Guutip naalagaaffianik takorruukkat piviusunngorput

„Ilissi eqqortumik iliussaasi [pruffiitit oqalunnerat] arajutsinaveersaarussiuk qullertut taartumi qaamasutut.“ — 2 PETRUSI 1:19.

1. Ullutsinni silarsuarmi qanoq assigiinngissuteqartoqarpa?

ULLUTSINNI silarsuarmi ajunaarnerit imaaginnavipput. Pinngortitami ajunaarnersuit silarsuarlu tamakkerlugu peqqarniisaarniarnerit ajornartorsiutit ingasatsikkaluttuinnarpasissut ilaannaraat. Silarsuarmi upperisarsiornerit assigiinngitsut ajornartorsiutit aaqqissinnaasimanngilaat. Amerlanertigut ajornerulersitsiinnartarput avissaartuutaasumik paqumisunnermik, uumissuinermik inuiaassutsimillu pingaartitsinermik siuarsaanermikkut. Siulittuutigineqartutut ’inuiaat taarsuup matoorpai’. (Esaja 60:2) Taamaakkaluartorli inuit millionillit siunissamut isumalluarput. Sooq? Guutip oqaasia siulittuutaasoq „qullertut taartumi qaamasutut“ eqqumaffigigamikku. Guutip oqaasianit, Biibilimi tusarliussaanit, siulersortipput. — 2 Petrusi 1:19.

2. Danielip „naggatissap nalaa“ pillugu siulittuutaa naapertorlugu kikkut kisimik anersaakkut paasisimasaqalerpat?

² „Naggatissap nalaa“ pillugu pruffiiti Danieli ima allappoq: „Amerlasuut [Guutip oqaasia] misissoqqissaarumaarpaat, ilisimassullu annertusissaqaaq.“ (NV) Nangipporlu: „Amerlasuut minguiarneqarlutik, eqqiarneqarlutillu misilinneqassapput. Iluaatsulli iluaatsuussusertik attattuarumaarpaat paasisaqaratillu; paasisimasartuulli paasinnissapput.“ (Danieli 12:4, 10) Aap, Guutip oqaasianik ilumoorlutik eqiasuillutillu misissuisut, najoqqutassiai malillugit inuusut piumasaanillu iliorusuttut kisimik anersaakkut paasisimasaqarsinnaatitaapput. — Matthæusi 13:11-15; 1 Johannesi 5:20.

3. Biibilimik atuaqqissaartartut 1870-ikkunni pingaarutilik suna paasilerpaat?

³ 1870-ikkunniilli, ’ullussat kingulliit’ suli aallartinngitsut, Jehovap „Qilaap Naalagaaffiata anngigisai“ paasinarsisikkiartuaalerpai. (2 Timotheusi 3:1-5; Matthæusi 13:11) Taamanikkut isumaasup akerlerluinnaa Biibilimik atuaqqissaartartut paasilerpaat, tassa Kristusi tikiuteqqikkuni takussaassanngitsoq. Jiisusi qilammi issiavissaarsuarminut ingikkuni tikiuteqqissaaq, ima paasillugu nunarsuaq kunngitut soqutigileraa. Ajoqersugaasa nalunaaqut katitigaq takussaasoq iluaqutigalugu paasissavaat takussaanani najuutilereersoq. — Matthæusi 24:3-14.

 Takorruugaq piviusunngoraangat

4. Ullumikkut Jehovap kiffami uppernerat qanoq nakussatsittarpaa?

⁴ Qaqqami naalannarsisitaanermik takorruugaq Kristusip Guutip naalagaaffiani kunngitut naalannassusianik siulittuutaavoq asseqanngitsoq. (Matthæusi 17:1-9) Inuppassuit ilimagisatik Biibilimut naapertuutinngitsut Jiisusip piviusunngortinngimmagit taassuminnga malinnikkunnaarput, tamatumalu nalaani takorruugaq tamanna Petrusip, Jaakup Johannesillu uppernikkut nakussatsissutigaat. Ullumikkuttaaq Jehovap naggatissap nalaani kiffami uppernerat nakussatsittarpaa takorruukkap mianernangaartup tamatuma siulittuuterpassuillu tamatumunnga attuumassuteqartut eqquunnerannik paasinarsisitsinermigut. Misissoriartigu siulittuutit taakkua uppernitsinnut nakussatsissutaasut ilaat qanoq eqquussimanersut.

