LYNNONG 40
Kumno Ngi Lah ban Long kiba Khuid ha Khmat U Blei?
Mutdur ïa kane—ka kmie ka pynkhreh skul ïa la u khun. Ka pynsum ïa u bad ka pynphong ki jaiñ kiba khuid. Kane ka pynlong ïa u ban long uba koit ba khiah bad ka pyni ruh ba ki kmie ki kpa jong u ki sumar bha ïa u. Ha kajuh ka rukom, U Jehobah, u kpa baieid jong ngi, u kwah ïa ngi ban long kiba khuid la ha ka met ka phad ne ha ka ktien ka thylliej, ha ka jingmut jingpyrkhat bad ha ka kam. Haba ngi long kiba khuid, ngi myntoi ïalade bad ngi ai burom ïa u.
1. Kumno ngi lah ban long kiba khuid?
U Jehobah u ong ïa ngi: “To long phi kiba khuid.” (1 Petros 1:16) Ban long kiba khuid, ka mut ban long khuid ym tang na shabar hynrei na shapoh ruh. Ngi lah ban long kiba khuid da kaba sum ba sait, da kaba phong ki jaiñ kiba khuid, pynkhuid ïa la ka ïing ka sem bad ïa la ki kali. Ngi lah ruh ban ïarap pynkhuid ïa ka Ïing Hima. Da kaba leh khuid, ka wanrah burom ïa U Jehobah.—2 Korinth 6:3, 4.
2. Ban long kiba khuid ngi dei ban kiar na kum kiei ki jingmlien?
Ka Baibl ka kyntu ïa ngi ban “ïapynkhuid noh ïalade na ka jingbit-tngit ka doh bad ka mynsiem baroh.” (2 Korinthi 7:1) Kumta ngi trei shitom ban kiar na kiei kiei kiba lah ban pynsniew ïa ka met ne ïa ka jingmut jingpyrkhat jong ngi. Ki jingmut jingpyrkhat jong ngi ki dei ban pynsngewbha ïa U Jehobah, na kata ka daw ngi ïaleh shitom ban kyntait ïa ki jingmut jingpyrkhat kiba sniew. (Salm 104:34) Ngi dei ruh ban long kiba khuid ha ka ktien ka thylliej.—Pule Kolossai 3:8.
Kaei de kaba lah ban pynlong ïa ngi kibym khuid? Katto katne kiei kiei ki lah ban pynsniew ïa ka met jong ngi. Na kata ka daw ngi kiar na kaba bam kwai, bam duma, dih sikret, dih kynja, ne dih drok. Da kaba kiar na kine, ngi long kiba kham koit kham khiah bad ngi pyni ba ngi burom ïa ka jingim. Ngi dei ban ïaleh shitom ban im khuid da kaba ym ïa lehkai bad la ka jong ka jinglong kynthei ne shynrang ban pynhun ïalade, ne ban peitkai ïa ki dur ne ki phlim khlemraiñ. (Salm 119:37; Ephesos 5:5) Ka lah ban long kaba eh ban lait noh na kine ki jingmlien, hynrei U Jehobah u lah ban ïarap ïa ngi ban ïaleh ïa kita.—Pule Isaïah 41:13.
WAD SHUH SHUH
Peit kumno ka jinglong khuid ha ka met ka wanrah burom ïa U Jehobah, bad peit ruh kumno ban lait noh na ki jingmlien kiba sniew.
3. Ka jingleh khuid ka pyndonburom ïa U Jehobah
Ngi lah ban sngewthuh ïa ka jingsngew U Jehobah shaphang ka jingkhuid da kaba peit bniah ïa ki hukum kiba u la ai ha ki nong Israel. Pule Eksodos 19:10 bad 30:17-19, bad nangta sa ïa peit lang ïa kine ki jingkylli harum:
-
Kine ki dkhot ki pynpaw aïu shaphang ka jingsngew jong U Jehobah halor ka jingleh khuid?
-
Kum kiei ki jingmlien kiba bha kin ïarap ïa phi ban ïai long kiba leh khuid?
Ngi hap ban trei shitom bad pynlut por ban long kiba khuid. Bad ngi lah ban leh kumta la ngi sah haei haei ruh ne la ngi duk ne riewspah. Peit ïa ka VIDEO, bad nangta sa ïa peit lang ïa kane ka jingkylli harum:
-
Kumno ka jingleh khuid bad ka jingbuh bha ïa la ki tiar ki tar haba ngi leit ïalap ka pyndonburom ïa U Jehobah?
4. Pynduh noh ïa ki jingmlien ba sniew
U Jehobah u lah ban ïarap ïa ngi ban iehnoh ïa kano kano ka jingmlien ba sniew
Lada phi dih sikret ne dih drok, phi tip ba haduh katno ka long kaba eh ban iehnoh ïa ki. Kaei kaba lah ban ïarap ïa phi? Peit kumno kata ka jingmlien ka ktah ïa phi. Pule Mathaïos 22:37-39, bad nangta sa ïa peit lang kumno ka jingbam kwai, bam duma, dih sikret, ne dih drok ka ktah ïa . . .
-
ka jingïadei paralok jong u briew bad U Jehobah.
-
ka jingïadei ha ïing ha sem bad ïa kiwei.
Pyrkhat kumno ban iehnoh ïa ka jingmlien kaba sniew. a Peit ïa ka VIDEO.
