قورىنتتىقتارعا 1-حات 7:1—40
7 ال ەندى جازعان سۇراقتارىڭا توقتالايىن: ەركەكتىڭ ايەلگە جاقىنداماعانى* جاقسى،
2 ٴبىراق ازعىندىق* كەڭ تاراعاندىقتان، ٵر ەركەكتىڭ ٶز ايەلى+، ال ٵر ايەلدىڭ ٶز كۇيەۋى بولسىن+.
3 كۇيەۋى دە، ايەلى دە ٴبىر-ٴبىرىنىڭ الدىنداعى بورىشىن* اتقارسىن+.
4 ايەلدىڭ دەنەسى ٶزىنىڭ ەمەس، كۇيەۋىنىڭ بيلىگىندە. ٴدال سولاي كۇيەۋىنىڭ دەنەسى ٶزىنىڭ ەمەس، ايەلىنىڭ بيلىگىندە.
5 دۇعا ەتۋگە ٶزارا كەلىسىپ العان ۋاقىتتان باسقا كەزدەردە ٴبىر-بىرىڭنەن باس تارتپاڭدار. سودان كەيىن قايتادان بىرگە بولىڭدار، ايتپەسە وزدەرىڭە يە بولا الماي، شايتاننىڭ ازعىرۋىنا ٴتۇسىپ قالۋلارىڭ مۇمكىن.
6 بۇل ايتقاندارىم — بۇيرىق ەمەس، رۇقسات قانا.
7 الايدا ٴبارىنىڭ دە مەن سياقتى بولعانىن قالار ەدىم. ايتسە دە اركىمنىڭ قۇدايدان العان ٶز سيى بار+: بىرەۋى بىلاي بولسا، بىرەۋى ولاي.
8 ال سالتباستىلار مەن جەسىرلەرگە ايتارىم — ولاردىڭ مەن سياقتى بولىپ قالا بەرگەندەرى جاقسى+.
9 ٴبىراق وزدەرىنە يە بولا الماسا، نەكەگە تۇرسىن. سەبەبى قۇشتارلىق وتىنا كۇيىپ-جانعانشا، نەكەگە تۇرعاندارى دۇرىس+.
10 ال نەكەدە تۇرعاندارعا مەن، ٴتىپتى مەن ەمەس يەمىز، نۇسقاۋ بەرەدى: ايەل كۇيەۋىنەن كەتپەۋ كەرەك+.
11 ەگەر كەتەتىن بولسا، سالتباستى بولىپ قالسىن نەمەسە كۇيەۋىمەن قايتا تاتۋلاسسىن. كۇيەۋ دە ايەلىنەن كەتپەۋ كەرەك+.
12 باسقالارعا بولسا يەمىز ەمەس، مەن ايتامىن+، ەگەر باۋىرلاستىڭ ايەلى وزىمەن ٴبىر سەنىمدە بولماسا، ٴبىراق ونىمەن تۇرۋعا كەلىسسە، ايەلىن تاستاماسىن.
13 سول سياقتى، ايەل دە كۇيەۋى ٴبىر سەنىمدە بولماعانمەن، بىرگە تۇرۋعا كەلىسسە، ونى تاستاماسىن.
14 ويتكەنى سەنۋشى ەمەس كۇيەۋى ايەلى ارقىلى، ال سەنۋشى ەمەس ايەل سەنۋشى كۇيەۋى ارقىلى قاسيەتتى بولادى. ايتپەسە بالالارىڭ تازا بولماس ەدى، ال قازىر ولار قاسيەتتى.
15 ٴبىراق سەنۋشى ەمەس جۇبايى كەتۋدى شەشسە، كەتە بەرسىن. مۇنداي جاعدايدا باۋىرلاس ونىمەن قالۋعا مىندەتتى ەمەس. قۇداي سەندەردى تىنىشتىققا شاقىردى+.
16 ايەل، قايدان بىلەسىڭ، بالكىم، كۇيەۋىڭدى قۇتقارىپ قالارسىڭ+؟ ال سەن، كۇيەۋ، قايدان بىلەسىڭ، بالكىم، ايەلىڭدى قۇتقارىپ قالارسىڭ؟
17 ايتسە دە ەحوبا كىمگە قانداي ۇلەس بەرسە، كىمدى نەگە شاقىرسا، سوعان ساي ٶمىر كەشسىن+. قاۋىمداردىڭ بارىنە بەرەر نۇسقاۋىم — وسى.
18 كىم شاقىرىلعانعا دەيىن سۇندەتتەلگەن بولسا+، سول كۇيى قالا بەرسىن. ال كىم شاقىرىلعانعا دەيىن سۇندەتتەلمەگەن بولسا، سۇندەتتەلمەي-اق قويسىن+.
19 سۇندەتتەلۋ نە سۇندەتتەلمەۋ ماڭىزدى ەمەس+، ماڭىزدىسى — قۇدايدىڭ وسيەتتەرىن ورىنداۋ+.
20 شاقىرىلعاندا كىم قانداي بولسا، سول كۇيىندە قالا بەرسىن+.
21 شاقىرىلعاندا قۇل بولساڭ، مۇنى ۋايىمداما+. ال ەركىندىك الۋدىڭ مۇمكىندىگى تۋسا، ونى پايدالان.
