“Keti nge ke kudiwaka ya kulunga kukonda Nzambi? Bamilio ya bantu ke kudiwaka mpidina.” Yai nsangu ya bantu me katuka kutanga ntama mingi ve, yina kimvuka mosi ya bantu ya ke ndimaka ve nde Nzambi kele basisaka. Ziku bo ke kudiwaka nde bo kele ti mfunu ya Nzambi ve.

Kansi, bantu mingi yina ke tubaka nde bo ke kwikilaka na Nzambi ke salaka mambu bonso nde yandi kele ve. Salvatore Fisichella, episikopo mosi ya Katolika tubaka sambu na bantu ya dibundu na yandi nde: “Ntembe kele ve nde, kana bantu kutala luzingu na beto, ata muntu mosi ve ta ndima nde beto kele Bakristu sambu mutindu na beto ya kuzinga kele kiteso mosi ti bantu yina ke kwikilaka ve na Nzambi.”

Bantu ya nkaka ke bakaka ve ntangu ya kudibanza sambu na Nzambi. Bo ke yindulaka nde yandi kele ntama kibeni na mpila nde yandi lenda sadila bo ve ata kima mosi ya mfunu na luzingu. Nkutu, bantu ya mutindu yai ke sosaka Nzambi kaka ntangu bo kele na mpasi to kele ti mfunu ya kima mosi buna​—kaka bonso nde yandi kele nsadi na bo.

Bankaka ke bakaka mpenza ve malongi ya dibundu na mbalu, nkutu bo ke sadilaka ve mambu yina dibundu na bo ke longaka. Mu mbandu, bantu ya Katolika 76 na kati ya nkama na Allemagne ke kwikilaka nde yo kele mbi ve nde bakala ti nkento kuzinga kumosi kukonda kukwelana​—dibanza yina ke wakana ve ti malongi ya dibundu na bo mpi ya Biblia. (1 Bakorinto 6:18; Baebreo 13:4) Ya kieleka, mabundu ya nkaka mpi ke bakisaka kukonda kuwakana yina kele na kati ya malongi na bo mpi luzingu na bo. Bamfumu ya mabundu mingi ke bokutaka nde bantu ya mabundu na bo ke zingaka bonso “bantu yina ke ndimaka ve nde Nzambi kele.”

Ya kieleka, bambandu yai ke pusa beto na kuyula nde: Keti beto kele kibeni ti mfunu ya Nzambi? Ngiufula yai kele ya mpa ve. Bo me yulaka yo dezia na balutiti ya ntete ya Biblia. Sambu na kuzwa mvutu na ngiufula yai, bika beto tula dikebi na mwa bangiufula yina kele na mukanda ya Kuyantika.