NALUNNGERIIKKATTUT ullumikkut inuit utoqqalisarput napparsimalersarlutillu naggataatigullu toqullutik. Aamma meeqqat ilaat toqusarput. Toqunissarput annilaangagissavarput? Toqusimasullu ersigissavavut? — Nalunngiliuk toqugutta qanoq pisoqassasoq? —

Ullumikkut inoqanngilaq toqusunit makissimasunik toqungalluni qanoq innersoq oqaluttuussisinnaasunik. Ajoqersuisorsuarli, Jiisusi, nunami inuugallarmat anguteqarpoq toqusunit makissimasumik. Angut taanna pillugu atuarutta paasisaqarsinnaavugut toqusoqaraangat qanoq pisoqartarnersoq. Angut Jiisusip ikinngutaasa ilagaat illoqarfeeqqamilu Betaniami, Jerusalemip eqqaaniittumi, najugaqarpoq. Lazarusimik ateqarpoq marlunnillu arnanik qatannguteqarluni Marthamik Mariamillu ateqartunik. Tusassavat Biibilimi Lazarusi qanoq eqqartorneqarnersoq.

Ullut ilaanni napparsimasorujussuanngorpoq. Tamatuma nalaani Jiisusi ungasissumiippoq. Marthap Mariallu Jiisusi qatanngummik Lazarusip napparsimalerneranik nalunaarfigiartortippaat. Nalunngilaammi Jiisusip ajorunnaarsissinnaagaa. Jiisusi nakorsaanngikkaluarpoq, Guutimmi nappaatinik assigiinngitsunik ajorunnaarsitsisinnaanermut pissaaneqartippaa. — Matthæusi 15:30, 31.

Jiisusili suli apuutinngitsoq Lazarusi napparsimangaarami toquvoq. Jiisusi ajoqersukkaminut oqarpoq Lazarusi sinittoq, itersariartussanerarpaalu. Ajoqersukkat paasinngilaat Jiisusi qanoq isumaqarnersoq. Taava Jiisusi toqqaannartumik oqarpoq: “Lazarusi toquvoq.”  Toqu pillugu qanoq paasisaqarpugut? — Paasivarput toqu itisuumik sininnertut ittoq. Itisuumik sininneruvoq ima ititigaaq allaat sinnattornarnani.

Jiisusip Martha Marialu ornippai. Lazarusip ilaqutaasa ikinnguterpassui takkutereersimapput. Aggerput qatanngutigiit qatanngumminnik toqusoorsimasut tuppallersariartorlugit. Marthap tusaramiuk Jiisusi aggersoq anivoq parsiarlugu. Erniinnaq Maria malinnaavoq. Isumatsassimagami qiavoq isigaasalu killingannut pallorluni. Allat aamma malinnipput; taakkuttaaq qiapput.

Sumut Lazarusi ilisimaneraat Ajoqersuisorsuup apeqqutigaa. Jiisusilu qaarusuup, Lazarusip toqungasup ilisaaffiata, eqqaanukkaappaat. Inuppassuit qissattut takugamigit qialerpoq. Nalunngilaa asasamik toqukkut annaasaqarluni qanoq ajortigisoq.

Qaarusuup saavanut ujarak ilineqarsimavoq. Jiisusilu oqarpoq: “Ujarak peersiuk!” Ilumut taamaaliussappat? — Marthap tamanna isumaqatiginngilaa. Ima oqarpoq: “Naalagaq, tippareerpoq, ilivermiilluni ullut sisammeramigit.”

Jiisusilli ima oqarfigaa: “Oqarfigisimannginnerpagit upperuit Guutip naalannassusia takussagit?” Jiisusip Marthap Guutip naalannaatissaanik takusaqarnissaa pivaa. Jiisusi maanna qanoq iliorniarami? Ujarak peerneqarpoq, Jiisusilu Jehovamut qinuvoq. Taava nipituumik oqarpoq: “Lazarusi, maanga anigit!” Ilumut Lazarusi makilluni anillassava? —

Aperilaassavakkit: Inuk sinittoq itersarsinnaaviuk? — Aap, nipituumik suaartaruit ajornassanngilaq. Toqungasorli itersarsinnaaviuk? — Naamik, taamaaliorsinnaanngilatit. Qanorluunniit suaartartigigaluaruit toqungasup tusarsinnaanngilaatit. Illit uangaluunniit allalluunniit silarsuarmi ullumikkut toqusimasoq uummartissinnaanngilaa.