5. „Ulloriaq qaasiut“ kinaava, qanga qanorlu ’nuiva’?

⁵ Qaqqami naalannarsisitaanermik takorruugaq innersuussutigalugu apustili Petrusi ima allappoq: „Taamaattumik oqaaseq siulittuutaasoq uagutsinnut qularnaannerulerpoq; eqqortumik iliussaasi oqaaseq tamanna — qullertut taartumi qaamasutut ullulerserlugu qaasiullu nuilerserlugu — uummatissigut eqqumaffigigussiuk.“ (2 Petrusi 1:19, NV) Ulloriaq assersuutaasoq taanna, „ulloriaq qaasiut qaammarissoq“, tassaavoq Jiisusi Kristusi naalannarsisitaasoq. (Saqqummersitat 22:16) 1914-imi Guutip naalagaaffia qilammi erniummat ukiullu nutaat aallartimmata ’nuivoq’. (Saqqummersitat 11:15) Qaqqami naalannarsisitaanermik takorruukkami Mosesi Elialu Jiisusimik oqaloqateqartut saqqummerput. Taakku kikkunnut siumut assersuutaappat?

6, 7. Qaqqami naalannarsisitaanermik takorruukkami Mosesi Elialu kikkunnut assersuutaappat, pruffiitinullu assersuunneqartut pillugit paasissutissat pingaaruteqartut suut Biibilimi allassimappat?

⁶ Mosesi Elialu Kristusitut naalannassuseqarmata, nalunaajaasut aalajaatsut taakku marluk Jiisusip naalagaaffiani naalakkersueqataasussanut assersuutaasimassapput. Jiisusip naalakkersueqateqarnissaanik paasinnittaaseq pruffiiti Danielip Missiarsip issiavissaarsuarmiinneranik siulittuutaasumik takorruugaanut naapertuuppoq. Danielip „ittuinnartoq“, Jehova Guuti, ’inuup erneratut isikkoqartumut naalagaassusermik soraajuitsuusussamik’ tunniussisoq takuaa. Tamatuma kinguninngua Danielip takusai maluginiakkit. Ima allappoq: „Kunngiussuseq naalagaassuserlu pissaaneqassuserlu kunngeqarfiit qilaap ataaniittut tamarmik Qutsinnerussaartup innuttaanut illernartunut tunniunneqassapput.“ (Danieli 7:13, 14, 27) Aap, ’illernartut’ Kristusi kunngitut pissaaneqaqatigissagaat Guutip qulaarpaa qaqqami naalannarsisitaanermik takorruugaq ukiut 500-t sinnerlugit sioqqullugu.

⁷ Danielip takorruugaani illernartut kikkuuppat? Paulusip kikkuunerat qulaarpaa ima allalluni: „Anersaaq nammineq uagut anersaarput peqatigalugu nalunaajaavoq Guutip qitornarigaatigut. Qitornaaguttami kingornussisussaavuguttaaq, tassaalluta Guutip kingornussisussaatitai Kristusillu kingornussisussaaqatai; naallioqatigigatsigumi naalannarseqatigissavarputtaaq.“ (Romamiut 8:16, 17) Aap, illernartut tassaapput Jiisusip ajoqersugai tanitat. Saqqummersitat-ni Jiisusi ima oqarpoq: „Ajugaasoq uanga issiavissaarsuanni issiavissikkumaarpara soorlu uanga ajugaasimasunga ataatannilu issiavissillunga issiavissaarsuani.“ Ajugaasut toqusunit makititaasimasut taakku — katillutik 144.000-iusut — Jiisusi nunarsuarmut tamarmut naalakkersueqatigissavaat. — Saqqummersitat 3:21; 5:9, 10; 14:1, 3, 4; 1 Korinthimiut 15:53.

