Ahwo Rom 9:1-33
9 Uzẹme na mẹ be ta na keme mẹ yọ olele ọrọ Kristi; mẹ be ta ọrue he. Ẹkwoma ẹzi ọfuafo na obruoziẹ-iroro mẹ o bi se isẹri kẹ omẹ
2 inọ uweri ogaga gbe edada egaga e rrọ udu mẹ.
3 Keme o hae were omẹ o hae jọnọ mẹ họ ọnọ a hẹriẹ no Kristi, nọ ọ rẹ ruẹ uye fiki inievo mẹ, ahwo uyẹ mẹ,
4 enọ e rrọ ahwo Izrẹl. Ae Ọghẹnẹ ọ rehọ wọhọ emọ, enọ i wo oruaro na gbe evọ na gbe Uzi na gbe uvẹ nọ a rẹ rọ gọ Ọghẹnẹ gbe eyaa na.
5 A tẹ jẹ rrọ emọ esẹ-ode na, yọ oma rai Kristi na o no ze. Jọ ajiri u te Ọghẹnẹ bẹdẹ bẹdẹ, ọnọ o wuzou ahwo kpobi. Ami.
6 Orọnikọ onana u dhesẹ nọ ẹme Ọghẹnẹ o rugba ha ha. Keme orọnikọ enọ a yẹ kẹ Izrẹl kpobi a ginẹ rrọ emọ Izrẹl he.
7 Yọ orọnikọ aikpobi a rrọ emọ fikinọ a rrọ emọ* Abraham ho; ukpoye: “Oma Aiziki ọnọ a ti se ọmọ* ra o ti no ze.”
8 Koyehọ, orọnikọ fikinọ a yẹ ohwo kẹ Abraham a rẹ rọ jọ emọ Ọghẹnẹ hẹ, rekọ emọ nọ a yẹ ẹkwoma eyaa na họ enọ a rri wọhọ emọ* na.
9 Keme enẹ ọ ya eyaa na: “Oke utiona ukpe notha mẹ te nyaze yọ Sera o ti yẹ ọmọzae.”
10 Yọ orọnikọ oke yena ọvo ho, rekọ te okenọ Rebeka o dieva ejime họ kẹ Aiziki, ọsẹ-ode mai;
11 keme okenọ a ri yẹ emọ na dede he, yọ a ri ru oware uwoma hayo uyoma ovo ho, re ẹjiroro Ọghẹnẹ kpahe ẹsalọ na o jọ inọ obọ Ọghẹnẹ nọ o bi se na o rrọ, orọnikọ fiki iruo ho,
12 a ta kẹ Rebeka nọ: “Ọrọ ọkpako na ọ te jọ odibo kẹ ọrọ ọmaha na.”
13 Nwane wọhọ epanọ a kere nọ: “Me you Jekọp, rekọ me mukpahe Esọ.”
14 Kọ eme ma rẹ ta? Kọ Ọghẹnẹ o re kienyẹ ahwo? Vievie!
15 Keme ọ ta kẹ Mosis nọ: “Mẹ te re ohrọ ohwo kpobi nọ mẹ gwọlọ re ohrọ, yọ me ti dhesẹ ọdawẹ kẹ ohwo kpobi nọ mẹ gwọlọ dhesẹ ọdawẹ kẹ.”
16 Fikiere, orọnikọ o roma hwa oware nọ ohwo ọ gwọlọ hayo epanọ ọ daoma te* he, rekọ o rrọ obọ Ọghẹnẹ ọnọ o wo ohrọ-oriọ.
17 Enẹ ikereakere na e ta kpahe Fẹro: “Fiki onana me ro vu owhẹ wa uzuazọ: re mẹ rọ ẹkwoma ra dhesẹ ogaga mẹ via, gbe re a jọ otọakpọ na soso whowho odẹ mẹ.”
