Ku bokona mu madisá

Ku bokona mu madisá

1 Kikuatekesu Phala Kulenga o Ibhidi

1 Kikuatekesu Phala Kulenga o Ibhidi

O Bibidia iamba kuila, o milongi ia Bibidia Nzambi ua i bhusu, milongi “ia kubhandulula, ni mu kulonga o kidi, ni mu kubazela itondalu, ni mu kuiukisa ia bhengalala.” (2 Timote 3:16) O kuila kiki kidi muene? Tala kiebhi o unjimu ua Bibidia ia kuatekesa athu avulu, ku dibhana ni ibhidi ku muenhu ande dia ibhidi íii ku di bandekesa dingi.

KUNUA KIAVULU UHÓLUA

Fina tua mu tange kiá kudima, ua divuile kuila o maka akexile mu bhita nau akexile mu mu bhangesa kunua kiavulu. O Bibidia ki i fidisa o muthu kunua uhólua, maji iene iamba: “Ku kale mu kisangela kia jihólua ja vinhu.” (Jisabhu 23:20) Lelu o kunua kiavulu kuene mu bhekela mauhaxi avulu ku athu, kuene ue mu muangesa miji iavulu, mukonda dia uhólua mazunda athu ene mu fuá mivu ioso. Athu avulu keji bhita mu ibhidi íii se a beleselele o milongi ia Bibidia.

Fina ua belesela. Muene uambe: “Nga tendela kuila o uhólua ki u kexile mu zubha o hele iami. Nga kumbidila o kitendelesu mu mukanda ua Filipe 4:6, 7, uambe: ‘Ki mu kale ni hele ia kima, maji. . . mu ende ni kubhinga kua Nzambi ioso i mua mesena.’ Mu mausuku oso, kioso ki nga kexile mu kala ni ibanzelu iaiibha nga kexile mu samba kua Jihova. Nga kexile mu tangela kua Jihova ioso i nga kexile mu bhita na-iu, kala o njinda, kikote ku muxima, ni kubhuila, nga kexile mu dionda kua Jihova phala ngi kale ni ibanzelu iambote. Mu kamene, nga kexile mu bhanga ioso phala kukatula o ibanzelu ia iibha ku muxima. O kusamba kua Jihova kua ngi bhangesa ku xinganeka mu ima i nga kexile na-iu, mu veji dia kuxinganeka mu ima inga kambe ku kala na-iu. Nga bhange ioso phala kuxisa o uhólua, mukonda ki ngi mesenene kutexa o kutululuka kua kidi ku nga sangele.”

 UFUSA

O ufusa uene mu bheka kuluuala kuavulu ni ibhidi ku muenhu. Maji o itumu ia Bibidia i tena ku tu kuatekesa mu kulenga o maufusa iá, mu kifika, kala o kutoka o diesu mba ku tonginina muhatu, ni kutala o ufusa mu mutelembe. Samuuele uambe kuila “ki ki bhonzele o kutoka o diesu ku muhatu. Sai bhabha ki ngi uabhelele o kalumba, maji kioso ki ngi mona kuila muene ua ngi uabhela, kiki kiene ki bhangesa ku ditonginina mba ku ditoka o diesu.” Samuuele uambe kuila mu veji javulu a mu tatela kuila ua kexile mu toka diesu, né muene se ka mesenene ku ki bhanga, katé kia solo ku ki bhanga mu luelu. Maji muene ka mesenene dingi. Muene uixi: “Iú uexile ukexilu uaiibha mukonda u bhangesa o muthu ku di suua ngó muene.”

Samuuele ua tange o milongi phala o minzangala mu kijimbuete jw.org. Iú ua tange mu divulu dia Jisabhu 20:11, diambe: “Katé mona-ndenge a mu ijidila ku ima iê ia bhanga, se ia zele kiambote anga i iuka muene.” Kiebhi kiki kia mu kuatekesa? Samuuele ua tendela kuila o kutonginina o ilumba kiexile kima kiaiibha. Kindala muene uambe: “Nga tendela kuila o minzangala a kala ni ukexilu ua kutonginina mba ku ditoka o mesu, a kala ni ukexilu uaiibha u a bhangesa kukala dikaza dia iibha. Nga mateka kubanza se kiebhi ku hádia kaza diami kieji divua se u ngi mona kutonginina muhatu uengi. Kiki kia ngi bhangesa kumona kuila ki uexile ukexilu uambote. Né muene ki ki bhonzo ku ki bhanga, maji kima kiaiibha.” Samuuele ua lunguluka. O kulenga o mubhetu iú, kua mu bhangesa ue kulenga o ufusa.

Thonhi ua bhiti mu kiluezu kia bhonzo kia ufusa: Muene ua kexile ni ukexilu uaiibha ua kumona jifilme ja ufusa. Né muene, ua kazalele ni muhatu ua mu zolele kiavulu, kia mu bhonzele kiavulu kutula o kifua kia kutala jifilme ja ufusa. Muene uambe kuila o kuxinganeka mu mukanda 1 Phetele 5:8 ua mu kuatekesa kiavulu. Uambe: “Kalenu ku mesu azele, mu di lange! Kuma o nguma, Diabhu, ua di bhange, mukuâ ni hoji iala mu zuma, u nhunga jinga mu jimbandu jenu mu kusota uoso a mu dia.” Thonhi uambe: “o jifoto jilondekesa o ufusa jala mu ididi ioso ku mundu iú, jene ji tena kunangenena mu ilunji ietu. O velusu íii ia ngi kuatekesa kumona se o jitendasá jiji ja kexile mu tunda kua nanhi. Nga tokalele ku di lembalala kuila, jitendasá joso ji tunda kua Diabhu. Ngejiia kuila Jihova ngó u tena ku ngi kuatekesa ‘kukala mu mesu a zele ni ku dilanga’ phala ngi kale ni kitongoluelu ni muxima ua zele ni ukaza uambote.” Thonhi ua tambula o kikuatekesu kia bhindamene, mu kusuluka ua tena kueha o ukexilu uê uaiibha. Kiki kia mu kuatekesa kulenga o ibhidi.

Ni kidi kioso, o Bibidia i tu bhana itendelesu ia tokala i tena ku tu kuatekesa phala ki tu di te mu ibhidi. Ihi i tuamba ia lungu ni maka a bhonza kua batula? Tu mone kiebhi o Bibidia i tena ku tu kuatekesa kubatula o maka a bhonzo.

O itendelesu ia Bibidia i tena ku tu kuatekesa kulenga ibhidi iavulu