សព្វថ្ងៃនេះ តើវេជ្ជបណ្ឌិតមានទស្សនៈយ៉ាងណាចំពោះការបញ្ចូលឈាម?
អស់រាប់សិបឆ្នាំមកហើយ សាក្សីព្រះយេហូវ៉ាបានត្រូវរិះគន់ដោយសារពួកគេមិនព្រមទទួលការចាក់បញ្ចូលឈាម។ ពួកគេមិនព្រមទទួលការចាក់បញ្ចូលឈាម ដោយសារគម្ពីរណែនាំថាត្រូវ«ជៀសវាងពីឈាម»។ ក៏ប៉ុន្តែជួនកាលនេះនាំឲ្យពួកគេមានគោលជំហរដែលប្រទាំងគ្នានឹងទស្សនៈរបស់វេជ្ជបណ្ឌិត ដែលគិតថាការបញ្ចូលឈាមជាវិធីព្យាបាលដ៏ល្អសម្រាប់អ្នកជំងឺ។—សកម្មភាព ១៥:២៩
ក៏ប៉ុន្តែ ក្រុមវេជ្ជបណ្ឌិតដែលមានបទពិសោធន៍បានពិចារណាកាន់តែច្រើនអំពីមូលហេតុដែលការព្យាបាលដោយមិនចាក់បញ្ចូលឈាមមានប្រយោជន៍ក្នុងវិស័យការថែទាំសុខភាព។
ទស្សនាវដ្ដីមួយដែលចុះផ្សាយនៅឆ្នាំ២០១៣ មានសេចក្ដីរាយការណ៍ពិសេសមួយអំពីឈាម ដែលផ្នែកមួយមានចំណងជើងថា«ការប្រឆាំងចំពោះទម្លាប់មួយដែលមានជាទូទៅ ហេតុអ្វីវេជ្ជបណ្ឌិតកាន់តែតិចទៅៗព្យាបាលដោយចាក់បញ្ចូលឈាម?»(Stanford Medicine Magazine, a publication of the Stanford University School of Medicine)។ សារ៉ាវីល្លាមដែលជាអ្នកនិពន្ធអត្ថបទនេះ បានសរសេរថា៖«ក្នុងប៉ុន្មានទសវត្សរ៍មុន ក្រុមស្រាវជ្រាវដ៏ល្បីមួយបានបង្ហាញថា ក្នុងមន្ទីរពេទ្យនៅទូទាំងពិភពលោក ឈាមដែលបានត្រូវបរិច្ចាគបានត្រូវគេចាក់បញ្ចូលញឹកញាប់ជាងតម្រូវការ និងក្នុងចំនួនច្រើនជាងអ្វីដែលត្រូវការ ដើម្បីជួយព្យាបាលអ្នកជំងឺ មិនថាក្នុងបន្ទប់វះកាត់ឬក្នុងសាលអ្នកជំងឺក្ដី»។
នាងបានដកស្រងសម្ដីរបស់វេជ្ជបណ្ឌិតប៉ាទ្រីសាហ្វដ ដែលជាអ្នកស្រាវជ្រាវ និងជានាយកក្នុងមជ្ឈមណ្ឌលព្យាបាលនិងវះកាត់ដោយមិនប្រើឈាមនៃមន្ទីរពេទ្យប៉ិនស៊ីវ៉ានី។ វេជ្ជបណ្ឌិតហ្វដបានមានប្រសាសន៍ថា៖«អ្វីដែលគ្រូពេទ្យជាទូទៅបានត្រូវបង្រៀនគឺពិបាកនឹងលុបបំបាត់ណាស់ ពោលគឺទស្សនៈដែលថាមនុស្សនឹងត្រូវស្លាប់ បើពួកគេមិនមានឈាមតាមចំនួនកំណត់មួយ ពីព្រោះឈាមគឺជាដែលល្អបំផុតដើម្បីសង្គ្រោះជីវិត...។ គំនិតនេះគឺត្រឹមត្រូវក្នុងស្ថានភាពខ្លះ a ប៉ុន្តែ សម្រាប់អ្នកជំងឺភាគច្រើនមិនមែនដូច្នេះទេ»។