18 Fikiere ọ rẹ re ohwo kpobi nọ u je rie ohrọ, rekọ ọ rẹ kẹ ohwo kpobi nọ u je rie uvẹ re o wo udu-ogaga.
19 Fikiere wha te nọ omẹ nọ: “Kọ fikieme ọ gbẹ be rọ fo ahwo inọ a ru thọ? Kọ ono ọ rẹ sae za oreva riẹ dhe?”
20 Rekọ whẹ yọ ono nọ ọ rẹ za ẹme zihe kẹ Ọghẹnẹ? Kọ oware nọ a ma ọ rẹ sae ta kẹ ọnọ ọ ma riẹ nọ, “Fikieme whọ rọ ma omẹ enẹ?”
21 Emejọ? Kọ ọmebẹ o gbe wo udu nọ ọ rẹ rọ jọ ukulu ọviẹ ọvona rehọ ọviẹ ma okwakwa nọ u wo ọghọ, ọ vẹ jẹ jọ ukulu ovona rehọ ọviẹ ma okwakwa nọ u wo ọghọ họ?
22 Kọ eme ọ thọ otẹrọnọ Ọghẹnẹ o wo udu nọ o re ro dhesẹ ofu riẹ gbe ogaga riẹ via, rekọ ọ rọ odiri ologbo thihakọ kẹ ekwakwa ofu nọ i fo ọraha?
23 Kọ ẹvẹ otẹrọnọ o ru onana re o dhesẹ oruaro ulogbo riẹ via kẹ ekwakwa nọ i fo ohrọ-oriọ, enọ ọ ruẹrẹ kpahe no anwẹdẹ rọkẹ oruaro,
24 koyehọ omai, enọ o se, orọnikọ no udevie ahwo Ju ọvo ze he rekọ no udevie erẹwho na ze re, eme o jọ oyena thọ?
25 O wọhọ epanọ ọ jọ obe Hosia ta re inọ: “Enọ e rrọ ahwo mẹ hẹ me ti se ai ‘ahwo mẹ,’ yọ aye nọ a you hu na me ti sei ‘oyoyou’;
26 yọ evaọ oria nọ a jọ ta kẹ ae inọ, ‘Whai yọ ahwo mẹ hẹ,’ a te jọ etẹe se ai ‘emọ Ọghẹnẹ nọ ọ rrọ uzuazọ na.’”
27 Ofariẹ, Aizaya o bo via kpahe Izrẹl nọ: “Emọ Izrẹl a tẹ make rrọ buobu wọhọ uwẹkpẹ abade, enọ i kiọkọ ọvo a ti siwi.
28 Keme Jihova* o ti gu akpọ na ẹdhọ, yọ o ti bruoziẹ na totọ ababọ oke oraha.”
29 Ofariẹ, nwane wọhọ epanọ Aizaya ọ ruẹaro: “O gbẹ rrọ Jihova* nọ o wuzou egbaẹmo na nọ ọ nyasiọ emọ* mai jọ ba ha, ma hae te wọhọ Sọdọm jẹ wọhọ Gomora no.”
30 Kọ eme ma rẹ ta? Inọ ahwo erẹwho na, dede nọ a je yeri uzuazọ epanọ a re ro kiẹrẹe he, a kiẹrẹe evaọ aro Ọghẹnẹ fiki ẹrọwọ;
31 rekọ Izrẹl, dede nọ a jẹ daoma koko uzi ẹrẹreokie, a sai koko uzi yena ha.
32 Emejabọ? Keme a je ru onana avọ ẹrọwọ họ, rekọ wọhọ ẹsenọ a te rọ iruo ro woi tobọ. A te zoruẹ fiki “utho ezoruẹ” na;
33 wọhọ epanọ a kere nọ: “Rri! Mẹ be wọ utho ezoruẹ gbe utho ọzadhe họ otọ evaọ Zayọn, rekọ ohwo nọ o fi ẹrọwọ họ iẹe u ti kiekpei hi.”
Eme-Obotọ
^ Evaọ Griki, “ubi.”
^ Evaọ Griki, “ubi.”
^ Evaọ Griki, “ubi.”
^ Evaọ Griki, “ọnọ ọ be gwọlọ na ha hayo ọnọ ọ be dhẹ na ha.”
^ Rri oria Otofa Eme.
^ Rri oria Otofa Eme.
^ Evaọ Griki, “ubi.”
