Imarisai

Imarisai

 KAPITALI 28

Kikkut naalattariaqarlugit qanoq paasisinnaavarput?

Kikkut naalattariaqarlugit qanoq paasisinnaavarput?

ILAANNIKKUT nalunarsinnaasarpoq kina naalanneqartariaqarnersoq. Ataatavit anaanavillu immaqa oqarfigaatsit arlaannik ilioqqullutit. Ilinniartitsisorli imaluunniit alla allaanerusunik ilioqqusivoq. Taama pisoqarpat, taava kina naalassaviuk? —

Atuakkami matumani kapitali 7-imi Biibilimi Efesosimiut 6:1-3-mi atuarparput. Tassani allaqqavoq meeqqat angajoqqaatik naalassagaat. Ima allassimavoq: “Qitornaasusi, angajoqqaasi naalassigit Naalakkami.” Naalakkami” qanormita isumaqarpa? — Oqaaseq “Naalakkami” isumaqarpoq angajoqqaat Guutip inatsisai malillugit qitornaminnik perorsaassasut.

Kisianni inersimasut amerlanerit Jehova upperinngilaat. Inersimasormi oqarpat atuarfimmi misilitsinnermi peqqusersusaarsinnaasutit imaluunniit pisiniarfimmi tillissinnaasutit? Inersimasoq oqarpat taamaaliussasutit peqqusersusaarsinnaatitaavit tillissinnaatitaavilluunniit? —

Eqqaamajuk kunngi Nebukadnesari oqarmat inuit tamarmik inuusaliarsuaq kuultiusoq sanatitani pallorfigissagaat. Shadrakilli, Meshakip Abed-Negollu pallorfigiumanngilaat. Sooq taamaaliorumanngillat? — Biibilimi allassimammat Jehova kisimi pallorfigineqassasoq. — 2 Mosesi 20:3; Matthæusi 4:10.

Petrusip Kajfasi qanoq oqarfigaa?

Jiisusip toqunerata kingorna apustilit juutit upperisarsiornikkut eqqartuussiviisa pingaarnersaannut sassartinneqarput; Killisiuisoqatigiinnik taasarpaat. Tassani palasiuneq Kajfasi ima oqarpoq:  ‘Erseqqivissumik inerteraluarpassi Jiisusi pillugu ajoqersueqqunasi, taamaattorli Jerusalemi ajoqersuutissinnik tamakkerparsi!’ Sooq apustilit Killisiuisoqatigiit naalanngilaat? — Petrusip apustilit sinnerlugit Kajfasi ima akivaa: “Guuti inunnit naalattariaqarneruvoq.” — Apustilit Suliaat 5:27-29.

Taamanikkut upperisarsiornikkut siuttut pissaaneqartorujussuupput. Nunali tamarmi Romamiunit naalakkersorneqarpoq. Naalakkersuisut taakku qullersaat kaasarimik taaneqartarpoq. Juutit kaasarimit aqunneqarnertik nuannarinngilaat Romamiut naalakkersuisuisa ajunngitsuliorfigisaraluaraatik. Aamma ullumikkut naalakkersuisut inuit pillugit ajunngitsorpassuarnik iliuuseqartarput. Suliaasa ilaannik eqqaasaqarsinnaavit? —

Naalakkersuisut aqqusinniortoqarnissaa, politiinit qatserisartunillu ikiorneqarnissarput illersorneqarnissarpullu isumagisarpaat. Isumagaattaarlu atuarfeqarnissat ilinniartitaanissallu napparsimalissagaluaruttalu nakorsiarsinnaanissarput. Soorunami tamanna akisoorujussuuvoq. Nalunngiliuk naalakkersuisut aningaasat sumit pisarneraat? — Inunnit pisarpaat. Aningaasat naalakkersuisunut akiliutit akileraarutinik taaneqartarput.

 Taamanikkut Ajoqersuisorsuaq nunami inuugallarmat juutit amerlasuut Romamiut naalakkersuisuinut akileraarumaneq ajorput. Ullut ilaanni palasit angutit ilaannut Jiisusi tamatumunnga tunngasumik aperitippaat, nakutikkumallugu. Ima aperaat: ‘Kaasarimut akileraartarnissarput pisariaqarpa?’ Jiisusi ima oqartuuppat: ‘Aap, akileraartassaasi,’ juuterpassuit tamanna nuannarissanngilaat. Jiisusili ima oqarsinnaanngilaq: ‘Naamik, akileraartariaqanngilasi.’ Tamannami eqqortuussanngikkaluarpoq.