 Jiisusimulli allaavoq. Guutimit pissaanermik immikkut ittumik tunineqarsimavoq. Lazarusi suaaramiuk tupinnartumik pisoqarpoq. Angut ulluni sisamani toqungasimagaluartoq makippoq ilivermiillu anilluni! Uummaqqippoq! Anersaartorsinnaavoq, pisussinnaavoq oqalussinnaallunilu! Jiisusip Lazarusi toqusunit makitippaa. — Johannesi 11:1-44.

Uku apeqqutit tulliuttut eqqarsaatigisinnaavatit: Lazarusi toqummat qanoq pisoqarpa? Ersinngitsumik timaaniittoqarpa — tarnermik imaluunniit anersaamik — timaanit avissaartumik allamilu inuusumik? Lazarusi tarneqarpa qilaliartumik? Ulluni sisamani Guuti inngilillu ilagalugit qilammiippa? —

Naamik, taamaanngilaq. Eqqaamajuk Jiisusi oqarmat Lazarusi sinittoq. Itisuumik sinikkaanni qanoq pisoqarnera ilisimaneqarneq ajorpoq, ilaa? — Iteraannilu qanoq sivisutigisumik sinissimalluni naluneqartarpoq aatsaallu nalunaaqutaq qiviaraanni paasineqartarluni.

 Toqusimasut aamma taamaapput. Toqusimasut sunnguamilluunniit ilisimasaqanngillat. Sunnguamilluunniit misigisaqanngillat, sumilluunniillu iliuuseqarsinnaanngillat. Taamaappoq Lazarusi toqungammat. Toqu tassa soorlu sinik itisooq, sunnguamilluunniit eqqaamasaqanngiffiusoq. Biibilimi allassimavoq: ‘Toqungasut sunnguamilluunniit ilisimasaqanngillat.’ — Oqaluussisartup oqaasii 9:5, 10.

Aamma ima aperisinnaavugut: Lazarusi ulluni sisamani qilammiissimagaluaruni arlaannut oqaluttuarisimassanngikkaluarnerpaa? — Qilammilu nuannisarsimagaluarpat Jiisusip nunamut utertissimassanerpaa? — Soorunami naamik!

Inuppassuit oqartarput tarneqartugut, tarnerlu timip toqunerata kingorna inuuginnartartoq. Oqarput Lazarusip tarnaa allami inuusoq. Biibilimili taama allassimasoqanngilaq. Allassimavoq Guutip inuk siulleq pinngortikkaa, “tassa Adami, tarninngorpoq uumassuseqartoq”. Adami tarniuvoq. Biibilimi aamma allassimavoq Adami ajortuliornermi kingorna toqusoq. Toqugami tassaalerpoq tarneq toqungasoq. Adami issumut sananeqaatiminut uterpoq. Biibilimi aamma allassimavoq Adamip kinguaavisa tamarmik ajorti toqulu kingornukkaat. — 1 Mosesi 2:7; 3:17-19; Romamiut 5:12; 1 Korinthimiut 15:45.

 Tassa paasivarput inuk tarneqanngitsoq, kisiannili tarniusoq. Inuit toqugaangata ersinngitsoqanngilaq timimik qimatsisartumik. Tamattalu inummit siullermit Adamimit ajorti kingornukkatsigu Biibilimi allaatigineqarpoq ‘inuk [imaluunniit “tarneq”, NV] ajortuliortoq taanna toqussasoq’. — Ezekieli 18:4.

Inuit ilaasa toqusut ersigisarpaat. Iliveqarfik saneqqutissallugu quilertagisarpaat isumaqaramik toqusut tarneqaramik ilivermit makillutik ajoqusersinnaagaatik. Toqusulli inunnik ajoqusiisinnaappat? Iliuuseqarsinnaappat? — Naamik.

Inuit ilaat isumaqarput toqusimasut aliortugaallutik inunnut takutissinnaasut. Aamma inoqarpoq toqusimasut nerisassaannik sassaalliisartunik. Inuilli taamaaliortartut takutippaat Jehovap toqusimasut pillugit oqaasii upperinagit. Oqaasii upperigutsigik toqusimasut ersigissanngilavut. Jehovallu inuuneq tunissutaa qujamasuutigigutsigu iluarisaanik iliornitsigut qujamasunnerput takutissavarput.

Immaqa maanna ima eqqarsarputit: ‘Meeqqat toquppata taava Jehovap uummarteqqissavai? Ilumut taamaaliornissani kissaatigaa?’ Kapitalip tulliani tamanna eqqartussavarput.