شومىلدىرۋ ٴراسىمى دەگەن نە؟
كيەلى كىتاپتىڭ جاۋابى
شومىلدىرۋ ٴراسىمى دەگەن — ادامنىڭ سۋعا تولىقتاي باتىرىلىپ، قايتىپ شىعارىلۋى a. وسىنى ەسكەرسەك، يسا پايعامباردىڭ شومىلدىرۋ راسىمىنەن نەگە وزەندە وتكەنىن تۇسىنۋگە بولادى (ماتاي 3:13، 16). باسقا ٴبىر مىسال: ەفيوپيالىق قىزمەتكەر سۋدىڭ ماڭىنان ٶتىپ بارا جاتقاندارىندا فىلىپتەن ٶزىن شومىلدىرۋ راسىمىنەن وتكىزۋدى سۇراعان (ەلشىلەردىڭ ىستەرى 8:36—40).
شومىلدىرۋ راسىمىنىڭ ٴمانى نەدە؟
كيەلى كىتاپتا شومىلدىرۋ ٴراسىمى ادامدى جەرلەۋمەن تەڭەلەدى (ريمدىكتەرگە 6:4؛ قولوستىقتارعا 2:12). بۇل ٴراسىم ادامنىڭ وتكەن ٶمىر سالتى ٷشىن ٶلىپ، قۇدايعا باعىشتالعان ٴماسىحشى رەتىندە جاڭا ٶمىر باستاۋىن بىلدىرەدى. شومىلدىرۋ ٴراسىمى مەن وعان دەيىنگى قادامداردىڭ ارقاسىندا يسا ٴماسىحتىڭ تولەم قۇرباندىعىنا سەنگەن ادام تازا ار-ۇجدانعا يە بولا الادى (پەتىردىڭ 1-حاتى 3:21). سوندىقتان يسا پايعامبار ونىڭ شاكىرتتەرى شومىلدىرۋ راسىمىنەن وتۋلەرى ٴتيىس ەكەنىن ايتقان (ماتاي 28:19، 20).
شومىلدىرۋ ٴراسىمى كۇنادان تازارتا ما؟
جوق. كيەلى كىتاپتىڭ ٸلىمى بويىنشا، كۇنادان تەك يسا ٴماسىح توگىلگەن قانى عانا تازارتا الادى (ريمدىكتەرگە 5:8، 9؛ جوحاننىڭ 1-حاتى 1:7). ٴبىراق بۇل قۇرباندىقتىڭ پايداسىن كورۋ ٷشىن، ادام يساعا سەنۋى، ٶمىرىن ونىڭ تالىمدەرىنە ساي وزگەرتۋى، سوسىن شومىلدىرۋ راسىمىنەن ٶتۋى كەرەك (ەلشىلەردىڭ ىستەرى 2:38؛ 3:19).
شومىلدىرۋ راسىمىنەن نارەستە كەزدە ٶتۋ كەرەك پە؟
جوق. كيەلى جازبالاردا مۇنداي ٸلىم جوق. كەيبىر شىركەۋلەردە نارەستەگە سۋ بۇركىپ نە باسىنا سۋ قۇيىپ، «شومىلدىرۋ ٴراسىمىن» جاسايدى دا، جاڭا ات قويادى. ٴبىراق شومىلدىرۋ راسىمىنەن ٶتۋشى قۇداي پاتشالىعى جايلى ىزگى حابارعا سەنىپ، ونى تۇسىنەتىندەي جاستا بولۋى كەرەك (ەلشىلەردىڭ ىستەرى 8:12). مىسالى، ول قۇداي ٴسوزىن ەستىپ، قابىلداپ، كۇنالارىنا وكىنۋى ٴتيىس، ال نارەستە مۇنىڭ ٴبارىن ىستەي المايدى (ەلشىلەردىڭ ىستەرى 2:22، 38، 41).
بۇعان قوسا، كيەلى كىتاپتا اتا-انالارى ادال بولعاندىقتان، قۇداي ولاردىڭ بالالارىن دا قاسيەتتى، يا تازا، دەپ قاراستىراتىنى جازىلعان (قورىنتتىقتارعا 1-حات 7:14). نارەستەلەردى شومىلدىرۋ راسىمىنەن وتكىزۋدىڭ ەرەكشە كۇشى بار بولسا، ولاردىڭ امان قالۋى اتا-انالارىنا بايلانىستى بولماس ەدى b.
