ការស្វែងរកសេចក្ដីពិត
ការស្គាល់ការពិតអាចជួយសង្គ្រោះជីវិតយើង។ ជាឧទាហរណ៍ សូមពិចារណាចម្លើយចំពោះសំណួរដែលមានឥទ្ធិពលទៅលើជីវិតរបស់យើង៖ តើជំងឺរាតត្បាតអាចឆ្លងយ៉ាងដូចម្ដេច?
អស់រយៈពេលរាប់ពាន់ឆ្នាំ គ្មានអ្នកណាដឹងចម្លើយចំពោះសំណួរនោះទេ ដំណាលគ្នានោះដែររោគរាតត្បាតបានបណ្ដាលឲ្យមនុស្សរាប់លាននាក់ស្លាប់។ នៅទីបំផុត ពួកអ្នកវិទ្យាសាស្ត្របានដឹងចម្លើយ។ ពួកគេរកឃើញថាជំងឺច្រើនតែបង្កដោយមេរោគ គឺមីក្រូសារពាង្គកាយ ដូចជាបាក់តេរីនិងវីរុសជាដើម។ ការរកឃើញការពិតតែមួយនោះបានជួយមនុស្សឲ្យបង្ការ និងព្យាបាលជំងឺជាច្រើន នេះបានជួយមនុស្សរាប់ពាន់លាននាក់ឲ្យមានសុខភាពល្អជាងនិងរស់នៅយូរជាង។
ចុះយ៉ាងណាចំពោះសំណួរសំខាន់ៗឯទៀត? តើអ្នកគិតថាការដឹងចម្លើយចំពោះសំណួរតទៅនេះនឹងមានឥទ្ធិពលយ៉ាងណាលើអ្នក?
-
តើព្រះជាអ្នកណា?
-
តើលោកយេស៊ូគ្រិស្តជាអ្នកណា?
-
តើរាជាណាចក្រព្រះគឺជាអ្វី?
-
តើថ្ងៃអនាគតនឹងទៅជាយ៉ាងណា?
មនុស្សរាប់លាននាក់បានរកឃើញចម្លើយចំពោះសំណួរទាំងនោះ ហើយនេះបានជួយពួកគេឲ្យមានជីវិតប្រសើរជាង។ អ្នកក៏អាចទទួលប្រយោជន៍ពីចម្លើយនោះដែរ។
តើអ្នកអាចរកឃើញសេចក្ដីពិតបានទេ?
អ្នកប្រហែលឆ្ងល់ថា ‹តើអាចរកសេចក្ដីពិតអំពីអ្វីមួយយ៉ាងដូចម្ដេច?›។ តាមមើលទៅ ការរកសេចក្ដីពិតអំពីអ្វីៗជាច្រើនគឺកាន់តែពិបាក។ ហេតុអ្វី?
មនុស្សជាច្រើនមិនទុកចិត្តរដ្ឋាភិបាល ក្រុមហ៊ុនពាណិជ្ជកម្មឬប្រព័ន្ធផ្សាយព័ត៌មាន ស្ដីអំពីសេចក្ដីពិតទេ។ ពួកគេពិបាកដឹងថាអ្នកឯទៀតនិយាយការពិត ឬប្រាប់មតិ លាក់ព័ត៌មានខ្លះឬក៏កុហកយ៉ាងណានោះទេ។ ដោយសារមនុស្សមិនទុកចិត្តគ្នាទៅវិញទៅមក ហើយមានព័ត៌មានមិនត្រឹមត្រូវជាច្រើន នោះពួកគេមិនឯកភាពគ្នាស្ដីអំពីអ្វីជាការពិត សូម្បីតែការពិតនោះមានឥទ្ធិពលយ៉ាងណាទៅលើពួកគេក៏ដោយ។
ទោះជាមានការពិបាកបែបនេះក៏ដោយ អ្នកនៅតែអាចរកឃើញចម្លើយពិតចំពោះសំណួរសំខាន់ៗក្នុងជីវិត។ តើតាមរបៀបណា? ដោយធ្វើអ្វីមួយចំនួនដែលជួយអ្នកឲ្យដឹងចម្លើយចំពោះសំណួរឯទៀតក្នុងជីវិតប្រចាំថ្ងៃ។
ការស្វែងរករបស់អ្នកចំពោះសេចក្ដីពិត
