Jezú wa jimbulula kyebhi ki tweji kwijiya kwila, “o Utuminu wa Nzambi wa zukama.” (Luka 21:31) Mwene wa kanena kwila, mu ima yavulu yeji bhita kweji kala ita yavulu, o itungutisu ya ixi yeji di bandekesa, o nzala yeji vula o mawuhaxi eji di bandekesa ni ima ya mukwá dingi i twene mu mona kyá.—Luka 21:10-17.

O Bibidya ilondekesa we kwila mu “izuwa ya sukidila-ku” ya utuminu wa jinguvulu o athu eji bhanga ima yayibha. Eye u tena kutanga o izulukutu yiyi mu divulu dya 2 Timote 3:1-5. Kyoso ki u mona o ukexilu wa athu lelu, se phata eye u xikina kwila, o kikanenu kiki kya Bibidya kya lungu ni ima ya mu bhita kindala.

Kiki kilombolola ihi? O kithangana phala o Utuminu wa Nzambi kubhangesa o ixi kukituka kididi kyambote kya zukama. (Luka 21:36) Mu Bibidya, Nzambi wa kanena ima yambote phala o ixi ni athu a-nda tunga-mu. Tu mone o ima yiyi.

“[Jezú] anga a mu bhana o kutumina, ni kijingu, ni ungana, phala miji yoso, ni ifuxi, ni madimi moso ende ni ku mu bhikila mwene. O kutumina kwê kwa-nda [nangenena], ku kwene dizubhilu, o ungana wê wene ngó, ka tena ku u bhwisa-ku.”—DANIYELE 7:14.

Kiki kilombolola kwila, eye u tena kusanguluka ku mwenyu mu unguvulu wa tumbika Nzambi, wa solo Mon’ê kala Sobha.

“Ki bhwa kà kala mukwa-bhata mu Jeluzaleme wila: ‛Nga kata, lémbwa.’”—IZAYA 33:24.

Kiki kilombolola kwila, eye ki wa-nda kata dingi; ki wa-nda fwa.

“Ita wa i swikika katé ku maxokolo a’xi, uta wa mufula wa u bhakula.”—JISÁLAMU 46:9.

Kiki kilombolola kwila, ki bhwa-nda kala dingi ita ne hadi ijila mukonda dya ita.

“Mukwa phulu-ó ubhwa athu ku mesu; . . . Oso-phe a lenduka, ene a lundula o ixi.”—JISÁLAMU 37:10, 11.

Kiki kilombolola kwila, ki kwa-nda kala dingi athu a ibha, kwa-nda kala ngó athu a mesena kubelesela Nzambi.

“Ene-phe a kà tunga jinzo, anga a kala-mu; a kà dima milenga ya mividi, anga a kà dyá idima yê.”—IZAYA 65:21, 22.

Kiki kilombolola kwila, o ixi yoso ya-nda yuka. Nzambi wa-nda tambwijila o misambu yetu ya kwila o vondadi yê a i bhange “mu ixi.”—Matesu 6:10