Pule Philippi 4:13, bad nangta sa ïa peit lang ïa kane ka jingkylli harum:
-
Kumno ka jingduwai, ka jingpule Baibl, bad ka jingleit sha ki jingïalang ka aibor ïa u briew ban pynduh ïa ka jingmlien kaba sniew?
5. Ïaleh pyrshah ïa ki jingmlien bad ki jingpyrkhat ba jakhlia
Pule Kolossai 3:5, bad nangta sa ïa peit lang ïa kine ki jingkylli harum:
-
Kumno ngi tip ba ka jingpeit ïa ki dur khlemraiñ, ka jingphah ïa ki dur ne ki jingïakren ba jakhlia lyngba ka phone, bad ka jinglehkai bad la ka jong ka jinglong kynthei ne shynrang ban pynhun ïalade ki long kibym khuid ha khmat U Jehobah?
-
Hato phi sngew ba ka jingkhmih lynti jong U Jehobah ïa ngi ban long kiba khuid ka long shaba palat? Balei?
Peit kumno phi lah ban ïaleh bad la ki jingpyrkhat kibym khuid. Peit ïa ka VIDEO.
U Jisu u la pyndonkam kawei ka pharshi ban pyni ba ngi dei ban ïaleh tyngeh ban ïai long kiba khuid. Pule Mathaïos 5:29, 30, bad nangta sa ïa peit lang ïa kane ka jingkylli harum:
-
Watla u Jisu u khlem bthah ïa ngi ban pynmong ïalade, hynrei u mut ba ngi dei ban leh eiei. Kum kiei ki sienjam ba tyngeh ba u briew u lah ban shim ban kiar na ki jingpyrkhat kibym khuid? b
Lada phi ïaleh katba lah ban kiar na ki jingmut jingpyrkhat kibym khuid, U Jehobah u ñiewkor ïa ka jingïaleh shitom jong phi. Pule Salm 103:13, 14, bad nangta sa ïa peit lang ïa kane ka jingkylli harum:
-
Lada phi shem jingeh ban ïa khun bad ka jingmlien kaba sniew, kumno kane ka dkhot Baibl ka lah ban pynshlur ïa phi ban ïai ïaleh?
Ka jingngop biang kam mut ba phim lah shuh!
Ka suk ban pyrkhat, ‘Nga la ngop biang, ngam treh pyrshang shuh.’ Hynrei pyrkhat shaphang kane: Tang namar ba u nongmareh u jynthut bad u ur, kam mut ba u la rem ha ka jingmareh thong, lymne um donkam ban sdang biang naduh ba sdang. Kumjuh ruh, ka jingngop biang kam mut ba phi la rem bad ba phim lah shuh ban iehnoh ïa ka jingmlien kaba sniew. Lymne kam mut ba ka jingtrei shitom jong phi ka la long lehnohei. Ka jingngop biang ka ju jia ïa baroh. Ka dei shi bynta bad ka jingïaleh. Wat duh jingkyrmen! Da ka jingïarap jong U Jehobah, phin lah ban lait noh na kata ka jingmlien kaba sniew.
DON KIBA ONG: “Nga la mlien. Ngam lah shuh ban ieh.”
-
Ka dkhot Baibl aïu kaba phi lah ban pyni ba da ka jingïarap jong U Jehobah ki lah ban pynduh noh ïa ka jingmlien kaba sniew?
KI MAT BAKONGSAN
Ngi pynsngewbha ïa U Jehobah da kaba pynkhuid ïa la ka met, ki jingmut jingpyrkhat, bad ïa la ki jinglong.
Peit Biang
-
Balei ka long kaba kongsan bha ban long kiba khuid?
-
Kumno phi lah ban long kiba khuid?
-
Kumno phi lah ban long kiba khuid ha ki jingmut jingpyrkhat bad ha ki jinglong jong phi?
PULE SHUH SHUH
Kiei kiba phi lah ban leh ban long kiba khuid wat la phi long iba duk?
Kumno ka Jingsait Kti ka Ïada ïa ka Koit ka Khiah jong Phi (Phareng) (3:01)
Peit kumno phi lah ban iehnoh ïa u sikret.
“Kumno ban Iehnoh ïa u Sikret” (To Sharai!, Jymmang 2010, Phareng)
Peit ïa ki jingma kiba mih na ka jingpeit ïa ki dur ba jakhlia.
“Don Jingma ne Em haba Peit ïa ki Dur ba Jakhlia” (Ka Kutphira, Nailar 1, 2013, Phareng)
Peit kumno uwei u briew u la lah ban iehnoh ïa ka jingmlien jong u ban peit ïa ki dur ba jakhlia.
“Nga la Ngop Biang Bunsien Shuwa ba Ngan Jop” (Ka Kutphira No. 4 2016, Phareng)
a Peit ïa ka jingthoh “Kumno ban Iehnoh ïa u Sikret” ha ka bynta Pule Shuh Shuh jong kane ka lynnong, kaba batai ïa ki sienjam kiba lah ban ïarap ïa phi ban iehnoh ïa kane ka jingmlien kaba sniew.
b Ban ïoh jingïarap halor kumno ban lait noh na ka jingmlien ban lehkai bad la ka jinglong kynthei ne shynrang ban pynhun ïalade, peit ïa ka jingthoh “Kumno Nga Lah ban Lait noh na ka Jingmlien ban Lehkai bad la ka jong ka Jinglong Kynthei ne Shynrang ban Pynhun Ïalade?” ha ka kot Questions Young People Ask—Answers That Work, Volume 1, chapter 25, ha ka Phareng.
