni uôma ua kijijidiku kia athu. (Luk. 23:15, 21-25) O jinguma a di kola, exi: “[Se] u mu jituna, ku dikamba dia Sézalu dingi!” Kienhiki muéne ua bhange o vondadi ia athu. (Nzu. 19:12) Pilatu ua kexile ni uôma ua ku mu katula o kijingu kiê—mba ku mu jibha—se uehele Kristu. Kienhiki, muéne ua bhange o vondadi ia Diabhu.

10. Ihi ia bhangesa Phetele ku dituna Kristu?

¹⁰ O poxolo Phetele uexile kamba dia kazola dia Jezú. Muéne ua zuela bhu pholo ia athu kuila Jezú, muene o Mexiia. (Mat. 16:16) Phetele ua kolokotele mu fiiele ué, sumbala o maxibulu a mukuá a xisa Jezú kioso kia kambele ku tendela kiambote ihi ia kexile mu lombolola Jezú mu izuelu iê. (Nzu. 6:66-69) Kioso kia bhixila o jinguma phala ku kasa Jezú, Phetele ua katula o xibhata phala ku zokela Mesene iê. (Nzu. 18:10, 11) Saí kizuua, mukonda dia uôma Phetele uambe kuila kejidile Jezú Kristu. Mu kithangana kieniókio, o poxolo a mu kuata mu mubhetu ua uôma ua athu, kiki kia mu fidisile kulondekesa o ku suína.—Mat. 26:74, 75.

11. Maka ahi u tu tena ku dibhana na-u?

¹¹ Etu tu Jikidistá, tua tokala ku lenga o kijijidiku phala ki tu bhange ima ia iibhila Nzambi. O jixefe jetu ni athu a mukuá, nange a tu jijidika ku tanga makutu, mba ku tu bhangesa ku dita mu undumbu. O maxibulu bhu xikola a tena kua jijidika ku akuâ mu ku tala mu madivulu kioso kia bhanga o polova bhu xikola, ni ku tala ufusa, ku xibha makanha, ku kodiua mba ku dita mu undumbu. Kienhiki-phe, ihi i tena ku tu kuatekesa ku lenga o mubhetu ua uôma ni kijijidiku kia ku bhanga o ima ia zembe Jihova?

12. Ihi i tu tena ku di longa kua Pilatu ni Phetele?

¹² Tua-nda kuijiia ihi i tu longa o phangu ia Pilatu ni Phetele. Pilatu kejidile kiambote Kristu. Né kiki, muéne uejidile kuila Kristu ka kexile ni kikuma, ni kuila muéne kexile muthu uoso-uoso. Maji Pilatu ka kexile muthu ua lenduka, ka zolele o Nzambi ia kidi. Kienhiki, Diabhu ua mu kuata mu mubhetu. Phetele uejidile Nzambi, iu ua mu zolele ué. Maji né kiki saí ithangana, ua di zangelekele, uôma ua mu kuatele,  iu ua zoza mukonda dia kijijidiku kia athu. Ande dia ku kasa Jezú, muéne ua dizangelekele, mu kuamba kuila, “né-mbé ene oso a lenga n’a ku xisa, eme kana!” (Mar. 14:29) Kieji beta-kota o poxolo ku kala polondo phala ku dibhana ni jipolova ni ibhidi ieji moneka, ua tokalele kuzuela kala o mukua Jisalamu mu ku dielela kua Nzambi kioso kiambe mu mukumbi: ‘Jihova uala bhu mbandu iami, ki ngi kala dingi ni uôma; ihi i tena ku ngi bhanga o muthu.’ (Jisá. 118:6) Mu usuku uê ua sukina mu ixi, Jezú ni Phetele ni maxibulu a iiadi endele mu jaludim ia Ngetesemane. Mu veji dia ku kala ku mesu a zele, Phetele ni akuâ, akexile mu zeka. Jezú ua a balumuna iu ua ambela: ‘Dilangienu, mu sambe, phala ki mu dibhale mu mubhetu.’ (Mar. 14:38) Maji Phetele ua zeka dingi, mukonda dia kiki o uôma ni kijijidiku kia mu kuata.

