Jezú walongo o athu phala kukala ku paze ni akwâ. Maji sayi kizuwa, mwene watangela o jipoxolo jê: “Ki mu banze kwila ngeza mu bheka paze mu ngongo, ki ngeza mu bheka paze, maji xibhata. Mbata ngeza phala kubhangesa kwila, o mon’a diyala udikwata ni tat’â, o mon’a muhatu ni mam’â, o mbalakaji ni ukow’ê.” (Mat. 10:34, 35) Ihi yamesenene kuzwela Jezú?

Jezú kamesenene kwila o athu ku mwiji adimwanga, maji mwene wejidile kwila o ilongesu yê, yejibhangesa sayi mwiji kudimwanga. Kyenyiki, o yó amesenene kukala maxibulu a Kidistu ni kwabatizala, abhingile kwijiya kwila, sayi bhabha eji kwazukutisa ku jindandu jâ mukonda dya kima kyasolo. Se eji kwazukutisa ku dikaza mba ku jindandu jengi, kweji kwabhonza kukala jifiyele ku ilongesu ya Kidistu.

O Bibidya iswinisa o Jikidistá “phala [akale] ku paze ni athu oso.” (Lom. 12:18) Maji o ilongesu ya Jezú itena kukala “xibhata” phala o miji. Kiki kibhita kyoso muthu umoxi ku mwiji uxikina o ilongesu ya Jezú, maji o athu amukwá aditunayu. Mu ithangana yiyi, o athu atungu mu dibhata dimoxi akituka “jinguma” ja muthu wamudilonga o kidi kya Bibidya.—Mat. 10:36.

O maxibulu a Kidistu atungu mu inzo mwala athu atokala mu ngeleja yengi, sayi bhabha atokala kusola se andasangulukisa Jihova ni Jezú mba o jindandu jâ. Mu kifika, o jindandu kamusidivila Jihova atena kwajijidika kubhanga fesa yalungu ni jingeleja ja makutu. Kyoso kya azukutisa, ene andasangulukisa nanyi? Jezú wambe: “Woso uzola dingi tata mba mama, eme ndenge, yú ka fwama kukala dixibulu dyami.” (Mat. 10:37) Mu kidi, Jezú kazwela kwila o maxibulu mê atokalele kuzemba o jitata jâ. Mu veji dya kiki, wexile mwalonga kusola o kima kyabetakota ku mwenyu wâ. Se jindandu jetu ki Jikidistá atuzukutisa mukonda dya kubheza Jihova, né kiki etu tusuluka ni ku azola, maji o henda yetu kwa Nzambi yabeta dingi kota.

Sé phata o izukutisu ya jindandu jetu, ituluwalesa kyavulu. Né kiki, o maxibulu a Jezú atokala kulembalala o izwelu yê: “Woso kaxikina kwambata o taka yê ya jiphaxi ni ku ngi kayela, yú ka fwama kukala dixibulu dyami.” (Mat. 10:38) Mu izwelu yamukwá, o Jikidistá amona o izukutisu ya jindandu jâ kala o hadi ixikina o maxibulu a Kidistu ni muxima woso. Maji ene ejiya kwila mukonda dya wendelu wâ wambote, o jindandu jâ andatena kulungulula o ixinganeku yâ, ni kudilonga o kidi kya Bibidya.—1 Ph. 3:1, 2