8. Jiisusip ajoqersugai tanitat qanoq Mosesitut Eliatullu kiffartorpat, tamannalu qanoq kinguneqarpa?

⁸ Sooq oqartoqarsinnaava Mosesi Elialu kristumiunut tanitanut assersuutaasut? Kristumiut taakku, suli nunami inuutillutik, Mosesip Eliallu suliarisimasaannut assingusumik suliaqaramik. Assersuutigalugu Jehova pillugu nalunaajaapput,  aamma malersorneqaraluarlutik. (Esaja 43:10; Apustilit Suliaat 8:1-8; Saqqummersitat 11:2-12) Mosesitut Eliatullu sapiillutik upperisarsiorneq eqqunngitsoq qulaarpaat ilumoorusuttut Guutimut tunniusimalluinnarnissaannik kajumissaajutigalugit. (2 Mosesi 32:19, 20; 5 Mosesi 4:22-24; 1 Kunngit 18:18-40) Suliaat inerititaqarpat? Aap, taamaalluinnarpoq! Tanitanik katersuinermik naammassinneqataanermik saniatigut, ’savat allat’ millionillit kajumillutik Jiisusi Kristusimut naalatsigitinnissaannut ikiorsimavaat. — Johannesi 10:16; Saqqummersitat 7:4.

Kristusi ajugaalluinnassaaq

9. Saqqummersitat 6:2 naapertorlugu ullumikkut Jiisusi suua?

⁹ Siutituup piaraanik qimusserunnaarluni, Jiisusi maanna kunngiuvoq pissarsuaq. Hestersutut allaatigineqarpoq, Biibilimilu hesti sorsunnermut assersuutaavoq. (Ussatit 21:31) Saqqummersitat 6:2-mi ima allassimavoq: „Takuaralu hesti qaqortoq, tassanilu hestersoq pisisseqarpoq. Taanna niaqoruserneqarpoq, aallarporlu ajugaajuarlunilu.“ Aammattaaq tussiaasiortoq Daavi Jiisusi eqqarsaatigalugu ima allappoq: „Kunngip tigumiaa pissaasutut pigisassat [Jehovap] isaakkumaarpaa Zionimit. Naalagaagit akeqqavit akornanni!“ — Tussiaat 110:2.

10. (a) Jiisusip ajugaalluni hestimik angalanera ataqqinaataasumik qanoq aallartippa? (b) Jiisusip ajugaanera siulleq silarsuarmut qanoq sunniuteqarpa?

¹⁰ Siullermik Jiisusip akeqqani pissaaneqarnerpaat, Saatani anersaapiluillu, ajugaaffigai. Qilammit peersillugit nunarsuup eqqaanut igippai. Piffissakillutik nalunnginnamikku anersaapiluit taakkua „nallisitsisitsinermikkut“ kamangaarnertik inunnut tutsippaat. „Nallisitsinerit“ taakku Saqqummersitat-ni hestersut allat pingasut hesterlutik angalanerattut allaaserineqarput. (Saqqummersitat 6:3-8; 12:7-12) ’Tikiunnissaminut silarsuullu naggatissaanut nalunaaqut’ pillugu siulittuummi Jiisusip siulittuutigaa hesterlutik angalanerat sorsunnermik, kaannersuarmik ’nappaammillu toqoraataasumik’ kinguneqassasoq. (Matthæusi 24:3, 7; Lukasi 21:7-11) Qularnanngitsumik „nallisitsinerit“ taakku Kristusip, Saatanimik peqatigiissortaanillu takussaasunik peersitsilluinnarnermigut, ajugaalluinnarnissaata tungaanut sakkortusiartussapput. * — Matthæusi 24:8.

11. Sooq oqartoqarsinnaava ilagiit kristumiut Kristusip kunngitut pissaaneqartitaaneranut oqartussaassuseqartitaaneranullu uppernarsaataasut?

¹¹ Jiisusip kunngitut pissaaneqartitaanera oqartussaassuseqartitaaneralu aamma erserpoq, ilagiit silarsuarmi tamarmi Guutip naalagaaffianik  oqaluussissutiginninnermik suliassartik naammassiniassammassuk, ilagiinnik kristumiunik atatitsiinnarneranit. Babylonersuaq (eqqunngitsumik upperisarsiornerup silarsuarmi tamarmi naalagaaffissua) naalakkersuisullu akeqqersimaartut peqqarniitsumik akerlilersuigaluartut oqaluussineq ingerlaannarpoq, oqaluttuarisaanermilu aatsaat taama oqaluussisoqartigaluni. (Saqqummersitat 17:5, 6) Kristusip kunnginngorneranik uppernarsaat kimittungaarami! — Tussiaat 110:3.

