Imarisai

Imarisai

 KAPITALI 31

Kina uagutsinnik tuppallersaasinnaava?

Kina uagutsinnik tuppallersaasinnaava?

ILAANNIKKUT aliasuttarpit? Ilaannikkut kisimiittutut misigisarpit? — Ilaannikkut allat nuannarineraatsit eqqarsaatigisarpiuk? — Meeqqat ilaat taamaattarput. Guutili ima neriorsuivoq: “Puigussanngilakkit.” (Esaja 49:15) Tamanna eqqarsaatigalugu nuanneq, ilaa? — Jehovap ilumut asavaatigut!

Savaaraq tammartoq qanoq misigisoraajuk?

Biibilimik allattut ilaat ima oqarpoq: ‘Ataatama anaanamalu qimakkaluarpannga Jehovap ilasiarissavaanga.’ (Tussiaat 27:101990) Tamanna nalunagu tuppallernarpoq, ilaa? — Allaat Jehovap ima oqarfigaatigut: “Siooraqinak ilagigakkit . . . Nakussatsippakkit ikiorlutillu.” — Esaja 41:10.

Ilaannikkulli Saatanip uagutsinnik ajornartorsiortitsinera Jehovap akuerisarpaa. Allaat Saatanimit misilinneqarnissarput akueraa. Taamani Jiisusi Diaavulumit anniartitaangaarami Jehova ima torlorfigaa: “Guutiga, Guutiga! Sooq qimappinga?” (Matthæusi 27:46) Jiisusi anniangaaraluarluni nalunngilaa Jehovap asagaani. (Johannesi 10:17) Jiisusilli aamma nalunngilaa Guutip akuerigaa Saatanip Guutimut kiffartortunik misiliisarnera anniartitsisarneralu. Kapitalimi allami sammissavarput sooq Saatanip taamaaliornissaa Guutip akuerineraa.

Suli mikisuulluni annilaangalernissaq ajornannginnerusarpoq. Soorlu tammaraanni tammartajaaraanniluunniit. Illit taamatut misiginikuuit? — Annilaangalertarpit? — Meerarpassuit taamatut misigisaqartuugunik annilaangalissagaluarput. Ilaanni Ajoqersuisorsuaq tammaraluartumik oqaluttuarpoq. Oqaluttuami nukappiaraq niviarsiararluunniit pineqanngilaq. Savali pineqarluni.

 Savamut assersuunneqarsinnaavugut. Qanoq? Sava angisoorsuunngilaq nakuarsuunanilu. Nakkutigineqartariaqarlunilu sernissorneqartariaqarpoq. Savanillu paarsisoq taamaaliortussaavoq.

Jiisusip oqaluttuaani savanik paarsisoq 100-nik savaateqarpoq. Ataaserli tammarpoq. Immaqa qaqqajunnap illuatungaaniittoq takulaarusuppaa. Tassanngaannarli savanit allanit ungasilleriataarsimavoq. Takorloorsinnaaviuk savaaqqap kisimiinnini paasileramiuk qanoq misigisimassanersoq? —

Savanimmi paarsisoq qanoq iliussava paasileruniuk sava ataaseq tammarsimasoq? Oqassava savaaraq nammineq pisuusoq, namminiiginnartariaqartorlu? Imaluunniit savat allat 99-it isumannaatsumut piseriarlugit sava taanna ataaseq ujassavaa? Isumaqarpit sava ataaseq taama pisarissersuutigitigissagaa? — Illit savaasuuguit tammartoq savanik paarsisup ujarpatit nuannaarutigissagaluarpat, ilaa? —

Kina savanik paarsisutut savaatiminik annaassisutut ippa?

Savanik paarsisup savaatini tamaasa, aamma tammarsimasoq, asavai. Taamaattumik aallarpoq ujariartorlugu. Nanivaalu! Takorlooriaruk savaaqqap savanik paarsisoq aggersoq takugamiuk qanoq nuannaartigisoq! Savanik paarsisoq  aamma nuannaarpoq sava nanigamiuk. Savanit allanit 99-init tammarsimanngitsunit nuannaarutigineruaa. Kinaasoraajuk savanik paarsisutut Jiisusip oqaluttuaatut ittoq? Kia taama asatigaatigut soorlu savanik paarsisup savaatini asagai? — Jiisusi oqarpoq Ataatami qilammiusup asagaatigut. Ataataalu tassaavoq Jehova.