22 ويتكەنى قۇل كەزىندە شاقىرىلعان يەمىزدىڭ شاكىرتى — ونىڭ مەنشىگىندەگى ەرىكتى ادام+. سول ىسپەتتى، شاقىرىلعاندا ەرىكتى بولعان ادام — ٴماسىحتىڭ قۇلى.
23 سەندەر قىمبات باعاعا ساتىپ الىندىڭدار+، بۇدان بىلاي ادامدارعا قۇل بولماڭدار.
24 باۋىرلاستار، شاقىرىلعاندا كىم قانداي بولسا، قۇداي الدىندا سول كۇيىندە قالا بەرسىن.
25 پاكتىگىن ساقتاپ جۇرگەندەرگە* قاتىستى يەمىز ماعان ەشقانداي بۇيرىق بەرگەن جوق. ٴبىراق ادال بولۋىم ٷشىن ول ماعان مەيىرىم تانىتتى، سوندىقتان ٶز ويىمدى ايتىپ وتىرمىن+.
26 مەنىڭشە، قازىرگى قيىندىقتاردى ەسكەرىپ، كىمنىڭ كۇيى قانداي بولسا، سول كۇيىندە قالا بەرگەنى جاقسى.
27 ايەلىڭ بار بولسا، ودان كەتۋدىڭ جولىن ىزدەمە+. ال جوق بولسا، وندا ايەل ىزدەمە.
28 ٴبىراق نەكەگە تۇرعانىڭ — كۇنا ەمەس. سونداي-اق پاكتىگىن ساقتاپ جۇرگەن ادام نەكەگە تۇرسا، ول دا كۇنا ەمەس. الايدا نەكەگە تۇرعاندار ومىرلەرىندە جاڭا قيىندىقتارعا كەزىگەدى*. ال مەن سەندەردى سودان ساقتاپ قالعىم كەلەدى.
29 ونىڭ ۇستىنە، باۋىرلاستارىم، سەندەرگە ايتارىم — ۋاقىت از قالدى+. ەندى ايەلى بارلار ۇيلەنبەگەندەي،
30 جىلاعاندار جىلاماعانداي، قۋانعاندار قۋانباعانداي، ساتىپ العاندار ساتىپ الماعانداي،
31 وسى دۇنيەنى پايدالاناتىندار ونى تولىق پايدالانبايتىندارداي بولسىن، سەبەبى بۇل دۇنيە* وزگەرۋدە.
32 مەن سەندەردىڭ ۋايىم-قايعىسىز جۇرگەندەرىڭدى قالايمىن. ۇيلەنبەگەن ادام يەمىزگە ۇنامدى بولۋعا تىرىسىپ، وعان قىزمەت ەتۋمەن بايلانىستى نارسەلەردى ويلايدى.
33 ال ۇيلەنگەن ادام ايەلىنە ۇناۋعا تىرىسىپ، وسى دۇنيەلىك نارسەلەردى ويلايدى+.
34 وسىلايشا ول ەكى ويلى بولادى. سونداي-اق سالتباستى ايەل مەن بويجەتكەن قىز ٴتانى دە، رۋحى دا قاسيەتتى بولۋ ٷشىن، يەمىزگە قىزمەت ەتۋمەن بايلانىستى نارسەلەردى ويلايدى+. ال تۇرمىستاعى ايەل كۇيەۋىنە ۇناۋعا تىرىسىپ، وسى دۇنيەلىك نارسەلەردى ويلايدى.
35 مۇنى شەكتەۋ قويايىن دەپ ەمەس، سەندەردىڭ يگىلىكتەرىڭ ٷشىن ٵرى سالتباستى كۇيلەرىڭدە قالىپ، ەشتەڭەگە الاڭداماي، ٵردايىم يەمىزگە بار جۇرەكتەرىڭمەن قىزمەت ەتۋگە تالپىندىرۋ ٷشىن ايتىپ وتىرمىن.
36 ال ەگەر الدەكىم قۇشتارلىق سەزىمىن جۇگەندەي المايتىنداي سەزىنسە، ٵرى البىرت شاقتان وتكەن بولسا، ٶز قالاۋىنا ساي نەكەلەسسىن. بۇل — كۇنا ەمەس. وندايلار نەكەگە تۇرسىن+.
37 ال كىمدە-كىم نەكەگە تۇرۋدى قاجەت دەپ تاپپاسا، ٵرى ٶز ەركىن بيلەي الاتىندىقتان، سالتباستى بولىپ قالۋدى شەشىپ، جۇرەگىندەگى وسى شەشىمىنە بەرىك بولسا، دۇرىس ىستەيدى+.
38 سونىمەن، نەكەگە تۇرعان ادام دۇرىس ىستەيدى، ال تۇرماعان ادام ودان دا دۇرىس ىستەيدى+.
39 كۇيەۋىنىڭ كوزى تىرىسىندە ايەلدىڭ وعان باسى بايلاۋلى+. ال كۇيەۋى كوز جۇمسا، كىمگە تۇرمىسقا شىعامىن دەسە دە ٶز ەركى، تەك يەمىزدىڭ ٸزباسارىنا شىعۋ كەرەك+.
40 ٴبىراق، مەنىڭشە، قايتادان تۇرمىس قۇرماسا، باقىتتىراق بولادى. مەندە دە قۇداي رۋحى بار دەپ ويلايمىن.
