NGANGI na beto me pesaka beto lukumu kibeni na mutindu yandi me bikilaka beto kimpwanza ya kupona. Diaka, yandi ke sakumunaka mingi bantu yina ke pesaka na luzolo yonso bima yina bo kele ti yo sambu na kupesa maboko na lusambu ya kieleka, bayina ke salaka bikesa sambu na kusantisa zina ya Nzambi mpi ke pesaka maboko sambu na kulungana ya lukanu na yandi. Yehowa ke zolaka ve kupusa bantu na kulemfukila yandi na kingolo-ngolo. Kansi, yandi ke sepelaka mingi na bantu yina ke pesaka na luzolo yonso sambu bo ke zolaka yandi na masonga yonso mpi ke monisilaka yandi ntonda ya mingi.

Mu mbandu, ntangu bantu ya Izraele vandaka na ntoto-makanga ya Sinai, Yehowa zabisaka bo na kutunga nzo ya lusambu. Yandi tubaka nde: ‘Beno baka makabu sambu na Yehowa na kati na beno. Bika nde konso muntu yina ntima na yandi me zola, kunata dikabu sambu na Yehowa.’ (Kub. 35:5) Nzambi pesaka nzila nde konso muntu ya Izraele kupesa kima yina yandi me zola, kukonda kutala kana yo kele nene to fioti, sambu bima yonso vandaka mfunu sambu na kulungisa lukanu ya Nzambi. Bantu ya Izraele salaka nki?

‘Konso muntu yina ntima na yandi vandaka kupusa yandi,’ ‘konso muntu yina mpeve na yandi vandaka kupusa yandi,’ mpi ‘konso muntu na luzolo na yandi,’ pesaka makabu ya luzolo. Na luzolo yonso, babakala mpi bankento nataka bima yai sambu na kisalu ya Yehowa: babukle, bima-makutu, mitaku, babiju, wolo, arza, kwivre, nsinga ya ble, lene ya mbwaki, lele ya mbwaki mingi, lino ya kitoko, mika ya nkombo, bampusu ya mameme, bampusu ya mbisi ya bo ke bingaka foke, mabaya ya akasia, matadi ya ntalu, mafuta ya kinganga-nzambi, mpi mafuta ya mwinda. Nsuka-nsuka, ‘bima yina lungaka sambu na bisalu yonso, mpi yo vandaka mingi kuluta.’—Kub. 35:21-24, 27-29; 36:7.

Kiese ya Yehowa vandaka ve sambu na bima yina bo pesaka, kansi, mutindu bo pesaka yo na luzolo yonso sambu na kupesa maboko na lusambu ya kieleka. Bo vandaka mpi ti luzolo ya kupesa ntangu mpi ngolo na bo. Biblia ke tuba nde: ‘Bankento yonso ya zabaka kutunga mbote, tungaka ti maboko na bo.’ Ya kieleka, ‘bankento yonso yina zabaka kisalu mbote yina ntima na bo vandaka kupusa bo tungaka bansinga ti mika ya nkombo.’ Diaka, Yehowa pesaka Besalele ‘mayele, ngangu, mpi nzayilu ya kusala bisalu ya maboko ya mitindu yonso.’ Ebuna, Besalele mpi Oholiabi kumaka ti makuki ya me fwana sambu na kusala bisalu yonso yina Nzambi lombaka bo.—Kub. 35:25, 26, 30-35.

Ntangu Yehowa lombaka bantu ya Izraele na kupesa makabu, yandi vandaka ti kivuvu nde ‘konso muntu ta ndima na luzolo yonso’ kupesa maboko na lusambu ya kieleka. Mpi yandi sakumunaka mingi bantu yina pesaka na luzolo yonso na mutindu yandi pesaka bo lutwadisu ya mbote mpi kiese ya mingi. Mpidina, Yehowa monisaka nde yandi ke sakumunaka bansadi na yandi yina ke vandaka ti luzolo ya kupesa, yandi ke sadisaka bo na kuzwa bima mpi mayele yina bo kele na yo mfunu sambu na kulungisa luzolo na yandi. (Nk. 34:10) Kana nge ke sadila Yehowa na luzolo yonso, vanda ti kivuvu nde yandi ta sakumuna mpeve na nge ya kusadila yandi na luzolo yonso.