Jehova Guuti innuttaminut paarsisuuvoq qutsinnerussaartoq. Kiffartortini tamaasa asavai, aamma ilittut ittut suli angisuunngorsimanngitsut. Arlaannattaluunniit ajoqusernissaa toqunissaaluunniit kissaatiginngilaa. Nuanneqaaq nalunagu Guutip taama asatigigaatigut! — Matthæusi 18:12-14.

Jehova ilinnut ima piviusuutigiva soorlu ataatat imaluunniit inuk alla?

Jehova Guuti upperaajuk? — Paasiviuk ilumut piviusuusoq? — Ilumoorpoq Jehova takusinnaanngikkipput. Takuneqarsinnaanngilaq. Biibilimi allassimavoq anersaajusoq. Ilumulli kinaassusiliuvoq, takusinnaavaatigullu. Ikiortariaqaraangatta naluneq ajorpaa. Qinunikkut oqaloqatigisinnaavarput, soorluttaaq inuk maani nunarsuarmiittoq oqaloqatigisinnaagipput. Jehovap allaat taamaaliornissarput kissaatigaa.

 Kisimiittutut misigissagaluaruit nikallungallutilluunniit taava qanoq iliussavit? — Jehova oqaloqatigissavat. Qanilliuk, taava tuppallersassavaatit ikiorlutillu. Eqqaamajullu Jehovap asammatit, aamma kisimiittutut misigigaluaruit. Biibilimi takoriartigu. Uani Tussiaat 23-mi versi 1-imiit ima allassimavoq: “[Jehova] paarsisigaara, sumik ajorsaateqanngilanga. Uninngaartittaraanga narsani qorsuusuni, tasissersuuttaraanga imermut eqqissisimanartumut.”

Takoriaruk versi 4-mi qanoq allassimasoq: “Ingerlagaluarumaluunniit qooqqukkut toqup taartitaatigut siooragisaqanngilanga najoramma, ungoorissutit ajaappissallu tuppallersaatigigakkit.” Aap, Jehova Guutigalugu taamatut misiginarpoq. Navianartorsiortilluni ajornartorsiuteqartilluniluunniit tuppallernarpoq. Illittaaq taamatut misigivit? —

Soorlu savanik paarsisup asannittup savaatini paarisarai, taamatut Jehovap kiffani paarisarpai. Takutippai aqqut sorleq atussagaat, nuannaarlutillu malippaat. Naak eqqaminni navianartoqaraluartoq ersisariaqanngillat. Savanik paarsisoq ungoorissuteqarpoq ajaappiaqarlunilu; tamakkuninnga savat uumasunut ajoqusiisinnaasunut sernissortarpai. Biibilimi eqqartorneqarpoq Daavip inuusuttuugallarami savanik paarsitilluni qanoq løvimut nannumullu savaatini sernissorai. (1 Samueli 17:34-36) Guutillu innuttaasa nalunngilaat Jehovap  aamma sernissussagaatsik. Toqqissisimasinnaapput nalunnginnamikku Guutip ilagigaatik.

Navianartorsiorutta kia ikiorsinnaavaatigut savanik paarsisup savaatiminik sernissuineratut?

Aap, Jehovap ilumut savaatini asavai asannittumillu isumagalugit. Biibilimi ima allassimavoq: “Savaatini paarsisutut paarai, talerminik katersorpai.” — Esaja 40:11.

Nalunagu Jehova taamaattoq toqqissisimanarlunilu nuanneq, ilaa? — Savaataanut ilaarusuppit? — Eqqaamajuk savat paarsisimik nipaa naalattarmassuk. Qanittumik attaveqarfigisarpaat. Aamma illit Jehovamut tusarnaartarpit? — Qanittumik attaveqarfigaajuk? — Taamaakkuit annilaangasariaqanngisaannassaatit, Jehovammi najussavaatit.

Jehovap kiffartortini asannittumik isumassortarpai. Tamanna pillugu Biibilimi qanoq allassimasoqarnera paasiniarlugu atuariarta: Tussiaat 37:25; 55:23 aamma Lukasi 12:29-31.