S wacu i teţḥussuḍ m’ara k-d-yefk weḥbib-ik lehdeyya? Ahat seg wakken ara k-yeɛǧeb lḥal, a t-tcekkṛeḍ aṭas ɣef wayagi. Akken i t-id-nwala, Yahwa akk-d Ɛisa fkan-aɣ-d tikci yifen akk tiyaḍ: d lefdiya. Amek i nezmer a ten-ncekkeṛ ɣef tikci-yagi?

1. Amek i nezmer a ncekkeṛ Ṛebbi akk-d Lmasiḥ ɣef wayen i xedmen ɣef ddemma-nneɣ?

Adlis Iqedsen yewɛed tudert n dayem i “kra n win yumnen [s Ɛisa]” (Yuḥenna 3:16). Meɛna, amek ara d-nbeggen liman-nneɣ di Ɛisa? S lefɛayel-nneɣ akk-d leqrarat i neţţaṭṭaf (Yeɛqub 2:17). M’ara d-yeţban liman-nneɣ deg wayen i d-neqqar d wayen i nxeddem, teţţiǧhid akteṛ tdukli-nneɣ d Ɛisa akk-d Baba-s, Yahwa (ɣer-ed Yuḥenna 14:21).

2. Deg wanta taswiɛt i nezmer a ncekkeṛ Yahwa akk-d Ɛisa ɣef wayen i xedmen ɣef ddemma-nneɣ?

Iḍ-nni aneggaru i gesɛedda Ɛisa akk-d inelmaden-is, yemla-yasen amek i zemren a t-cekkṛen ɣef tudert-is ara yefk d asfel. Yesnulfa-d ayen i geţţusemman deg Wedlis Iqedsen “Imensi n Ssid”, umi i neqqar daɣen “Asmekti n lmut n Lmasiḥ” (1 Ikurintiyen 11:20). Asmekti-yagi ad iɛiwen imceggɛen n Ɛisa, d wid akk ara yuɣalen d imasiḥiyen ɣer zdat, akken a d-ţmektayen belli yefka tudert-is ɣef yemdanen. Daymi i sen-yenna deg yiḍ-nni: “Xeddmet ayagi iwakken a y-id-teţmektayem” (Luqa 22:19). M’ara tḥeddṛeḍ i Wesmekti-yagi, teţcekkiṛeḍ Yahwa akk-d Ɛisa ɣef leḥmala tameqrant i ɣ-d-beggnen.

 A NNADI A NEFHEM AKTEṚ

3. Nesbeggin-ed ccekṛan-nneɣ s lefɛayel

Xayel-ed iman-ik aql-ak la tɣerrqeḍ, mbeɛd yuzzel-ed yiwen isellek-ik-id. Aţ-ţeţţuḍ lxiṛ-is? Bla ccekk ur tţeţţuḍ ara lxiṛ i k-yexdem. Aţ-ţnadiḍ amek i tzemreḍ a t-tcekkṛeḍ imi i d-isellek tudert-ik.

Imi i gefka Yahwa Mmi-s d asfel, isellek-ed tudert-nneɣ. Ɣret-ed 1 Yuḥenna 4:8-10, mbeɛd hedṛet ɣef yesteqsiyen-agi:

• Asfel n Ɛisa ţ-ţukci ifazen. Acuɣer?

• D acu i teţḥussuḍ m’ara teţxemmimeḍ ɣef wayen i gexdem Yahwa akk-d Ɛisa ɣef ddemma-inek?

Amek i nezmer a ncekkeṛ Yahwa akk-d Ɛisa ɣef lefdiya? Ɣret-ed 2 Ikurintiyen 5:15 akk-d 1 Yuḥenna 4:11; 5:3. Mkul m’ara d-teɣrem yiwen seg yefyar-agi, hedṛet ɣef westeqsi-yagi:

• Ɛlaḥsab n wafir-agi, amek i nezmer a d-nbeggen ccekṛan?

4. Ţɛanad Ɛisa

Nezmer daɣen a d-neţbeggin ccekṛan ɣef lefdiya m’ara neţɛanad Ɛisa. Ɣret-ed 1 Buṭrus 2:21, mbeɛd hedṛet ɣef westeqsi-yagi:

• Amek i tzemreḍ aţ-ţedduḍ di lǧeṛṛa n Ɛisa, yeɛni aţ-ţtebɛeḍ swaswa lemtel i d-yeǧǧa?

• D acu i geţwaxdamen deg Wesmekti n lmut n Lmasiḥ?

 AYEN I D-NELMED

Neţbeggin-ed ccekṛan ɣef wayen akk yexdem Ɛisa m’ara d-nesbeggin s lefɛayel-nneɣ belli nesɛa liman deg-s yerna nḥeddeṛ i Wesmekti.

A d-nesmekti

• Acu i d lmeɛna-s a d-nesbeggen liman di Ɛisa?

• Ɛlaḥsab-ik, amek i tzemreḍ a d-tbeggneḍ ccekṛan i Yahwa akk-d Ɛisa ɣef wayen i xedmen ɣef ddemma-inek?

• Acuɣer i glaq a nḥeddeṛ i Wesmekti n lmut n Lmasiḥ?