شومىلدىرۋ ٴراسىمى جايلى جاڭساق پىكىرلەر
جاڭساق پىكىر: شومىلدىرۋ ٴراسىمىن جاساعاندا، ادامدى سۋعا تولىقتاي باتىرماي-اق، وعان سۋ بۇركۋگە نە قۇيۋعا بولادى.
شىندىق: كيەلى كىتاپتاعى شومىلدىرۋ ٴراسىمى تۋرالى وقيعالاردان ادامداردىڭ ٴبارى سۋعا تولىقتاي باتىرىلعانى كورىنەدى. مىسالى، ٴفىلىپ ەفيوپيالىق قىزمەتكەردى شومىلدىرۋ راسىمىنەن وتكىزگەندە، ولار سۋعا كىرىپ، سوسىن قايتىپ شىققان (ەلشىلەردىڭ ىستەرى 8:36—39). c
جاڭساق پىكىر: كيەلى كىتاپتاعى وقيعادان بۇكىل وتباسى شومىلدىرۋ راسىمىنەن وتكەندە، اراسىندا نارەستەلەردىڭ دە بولعانى بايقالادى. مىسالى، ٴفىلىپى قالاسىنداعى تۇرمە باستىعىنىڭ «بۇكىل ٷي ىشىمەن بىرگە شومىلدىرۋ راسىمىنەن وتكەنى» ايتىلعان (ەلشىلەردىڭ ىستەرى 16:31—34).
شىندىق: تۇرمە باستىعى تۋرالى وقيعادان شومىلدىرۋ راسىمىنەن وتكەندەردىڭ «ەحوبانىڭ ٴسوزىن» ٴتۇسىنىپ، «شات-شادىمان بولعانىن» كورەمىز (ەلشىلەردىڭ ىستەرى 16:32، 34). دەمەك، ونىڭ ٷي ىشىندەگى نارەستەلەر راسىمنەن وتپەگەن، سەبەبى ولار ٵلى ەحوبانىڭ ٴسوزىن تۇسىنەتىن جاستا ەمەس ەدى.
جاڭساق پىكىر: يسا ٴماسىح كوك پاتشالىعى بالالار ٷشىن دەگەندە نارەستەلەردىڭ شومىلدىرۋ ٴراسىمى جايلى ايتقان (ماتاي 19:13—15؛ مارقا 10:13—16).
شىندىق: يسا بۇل سوزدەردى شومىلدىرۋ ٴراسىمى ەمەس، قۇداي پاتشالىعى جايىندا تۇسىندىرگەندە ايتقان. ول پاتشالىققا كىرگىسى كەلەتىندەر بالالار سياقتى مومىن، ۇيرەنۋگە دايىن بولۋ كەرەك ەكەنىنە كوڭىل اۋدارعان (ماتاي 18:4؛ لۇقا 18:16، 17).
a «شومىلدىرۋ ٴراسىمى» دەپ اۋدارىلعان گرەك ٴسوزىنىڭ ٴتۇبىرى «باتىرۋ» دەگەندى بىلدىرەدى («Theological Dictionary of the New Testament»، 1-توم، 529-بەت).
b ٴبىر ەڭبەكتە جاڭا وسيەتتە «نارەستەلەردى شومىلدىرۋ راسىمىنەن وتكىزۋگە مەڭزەيتىن ەشتەڭە جوق» ەكەنى ايتىلعان. سونداي-اق وندا بۇل ٷردىستىڭ بەلەڭ الۋىنا شومىلدىرۋ راسىمىنەن ٶتۋ كۇنادان تازارتادى دەگەن جاڭساق ويدىڭ كەسىرىنەن وعان شەكتەن تىس ٴمان بەرىلەتىنى سەبەپ بولعانى تۇسىندىرىلگەن («The International Standard Bible Encyclopedia»، 1-توم، 416، 417-بەت.).
c «جاڭا كاتوليك ەنسيكلوپەدياسىنداعى» «شومىلدىرۋ ٴراسىمى» دەگەن تاقىرىپشادا: «العاشقى ماسىحشىلەر سۋعا باتىرىلۋ ارقىلى شومىلدىرۋ راسىمىنەن وتكەنگە ۇقسايدى»،— دەلىنگەن (2-توم، 59-بەت).