12. Sooq amerlanerpaat Kristusip takussaanani najuunnera paasinngilaat?

¹² Ajoraluartumik amerlanerpaat, ilaatigut kristumiuunerartut millionillit, piviusut takussaanngitsut nunami pisunut pingaarutilinnut tunuliaqutaasut paasinngilaat. Allaat inuppassuit Guutip naalagaaffianik oqaluussissutiginnittunik mitalliisarput. (2 Petrusi 3:3, 4) Sooq? Saatanip ’eqqarsaataat tappiillisikkamigit’. (2 Korinthimiut 4:3, 4) Ukiut hundredelippassuit matuma siornali kristumiuunerartut anersaakkut tappiillisippai allaallu Guutip naalagaaffianik neriuut naleqangaartoq taakkununnga neriuutigiunnaarsillugu.

Guutip naalagaaffianik neriuut qanoq neriuutigineqarunnaartoq

13. Anersaakkut taarmiuneq qanoq kinguneqarpa?

¹³ Jiisusip siulittuutigaa tunussisut, naasupilussatut qajuusiassat akornannut siaruarterneqartutut, ilagiinnut kristumiunut ilaliukkumaartut amerlasuullu tammartillugit. (Matthæusi 13:24-30, 36-43; Apustilit Suliaat 20:29-31; Judasi 4) Piffissap ingerlanerani kristumiuunerartut taakku guutimik nalusut nalliuttorsiutigisartagaasa, ileqqulersuutaasa ajoqersuutaasalu ilaat atulerpaat, allaallu kristumiussutsimut tunngasuunerarlugit. Assersuutigalugu juulli guutimik nalusut guutipiluinik Mithramik Saturnimillu pallorfiginninnermit aallaaveqarpoq. Inuit kristumiuunerartut kristumiuunngitsut nalliuttorsiutigisartagaat taakku sooq nalliuttorsiutigisalerpaat? The New Encyclopædia Britannica-mi (1974-imeersumi) ima allassimavoq: „Juulli, Jiisusip Kristusip inunngorneranik nalliuttorsiutiginninneq, Kristusip tikiutingajalerneranik ilimasupallaarunnaarnermut atatillugu pilersinneqarpoq.“

14. Guutip naalagaaffia pillugu sallusuissut Origenesip Augustinillu ajoqersuutiminni qanoq allanngortippaat?

¹⁴ Kristumiuunerartut aamma Guutip naalagaaffianik  paasinninneq allanngortippaat. Atuakkami The Kingdom of God in 20th-Century Interpretation-imi teologi Origenes 200-kkunninngaanneersoq ima allaaserineqarpoq: „Kristumiut oqaatsimik ’Naalagaaffik’-mik atuigaangamik isumagitittagaat Origenesip allanngortippaa, Guutip naalagaassusia inuup ilorpiaaniittunngortillugu, uummataaniittunngortillugu.“ Origenesip ajoqersuutini sumik tunngaveqartippaa? Biibilimik tunngaveqartinngilaa, ’filosofiimulli silarsuarlu pillugu isummamut tunngaviunerusunik Jiisusip kristumiullu isumaannit allaanerulluinnartumik’ tunngaveqartippaa. Atuakkami De Civitate Dei-mi (Guutip illoqarfia pillugu-mi) Augustinip Hippomeersup (354-430) ilagiit tassaanerarpai Guutip naalagaaffia. Isummat taakku assigisaallu Biibilimut naapertuutinngitsut teologiimut tunngasunik pissuteqarnerarlugit kristumiuunerartuni ilagiit politikkimi imminnut pissaaneqalersipput. Ukiunilu hundredelippassuarni politikkimi pissaaneqartarsimapput, sukannersuusarnerallu qaqutigoortuunngilaq. — Saqqummersitat 17:5, 18.

15. Nalitsinni kristumiuuneraqatigiit ilagiippassuinut tunngatillugu Galatiamiut 6:7 qanoq eqquuppa?

¹⁵ Ullumikkulli ilagiit taakku siaruartikkatik katersorpaat. (Galatiamiut 6:7) Taakku ilarpassui pissaaneerukkiartorlutillu ilaasortaarukkiartorput. Taamatut pisoqartarnera Europami malunnarneruvoq. Atuagassiaq Christianity Today naapertorlugu „Europami oqaluffissaarsuit pallorfiginnittarfittut [atorneqanngillat], katersugaasivittulli [atorneqarput] takornariaannarnit ornigarneqartartut“. Silarsuup ilaani allami aamma taamatut pisoqartalerpoq. Upperisarsiornermut eqqunngitsumut tamanna qanoq aarlerisaarutaava? Tapersersorneqannginnami ilaasortassaqannginnamilu nunguinnassava? Pallorfiginninnerlu ilumoortoq qanoq pineqassava?