Jiisusi qanoq akiva? Ima oqarpoq: ‘Aningaasamik nittaavigisinga.’ Angutillu aningaasamik tunivaat. Jiisusi ima aperivoq: ‘Kiaana assinga atialu uani aningaasamiittut?’ Ima akipput: “Kaasarip.” Taava Jiisusi ima oqarpoq: “Kaasari tunisiuk kaasarip piinik Guutilu Guutip piinik.” — Lukasi 20:19-26.

Jiisusi qanoq akiva nakutitsiniartunit aperineqarami?

Tassa akissut akerlilerneqarsinnaanngitsoq. Kaasari inuit iluaqutissaannik isumassuippat eqqortuussaaq akiliiffigissallugu. Taamaaliortarput aningaasat sanatitai atorlugit. Taamatut Jiisusip takutippaa naalakkersuisunut akileraartarneq eqqortuliornerusoq.

 Sulili meeraagavit akileraarsinnaalinngilatit. Allamilli iliuuseqartussaavutit. Suusinnaava? — Naalakkersuisut inatsisiliaat naalattussaavatit. Biibilimi ima allassimavoq: ‘Naalakkersuisunut qullersarisannut naalatsigitigit.’ Naalakkersuisut nunamik aqutsisuupput. Guuti oqarpoq nunami inatsisaasut malissagivut. — Romamiut 13:1, 2.

Immaqa inatsiseqarpoq igitassat aqqusinermut iginneqassanngitsut. Inatsit taamaattoq naalanneqassava? — Aap, Guutip tamanna kissaatigaa. Politeeq naalanneqassava? — Aap, naalakkersuisut tamatsinnut sernissuisussatut atorfinitsitaraat. Politeeq naalakkaanni naalakkersuisut naalanneqartarput.

Aqqusinikkut ikaarniartillutit politeeq angallattunik nakkutilliisoq oqarpat “Utaqqiit”, taava qanoq iliussavit? — Imaassinnaavoq allat arpallutik ikaartut, kisianni illit qanoq iliussavit? — Utaqqissaatit, aamma kiserluinnarpit taamaalioraluaruit. Guuti oqarpoq naalassasutit.

Ullut ilaanni immaqa ineqarfissi eqqaani perulluliortoqarpoq, politiillu peqqusipput isersimaannassasusi aqqusinermukassanngitsusilu. Suaartarpaluttoqartoq tusaasinnaavat, susoqarnersoq anillutit alakkarusukkaluarpat. Alakkaassinnaavit? Tamanna ‘naalakkersuisunut qullersarisanut’ naalannerua? —

Nunatsinni naalakkersuisut aamma atuarfeqarnera ilinniartitsisoqarneralu isumagisarpaat. Isumaqarpit Guutip kissaatigigaa ilinniartitsisut naalassagitit? — Eqqarsaatigilaariaruk. Naalakkersuisut ilinniartitsisut ilinniartitsisussatut atorfinitsitaraat, soorlu politiit sernissuisussatut atorfinitsikkaat. Ilinniartitsisumut politiimulluunniit naalakkuit assigiinnarpaa naalakkersuisunut naalanneq.

Sooq politeeq naalassavarput?

Taavami ilinniartitsisup eqqunngitsumik iliuuseqaqquppatit, assersuutigalugu assilissamik taamaaqataanilluunniit pallorfiginneqquppatit?  — Taava hebræerit pingasut Nebukadnesarimit peqquneqaraluarlutik inuusaliarsuarmik pallorfiginnikkumanngitsut eqqarsaatigisinnaavatit. Eqqaamasinnaaviuk sooq taamaaliorumanngitsut? — Tassa Guutimut naalanngikkumannginnamik.

Oqaluttuarisaanermik ilisimatuup, Will Durantimik atillip, kristumiut siulliit ima allaaserisimavai: ‘Kaasari naalakkersuisutut qullersamittut isiginngilaat.’ Aap, kristumiut siulliit Jehovamut naalapput! Aamma uagut eqqaamasariaqarparput Guuti inuunitsinni pingaarnerpaatissagatsigu.

Naalakkersuisut naalattarpavut Guutip tamanna kissaatigimmagu. Guutilli peqqussutaanut akerliusumik peqqusippata, taava qanoq oqassaagut? — Apustilit palasiunermut oqarnerattut oqassaagut: “Guuti inunnit naalattariaqarneruvoq.” — Apustilit Suliaat 5:29.

Biibilimi ajoqersorneqarpugut nunami inatsisaasut ataqqissagivut. Allassimaffiit uku tulliuttut atuakkit: Matthæusi 5:41; Titusi 3:1; 1 Petrusi 2:12-14.