1 Bakorinto 6:1-20

  • Kufundana na kati ya bampangi-Bakristu (1-8)

  • Bantu yina ta baka ve Kimfumu (9-11)

  • Beno pesa Nzambi nkembo na nitu na beno (12-20)

    • “Beno tina pite!” (18)

6  Nani na kati na beno, kana yandi ke wakana ve ti muntu ya nkaka+ ta meka kukwenda na tribinale na ntwala ya bantu ya kukonda lunungu, kansi ve na ntwala ya basantu?  To keti beno me zaba ve nde basantu ta sambisa nsi-ntoto?+ Ebuna kana beno ta sambisa nsi-ntoto, keti beno me fwana ve na kusambisa mambu ya fioti kibeni?  Keti beno me zaba ve nde beto ta sambisa bawanzio?+ Ebuna, sambu na nki ve mambu ya luzingu yai?  Ebuna, kana beno kele ti mambu ya luzingu yai yina ke lomba nde bo sambisa,+ keti beno ke sola bantu yina dibundu ke monaka bantu ya mpamba sambu bo vanda bazuzi?  Mono ke tuba sambu na kupesa beno nsoni. Keti na kati na beno muntu mosi ya mayele kele ve yina ta kuka kusambisa na kati ya bampangi na yandi?  Kansi, mpangi ke nata mpangi ya nkaka na tribinale, na ntwala ya bantu yina ke kwikilaka ve!  Ya kieleka, kana beno ke nata mpangi ya nkaka na tribinale, beno me bela dezia. Sambu na nki beno ke bika kaka ve nde bo sala beno mbi?+ Sambu na nki beno ke bika kaka ve nde bo yiba beno?  Kansi, beno bantu ke sala bankaka mbi mpi ke yiba bo, beno ke sala yo na bampangi na beno!  Keti beno ke zaba ve nde bantu ya kukonda lunungu ta baka ve* Kimfumu ya Nzambi?+ Beno kudikusa ve. Bantu ya ke salaka pite,*+ bantu ya ke sambilaka biteki,+ bantu ya ke salaka bizumba,+ babakala yina ke pesaka nzila nde bo vukisa nitu ti bo na mutindu yina me fwana ve,+ babakala yina ke ladisaka babakala ya nkaka,*+ 10  miyibi, bantu ya lukasi,+ bantu ya ke lawukaka malafu,+ bantu ya ke fingaka, to bantu ya ke botulaka bima ya bantu ya nkaka ta baka ve Kimfumu ya Nzambi.+ 11  Bantu ya nkaka na kati na beno vandaka mutindu yina. Kansi bo me yobisaka beno;+ bo me santisaka beno;+ bo me ndimaka beno bonso bantu ya lunungu+ na zina ya Mfumu na beto Yezu Kristu mpi ti mpeve ya Nzambi na beto. 12  Mono kele ti nswa ya kusala mambu yonso, kansi mambu yonso ve kele mfunu.+ Mono kele ti nswa ya kusala mambu yonso; kansi mono ta bika ve nde konso kima yina kuyala mono. 13  Madia kele sambu na divumu mpi divumu kele sambu na madia, kansi Nzambi ta fwa bima yai zole.+ Nitu kele ve sambu na pite,* kansi sambu na Mfumu,+ mpi Mfumu kele sambu na nitu. 14  Kansi Nzambi tedimisaka Mfumu,+ ebuna yandi ta tedimisa beto mpi na bafwa+ na nzila ya ngolo na yandi.+ 15  Keti beno ke zaba ve nde nitu na beno kele bitini ya nitu ya Kristu?+ Keti mono ta katula bitini ya nitu ya Kristu mpi ta vukisa yo ti nkento ya ndumba? Ata fioti ve! 16  Keti beno me zaba ve nde muntu yina ke vukana ti nkento ya ndumba kele nitu mosi ti yandi? Sambu yandi ke tuba nde, “bo zole ta vanda nsuni mosi.”+ 17  Kansi muntu yina ke vukana ti Mfumu kele na bumosi ti yandi na mpeve.+ 18  Beno tina pite!*+ Konso disumu ya nkaka yina muntu lenda sala kele na nganda ya nitu na yandi, kansi muntu yina ke salaka pite ke salaka disumu na nitu na yandi mosi.+ 19  Keti beno me zaba ve nde nitu na beno kele tempelo+ ya mpeve santu yina kele na kati na beno, yina Nzambi me pesaka beno?+ Diaka, beno kele ve bantu ya beno mosi,+ 20  sambu bo me sumbaka beno na ntalu.+ Yo yina, beno pesa Nzambi nkembo+ na nitu na beno.+

Banoti na nsi ya lutiti

Na kisina, “ta baka ve dikabu ya.”
Tala Bantendula ya Bangogo, “Mansoni.”
To “babakala yina ke vukisaka nitu ti babakala.” Na kisina, “babakala yina ke lalaka ti babakala.”
Na Kigreki, por·neiʹa. Tala Bantendula ya Bangogo.
Na Kigreki, por·neiʹa. Tala Bantendula ya Bangogo.