Guutip ullussarsuanut piareersimagit

16. Babylonersuarmik uumissuigaluttuinnarneq sooq maluginiartariaqarpa?

¹⁶ Soorlu qaqqap innermik anitsisartup ukiorpassuarni anitsisimanngitsup pujuliulernera arsakuliulerneralu anitsingajalerneranut kalerrisaarutaasoq, taamatuttaaq nunarpassuarni upperisarsiornermut akeqqersimaarneq ingasatsikkaluttuinnartoq upperisarsiornerup eqqunngitsup suujunnaarsinneqangajalerneranut aarlerisaarutaavoq. Qanittukkut Jehovap silarsuarmi naalakkersuinikkut oqartussaasut anersaakkut ittumik arnamik atortittartumik Babylonersuarmik qulaarinissamut aseruinissamullu isumaqatigiilersissavai. (Saqqummersitat 17:15-17; 18:21) Kristumiut tamanna tamatumalu kingorna ’annikilliornartussarsuarmi’ pisussat siooragisariaqarpaat? (Matthæusi 24:21) Naamerluinnaq! Guuti ajortunut akuliuppat nuannaarnissaminnut pissutissaqassapput. (Saqqummersitat 18:20; 19:1, 2) Tamatumunnga tunngatillugu ukiuni hundredelinni siullerni Jerusalemi kristumiullu illoqarfimmi tassaniittut eqqarsaatigikkit.

17. Pissutsit aaqqissuussaanerata maanna atuuttup naggatissaa sooq Jehovap kiffaasa aalajaatsut isumalluarlutik qilanaarisinnaavaat?

¹⁷ Ukiumi 66-imi Romamiut sakkutuuisa Jerusalemi ungummassuk, kristumiut tupaallannatillu annilaanngillat. Guutip oqaasianik eqiasuillutik atuaqqissaartaramik nalunngilaat illoqarfiup „piuneerussaaffissaa qanillisoq“. (Lukasi 21:20) Aamma nalunngilaat isumannaatsumiilernissartik Guutip isumagiumaaraa. Guuti periarfissiimmat kristumiut qimaapput. (Danieli 9:26; Matthæusi 24:15-19; Lukasi 21:21) Ullumikkuttaaq Guutimik ilisarisimannittut taassumalu erneranut naalattut pissutsit aaqqissuussaanerata maanna atuuttup naggatissaa isumalluarlutik qilanaarisinnaavaat. (2 Thessalonikamiut 1:6-9) Aap, annikilliornartussarsuaq aallartippat nuannaarlutik ’nikuissapput niaqqutillu massitsillugit aniguisitaanissartik qanillimmat’. — Lukasi 21:28.

18. Gogip Jehovap kiffaanik saassussersuaarnera qanoq kinguneqassava?

¹⁸ Babylonersuaq suujunnaarsinneqarpat Saatani Gogitut Magogimeersutut Jehovap nalunaajaasuinut eqqissisimasunut saassussersuaartitsissaaq. Gogi ilerpassuilu ajugaariaannaasoralutik „nuissatut majortutut“ sassassapput. Tuparujussuassappulli! (Ezekieli 38:14-16, 18-23) Apustili Johannesi ima allappoq: „Takuara qilak ammasoq takuallu, tassaniippoq hesti qaqortoq, hestersorlu ateqarpoq: Ilumoortoq Sallusuitsorlu. . . . Qarnanit anillassimavoq pana ipittorsuaq inuiaqatigiinnut panartaatissaa.“ ’Kunngit Kunngiata’ ajugaaffigineqarsinnaanngitsup  Jehovamik pallorfiginnittut ilumoorfiginnittut annaatissavai taakkununngalu akeraasut tamaasa suujunnaarsillugit. (Saqqummersitat 19:11-21) Tamanna qaqqami naalannarsisitaanermik takorruukkap eqquunnerata nuannerseruttorfigissavaa alutornangaartoq.

19. Kristusip ajugaalluinnarnera killitsissutigalugu ajoqersugai ilumoorfiginnittut sussappat, maannakkullu aalajangersimallutik qanoq iliortariaqarpat?