13. Kiebhi ki tu tena ku dituna o kijijidiku kia ku bhanga o ima ia iibha?

¹³ O phangu ia Pilatu ni Phetele i tena ku tu longa disá dia dikota: Phala ku di tunda kiambote ku kijijidiku, tua tokala tuijiia o kidi, tu kala tu athu a lenduka, a kambe ku dizangeleka, a zolo Nzambi, a kala ni uôma ua Jihova, kana o uôma ua athu. Se o kixikanu kietu kijila mu kuijiia kua kidi, tua-nda tena kuzuela ni ku suína kuoso o ima i tu di longa mu Bibidia. Kiki kia-nda ku tu kuatekesa ku lenga o kijijidiku ni ku dibhana ni uôma ua athu. Kienhiki, ki tu tokala ku dielela mu nguzu ietu. Mu veji dia kiki, tua tokala tuijiia kuila tua bhingi o kutena kua Nzambi phala ku dibhana ni kijijidiku. Tua tokala ku samba mu ku bhinga o nzumbi ia Jihova, ni kuehela kuila o henda ietu kua muene i tu kuatekesa ku zokela o dijina diê ni itumu iê. Tua tokala ué ku kala polondo ande dia ku dibhana ni ibhidi. Mu kifika, se tu di pelepalala ni ku samba, ku tena ku kuatekesa o tuana tu’etu, ku tambuijila kiambote kioso makamba mâ kia mesena ku a jijidika ku bhanga ima ia iibha.—2 Kol. 13:7. *

DITUNE O MUBHETU U TOLOLA —O MUXIMA UA NEME

14. Ihi ia mesena Diabhu i tu banza ia lungu ni ituxi i tua tele m’ukulu?

¹⁴ Saí ithangana, o mubhetu ua kiama, a u bhanga ni muxi uonene mba ditadi di laukila mu njila mu bhitila o iama. O kiama kioso kia diota o mukolo, o ditadi di mu laukila. O muxima ua neme, a tena ku u sokesa ni kimbamba kia neme. Kioso ki tu xinganeka o ituxi i tua tele m’ukulu, tu “kuata ngó kukumba.” (Tanga Jisálamu 38:3-5, 8.) Satanaji ua mesena ku tu bhangesa ku banza kuila Jihova ka tu zolo dingi, ni kuila ki tu tena ku belesela o itumu Iê.

15, 16. Kiebhi ki u tena ku lenga o mubhetu ua ku kala ni muxima ua neme?

¹⁵ Kiebhi ki u tena ku dituna o mubhetu u tolola? Se eie u ta kituxi kia dikota, bhanga kima ni lusolo phala u kale dingi ni ukamba ni Jihova. Bhinga o kikuatekesu kia tu funga, phala ku u kuatekesa. (Tiia. 5:14-16) Bhanga ioso phala ku belesela. (2 Kol. 7:11) Se a ku bazela, kana ku luuala. O ku u bazela, kulondekesa kuila Jihova ua ku zolo. (Jihe. 12:6) Kana ku kaiela dingi o njila ia ku bhangesa o ku ta o kituxi, bhanga o kima kia tokala o ku bhanga. Kioso ki u diela, kala ni kixikanu kia kuila o sata ia kukula kua Jezú Kristu, i tena ku jima o ituxi iê.—1 Nzu. 4:9, 14.

¹⁶ Lelu, saí athu a banza hanji mu ituxi ia tele m’ukulu ió loloke kiá. Se kiki kiene kia mu bhita n’eie, lembalala kuila Jihova ua loloka Phetele ni jipoxolo ja mukuá, a xisa o Mon’ê Jezú mu kithangana kia mesenene o kikuatekesu kiâ. Jihova ua loloka o diiala a  mu kaiele mu kilunga kia Kolindo mukonda dia ukexilu uê ua uhabhu, maji ua diela (1 Kol. 5:1-5; 2 Kol. 2:6-8) O Mak’â Nzambi a zuela ia lungu ni athu a tele ituxi iavulu, iâ a diela o ituxi iâ, iâ a loloka kua Nzambi.—2 Mal. 33:2, 10-13; 1 Kol. 6:9-11.

