Mu ku Sota o Itambuijilu
Mu ku Sota o Itambuijilu
“Athu oso ala ni ibanzelu ia lungu ni Jezú se muene nanhi. Né muene se tuala ni kixikanu kiavulu mba ki tu jikidistá, etu enioso tuene mu dibhula: ‘O muthu iú nanhi?’”—AUTHOR STAN GUTHRIE.
O ATHU a mesena kiavulu kuijiia se Jezú nanhi. O athu ene mu sumba madivulu avulu a zuela ia lungu ni Jezú. O jifilme ji londekesa Jezú, ene mu ji bhitisa mu ididi iavulu. Né kiki, athu ene hanji ni phata ja lungu ni Jezú. Athu ala ni ibanzelu iavulu, se Jezú uexile nanhi.
Mivu ku dima, kiiadi kia athu a zuela mu mutelembe, exana athu phala ku tambuijila o kibhuidisu: “Jezú uexile nanhi?” Ene a tambuijila kiki:
● “Nange muéne uexile mulongexi, ua bhana phangu ia henda ku muenhu uê.”
● “Muéne uexile kála etu, ua kexile mu bhanga madiuanu.”
● “Se-ku kima kilondekesa kuila Jezú ua kexile muene ku muenhu.”
● “Jezú uexile Mon’a Nzambi, a mu vuala, uafú, iu a mu fukununa phala ku tu bhulula ku ituxu ietu. Lelu, Muéne uala hanji ku muenhu, iu ua-nda kuíza dingi mu ixi.”
● “Eme nga xikina kuila Jezú Krisu, muéne o mona umoxi-élele ua Nzambi, muthu ua fiile, mukua diulu.”
● “Jezú misoso phala o minzangala.”
Mu kidi o ibanzelu ioso íii, ki i tena ku kala ia kidi. O kuila saí kima ki tena ku tu bhana itambuijilu ia kidi ia ibhuidisu ietu ia lungu ni Jezú? O athu a bhange o kadivulu kaka, a xikina kuila o Bibidia, iene o mak’â Nzambi, iene ngó izuela o kidi kioso kia lungu ni Jezú. *—2 Timote 3:16.
Mu milongi ia kaiela, tua-nda di longa, o itambuijilu ia Bibidia ia ibhuidisu ia lungu ni Jezú. Muéne uambe kuila, “uoso u mu xikana” u bhuluka. (Nzuá 3:16) Tua mu ku bhinga phala kuijiia o itambuijilu, ni u sole ku di longa dingi ia lungu ni Jezú, ni ku kala ni kixikanu kua muéne.
[Tanga mu luji]
^ kax. 11 Phala kuijiia dingi o maka enhá, tanga o kibatulu 2 kiambe, “O Bibidia—Divulu dia Nzambi,” mu divulu, Mu Kidi Ihi i Longa o Bibidia? a di bhange ku Jimbangi ja Jihova.