វេជ្ជបណ្ឌិតដែលបានព្យាបាលសាក្សីព្រះយេហូវ៉ាប្រហែលជា៧០០នាក់ជារៀងរាល់ឆ្នាំ ក៏បានបន្តថា៖«គ្រូពេទ្យជាច្រើនដែលខ្ញុំបាននិយាយជាមួយ...នឹងពួកគេបានយល់ច្រឡំថា អ្នកជំងឺជាច្រើននឹងមិនអាចរស់បានទេ បើមិនបញ្ចូលឈាម...សូម្បីតែខ្ញុំក៏ធ្លាប់គិតបែបនេះដែរ។ ប៉ុន្តែអ្វីដែលខ្ញុំរៀនម្ដងហើយម្ដងទៀតគឺថា អ្នកអាចព្យាបាលអ្នកជំងឺទាំងនេះ ដោយគ្រាន់តែប្រើវិធីព្យាបាលស្រួលៗខ្លះប៉ុណ្ណោះ»។
នៅខែសីហា ឆ្នាំ២០១២ សារព័ត៌មានមួយបានបោះពុម្ពផ្សាយអំពីលទ្ធផលសិក្សាអំពីអ្នកជំងឺវះកាត់បេះដូងក្នុងមជ្ឈមណ្ឌលមួយ ក្នុងអំឡុងរយៈពេល២៨ឆ្នាំ។ អ្នកជំងឺដែលជាសាក្សីព្រះយេហូវ៉ាឆាប់ជាសះស្បើយជាងអ្នកជំងឺឯទៀតដែលមានស្ថានភាពស្រដៀងគ្នា ដែលព្យាបាលដោយបញ្ចូលឈាម។ បើប្រៀបធៀបអ្នកជំងឺដែលជាសាក្សីព្រះយេហូវ៉ានិងអ្នកជំងឺដែលព្យាបាលដោយបញ្ចូលឈាម សាក្សីព្រះយេហូវ៉ាខ្លះដែលស្ថិតក្នុងសភាពធ្ងន់ធ្ងរ បានផុតពីគ្រោះថ្នាក់ភ្លាមៗក្រោយពីការវះកាត់ ហើយពួកគាត់រស់នៅដល់២០ឆ្នាំក្រោយមក(Archives of Internal Medicine)។
អត្ថបទមួយក្នុងសារព័ត៌មានដែលចុះថ្ងៃទី៨ ខែមេសា ឆ្នាំ២០១៣ បានសរសេរថា៖«ការវះកាត់ដោយមិនបញ្ចូលឈាម ដែលជាការវះកាត់ដោយមិនប្រើឈាមដែលគេបានបរិច្ចាគ បានត្រូវយកមកប្រើជាវិធីព្យាបាលអស់រាប់ឆ្នាំមកហើយចំពោះអ្នកជំងឺដែលមិនព្រមទទួលការចាក់បញ្ចូលឈាមដោយសារជំនឿសាសនារបស់ពួកគេ។ ឥឡូវខាងមន្ទីរពេទ្យទទួលស្គាល់ជំនឿនោះជាទូលំទូលាយ...គ្រូពេទ្យជំនាញផ្នែកវះកាត់ដែលជោគជ័យក្នុងការវះកាត់ដោយមិនបញ្ចូលឈាមនិយាយថា ការមិនបញ្ចូលឈាមមិនគ្រាន់តែជួយកាត់បន្ថយចំណាយទៅលើការទិញ ទុកដាក់ ថែរក្សា ធ្វើតេស្ត និងការចាក់បញ្ចូលឈាមប៉ុណ្ណោះទេ តែវិធីសាស្ត្រនេះក៏កាត់បន្ថយការឆ្លងមេរោគនិងផលវិបាកផ្សេងៗដែលអាចនាំឲ្យអ្នកជំងឺត្រូវព្យាបាលនៅមន្ទីរពេទ្យយូរជាង»។
ដូច្នេះហើយ មិនគួរឲ្យភ្ញាក់ផ្អើលទេ ដែលវេជ្ជបណ្ឌិតរ៉ូបឺត ឡូរេន ជាប្រធានផ្នែកផ្គត់ផ្គង់ឈាមក្នុងមន្ទីរពេទ្យក្លេវឺលេន បាននិយាយថា៖«ពេលអ្នកបញ្ចូលឈាមឲ្យអ្នកជំងឺ អ្នកមានអារម្មណ៍ភ្លាមៗថា អ្នកកំពុងជួយពួកគេ...ប៉ុន្តែផលប៉ះពាល់ក្នុងរយៈពេលយូរគឺផ្ទុយពីអ្វីដែលយើងរំពឹងទុក»។
a ដើម្បីរៀនអំពីទស្សនៈរបស់សាក្សីព្រះយេហូវ៉ាចំពោះឈាម សូមមើលអត្ថបទ«សំណួរដែលមនុស្សជាច្រើនសួរ ហេតុអ្វីអ្នកមិនបញ្ចូលឈាម?»។