17. O kukula ku tu bhanga ihi?

¹⁷ Jihova u loloka, u jimba o ituxi iê, iokulu, se u diela mu kidi ni ku xikina o henda iê. Kana ku banza kuila o sata ia kukula kua Jezú, ki i tena ku jima o ituxi iê. Se u kala ni ibanzelu íii, ki kia-nda bhonza ku ku kuata ku mubhetu ua Satanaji. Né muene se Diabhu ua mesena kuila eie u kala ni kibanzelu kiki, o kukula ku tena ku jima o ituxi ioso ia athu a dibhalele, ene mu diela. (Jisa. 24:16) O ku dielela mu kukula, ku tena ku tu katula o kimbamba ki tolola bhu isuxi ietu, ki tena ué ku tu bhana nguzu ia ku sidivila Nzambi ni muxima uoso ni kilunji kioso, ni muenhu uetu uoso.—Mat. 22:37.

TUEJIIA O JINDUNGE JOSO JA SATANAJI

18. Kiebhi ki tu tena ku lenga o mibhetu ia Diabhu?

¹⁸ Satanaji u ta mibhetu ioso, mukonda ua mesena ngó ku tu kuata. Mukonda etu ki tu kambe kuijiia o jindunge ja Satanaji, muéne ka tena ku tu nganala. (2 Cor. 2:10, 11) Etu ki tua-nda bua ku mibhetu iê, mba ku jindunge jê, se tu samba mu ku bhinga unjimu phala ku dibhana ni ibhindamu ietu. Tiiaku ua soneka: “Maji se sai muthu mudienu ua kambe unjimu, a u bhinge [kua] Nzambi, muène anga u mu bhana-u. Mbata muène u bhana kiavulu, mukua kuila ene oso u a bhana ni vondadi, kene mu baúla muthu.” (Tiia. 1:5) Tua tokala ku kumbidila ioso i tu bhinga mu musambu, ku di longa ubheka uetu izuua ioso, ni ku kumbidila o Mak’â Nzambi. O ku di longa o Bibidia, ni kikuatekesu ki tu bhana o kibuka kia kimbadi kia fiiele, ku tu kuatekesa ku dibhana ni mibhetu ia Diabhu ni ku i lenga.

19, 20. Mukonda diahi tua tokala ku zemba o ima ia iibha?

¹⁹ O ku samba ni ku di longa o Bibidia, ku tu kuatekesa ku zola o ima iambote. Maji kima kiambote ué ku zemba o ima ia iibha. (Jisá. 97:10) O ku xinganeka mu ibhidi ijila mu ku bhanga o ima ia iibha, i tena ku tu kuatekesa ku i lenga. (Tiia. 1:14, 15) Kioso ki tu di longa o ku zemba o ima ia iibha ni ku zola o ima iambote, o mibhetu ia Satanaji ki i tena ku tu kuata.

²⁰ Tua sakidila kiavulu mu ku mona kuila Nzambi ua mu tu kuatekesa phala ka tu nganale kua Satanaji! Bhu kaxi ka nzumbi Iê, ka Maka mê, ka kilunga kiê, Jihova u tu “kudila ku dimonho.” (Mat. 6:13) Mu milongi ia kaiela, tua-nda di longa mibhetu iiadi, i ta Diabhu phala ku kuata o jiselevende ja Nzambi.

[Tanga mu luji]

[Ibhuidisu ia ku dilonga]

[Foto ku mbandu 24]

O ku kamba ku langa o dimi, ku bheka maka mu kilunga

[Foto ku mbandu 27]

Eie ua tokala uehela o muxima ua neme