¹⁹ Jiisusi ’ullormi issumani . . . uppertunngortut [uppertut, NV] tamarmik akornanni nersorneqassaaq’. (2 Thessalonikamiut 1:10) Guutip erneranik ajugaasumik mianerinnittut akornanneerusuppit? Taava uppernerit ineriartortittuaruk ’piareersimallutillu, Inuup Ernera tikiutissammat nalunaaquttap-akunnerani ilimasuffiginngisanni’. — Matthæusi 24:43, 44.

Aalakoornak

20. (a) „Kiffaq ilumoortoq silatoorlu“ qujamasuutigalugu qanoq ersersissinnaavarput? (b) Imminut qanoq aperisariaqarpugut?

²⁰ ’Kiffap ilumoortup silatuullu’ Guutip kiffai anersaakkut eqqumaniaqqullugit aalakooqqunagillu kajumissaartarpai. (Matthæusi 24:45, 46; 1 Thessalonikamiut 5:6) Piffissaasukkut eqqaasitsissutit qujamasuutigaagit? Pingaarnersiuininni sunniuteqarpat? Imminut ima aperigit: ’Anersaakkut ima tappitsigivunga Guutip ernera qilammi naalakkersuisoq takusinnaallugu? Babylonersuarmut Saatanillu aaqqissuussinerata sinneranut Guutip eqqartuussutaanik naammassinninnissaminut piareersimasutut isigaara?’

21. Ilaasa anersaakkut tappiilliartornerminnik akuersiinnarnerannut suna pissutaasinnaava, nangaanatillu suna iliuuserisariaqarpaat?

²¹ Jehovamut innuttaasut ilaasa anersaakkut tappiilliartornertik akueriinnarpaat. Jiisusip ajoqersugaasa siulliit ilaat assigalugit utaqqisinnaassuseqarpiannginnerat imaluunniit pinertusaarluarsinnaannginnerat pissutaanerluni? Inuunermi isumakuluutit, pigisalerituneq imaluunniit malersorneqarneq sunnertissutigisimavaat? (Matthæusi 13:3-8, 18-23; Lukasi 21:34-36) Imaassinnaavoq ilaasa paasissutissat aalajangersimasut ’kiffamit ilumoortumit silatuumillu’ pisut paasiuminaatsikkaat. Taakkua ilaat ilinnut tunngappata ilungersorluta kajumissaarpatsigit Guutip oqaasia kajumissuseqaqqilerlutit misissoqqullugu Jehovamullu nukittuumik qanittumillu attaveqaqqilernissat taassumunnga qamannga pisumik qinnutigeqqullugu. — 2 Petrusi 3:11-15.

22. Qaqqami naalannarsisitaanermik takorruukkap tamatuma siulittuutillu tamatumunnga attuumassuteqartut misissornerat qanoq sunnerneqaatigaajuk?

²² Jiisusip ajoqersugai qiimmassarneqartariaqarnerminni qaqqami naalannarsisitaanermik takorruuisinneqarput. Ullumikkut annerungaartut, tassa takorruukkap pissanganartup tamatuma siulittuuterpassuillu allat tamatumunnga attuumassuteqartut piviusunngornerat, nakussatsissutigaavut. Piviusut nuannersut siunissatsinnullu qanoq pingaaruteqarnersut eqqarsaatigigaangatsigit uaguttaaq pissutissaqarpugut qamannga pisumik Johannesitut ima oqarnissatsinnut: „Amen, aggerniarit Naalagaq Jiisusi!“ — Saqqummersitat 22:20.  (wE 1/15 05)

[Quppernerup ataani ilanngussaq]

Uku eqqaamavigit?

• 1870-ikkunni Biibilimik atuaqqissaartartut amerlanngitsut Kristusip tikiuteqqinnissaa pillugu suna paasivaat?

• Qaqqami naalannarsisitaanermik takorruugaq qanoq ililluni eqquuppa?

• Jiisusip ajugaalluni hestimik angalanera nunarsuarmut ilagiinnullu kristumiunut qanoq sunniuteqarpa?

• Jiisusip ajugaalluinnarnerani anigueqataassagutta qanoq iliortariaqarpugut?

[Atuaqqissaarnermi apeqqutit]

[Qupp. 29-mi assiliartat]

Takorruugaq piviusunngorpoq

[Qupp. 30-mi assiliartat]

Kristusip ajugaanerani siullermi qanoq pisoqarnersoq nalunngiliuk?