អ្នកព្យាយាមស្វែងរកសេចក្ដីពិតអំពីរឿងផ្សេងៗក្នុងជីវិតប្រចាំថ្ងៃ។ សូមពិចារណាអំពីស្ថានភាពរបស់ជេស៊ីកា។ គាត់និយាយថា៖ «កូនស្រីខ្ញុំមានប្រតិកម្មនឹងសណ្ដែកដីខ្លាំងដល់ម្ល៉េះ ដែលប្រូតេអ៊ីនសណ្ដែកដីតូចបំផុតអាចបណ្ដាលឲ្យគាត់ស្លាប់»។ ជេស៊ីកាត្រូវដឹងថាអាហារដែលគាត់ទិញនឹងមិននាំឲ្យមានប្រតិកម្មដល់កូនស្រីរបស់គាត់។ គាត់បន្ថែមថា៖ «មុនបង្អស់ខ្ញុំឆែកមើលគ្រឿងផ្សំនៅលើកញ្ចប់អាហារ។ ក្រោយមក ខ្ញុំស្រាវជ្រាវបន្ថែម ហើយក៏ទាក់ទងក្រុមហ៊ុនដែលផលិតអាហារនោះដើម្បីបញ្ជាក់ថាមិនមានប្រូតេអ៊ីនរបស់សណ្ដែកដីខ្លះដែលលាយចូលជាមួយអាហារដោយចៃដន្យនៅឯរោងចក្រ។ ខ្ញុំក៏ពិចារណាប្រភពព័ត៌មានឯទៀតដែលគួរឲ្យទុកចិត្ត ដើម្បីខ្ញុំអាចជឿជាក់ថាក្រុមហ៊ុននោះរៀបចំអាហារតាមរបៀបត្រឹមត្រូវ»។
សំណួរដែលអ្នកព្យាយាមរកចម្លើយក្នុងជីវិតប្រចាំថ្ងៃរបស់អ្នកប្រហែលជាមិនសំខាន់ចាំបាច់ដូចជេស៊ីកាទេ តែដូចជេស៊ីកា អ្នកអាចប្រើវិធីដូចតទៅដើម្បីរកចម្លើយចំពោះសំណួរដែលអ្នកមាន៖
-
ស្វែងរកព័ត៌មានពិត។
-
ធ្វើការស្រាវជ្រាវបន្ថែម។
-
ធ្វើឲ្យប្រាកដថាប្រភពព័ត៌មានគឺគួរឲ្យទុកចិត្ត។
វិធីដដែលនេះអាចជួយអ្នករកឃើញចម្លើយពិតចំពោះសំណួរសំខាន់ៗក្នុងជីវិត។ តើតាមរបៀបណា?
សៀវភៅពិសេសនៃសេចក្ដីពិត
ពេលស្វែងរកសេចក្ដីពិតក្នុងគម្ពីរ ជេស៊ីកាបានប្រើវិធីស្រដៀងគ្នានឹងវិធីដែលគាត់ប្រើពេលរកព័ត៌មានអំពីប្រតិកម្មនឹងអាហាររបស់កូនស្រីគាត់។ គាត់និយាយថា៖ «ការអានដោយយកចិត្តទុកដាក់ និងព្យាយាមស្រាវជ្រាវបានជួយខ្ញុំរកឃើញសេចក្ដីពិតក្នុងគម្ពីរ»។ ដូចជេស៊ីកា មនុស្សរាប់លាននាក់បានរៀនអ្វីដែលគម្ពីរបង្រៀនអំពីសំណួរទាំងនេះ៖
-
ហេតុអ្វីយើងមានជីវិត?
-
តើមានអ្វីកើតឡើងពេលយើងស្លាប់?
-
ហេតុអ្វីមានទុក្ខវេទនា?
-
តើព្រះកំពុងធ្វើអ្វីដើម្បីបំបាត់ចោលទុក្ខវេទនាទាំងអស់?
-
តើយើងអាចមានសុភមង្គលក្នុងក្រុមគ្រួសារយ៉ាងដូចម្ដេច?
អ្នកអាចរកឃើញចម្លើយពិតចំពោះសំណួរទាំងនេះនិងសំណួរឯទៀតដោយអានគម្ពីរនិងស្រាវជ្រាវបន្ថែមតាមគេហទំព័រwww.jw.org/km ។