Ahwo Rom 2:1-29
2 Fikiere, oghẹrẹ ohwo kpobi nọ whọ rrọ kẹhẹ, who wo unoma ha, nọ who te bi brukpe ohwo jọ; keme nọ who te bi brukpe omọfa yọ who bi brukpe omara re, fikinọ whẹ nọ who bi brukpe omọfa na who bi ru eware evona.
2 Whaọ ma riẹ nọ oziẹobro Ọghẹnẹ kpahe enọ i bi ru eware itieye o rrọ gbagba.
3 Kọ who roro nọ whẹ nọ o bi brukpe ahwo nọ a bi ru eware itieye na kpakiyọ who bi ru ae re, whọ te va ẹdhoguo Ọghẹnẹ abọ?
4 Hayo kọ who bi rri uwowou gbe akọthiho gbe odiri* ologbo riẹ vo, fikinọ whọ riẹ hẹ inọ Ọghẹnẹ ọ be rọ fiki uwowou riẹ fiobọhọ kẹ owhẹ re who kurẹriẹ?
5 Rekọ fiki udu ogaga ra gbe fikinọ whọ be rọwo kurẹriẹ hẹ, who bi koko ofu Ọghẹnẹ họ uzou ra. Ofu nana o ti dhesẹ oma via evaọ ẹdẹ oziẹobro okiẹrẹe Ọghẹnẹ.
6 Yọ ọ te hwosa kẹ omomọvo wọhọ epanọ iruo riẹ e rrọ:
7 uzuazọ ebẹdẹ bẹdẹ rọkẹ enọ e be gwọlọ oruaro gbe ọghọ gbe uzuazọ nọ a rẹ jọ whu hu ẹkwoma oware uwoma uruo nọ a be ruabọhọ;
8 rekọ, rọkẹ enọ i wo ẹzi ẹwhọ gbe enọ e be ghẹmeeyo kẹ uzẹme na nọ e roma kẹ emuemu, ofu gbe evedha Ọghẹnẹ o ti te ai oma.
9 Uye gbe edada i ti te ohwo kpobi nọ o bi ru oware uyoma, orọ ọsosuọ ahwo Ju, kẹsena ahwo Griki;
10 rekọ oruaro gbe ọghọ gbe udhedhẹ u re te ohwo kpobi nọ o bi ru oware uwoma, orọ ọsosuọ rọkẹ ahwo Ju, kẹsena kọ ahwo Griki.
11 Keme Ọghẹnẹ o wo ọriẹwẹ hẹ.
12 Ahwo kpobi nọ a raha uzi dede nọ a wo uzi hi, a ti whu dede nọ a wo uzi hi; rekọ ahwo kpobi nọ a raha uzi evaọ otọ uzi, a te rọ uzi gu ae ẹdhọ.
13 Keme orọnikọ enọ i bi yo uzi họ enọ i kiẹrẹe evaọ aro Ọghẹnẹ hẹ, rekọ enọ i bi koko uzi họ enọ o ti kuenu kẹ inọ a kiẹrẹe.
14 Keme nọ ahwo erẹwho na nọ a wo uzi hi a tẹ be rọ iroro obọrai ru eware nọ e rọwokugbe uzi na, ahwo nana, dede nọ a wo uzi hi, a bi dhesẹ via inọ a wo uzi evaọ omarai.
15 Ahwo nana a bi dhesẹ nọ Ọghẹnẹ o kere ẹjiroro uzi na fihọ udu rai, obruoziẹ-iroro rai o te je bi se isẹri, yọ iroro obọrai i bi brukpe ae hayo bru kẹ ae.
16 Onana o te via evaọ ẹdẹ nọ Ọghẹnẹ ọ te rehọ ẹkwoma Kristi Jesu gu ahwo-akpọ ẹdhọ evaọ eware nọ a be kodhere, wọhọ epanọ me bi whowho evaọ usi uwoma na.
17 Whọ tẹ rrọ ohwo Ju yọ whọ rẹroso uzi jẹ be rọ usu ra kugbe Ọghẹnẹ seha,
18 whọ tẹ jẹ riẹ oreva riẹ jẹ riẹ epanọ who re ro vuhu eware nọ i kiehọ fikinọ a wuhrẹ owhẹ Uzi na no,
19 u te je mu owhẹ ẹro nọ whẹ yọ ọnọ o re su enọ i tuaro, jẹ rrọ elo rọkẹ enọ e rrọ ebi,
20 ọnọ ọ rẹ kpọ igheghẹ họ, ọnọ o re wuhrẹ emaha, who te je wo otoriẹ ugogo eriariẹ gbe uzẹme Uzi na—
21 kọ whẹ nọ o bi wuhrẹ omọfa, kọ who gbe wuhrẹ omara re? Whẹ nọ ọ be ta nọ, “Who tho uji hi,” kọ who bi tho uji?
22 Whẹ nọ ọ be ta nọ, “Who bruẹnwae he,” kọ who bi bruẹnwae? Whẹ nọ emedhọ e rẹ tọtọ oma, kọ who bi tho ekwakwa iwou edhọ?
23 Whẹ nọ ọ be rọ uzi seha, kọ whọ be wha ekela se Ọghẹnẹ ẹkwoma Uzi na nọ whọ be raha?
24 Keme “a be jọ udevie erẹwho na ta eme iyoma kpahe odẹ Ọghẹnẹ fiki rai,” wọhọ epanọ a kere.
25 Evaọ uzẹme, oware nọ u re ru oyawo wo iruo họ nọ who te bi koko uzi; rekọ whọ tẹ be raha uzi, oyawo ra u zihe ruọ ọnọ ọ yawo ho no.
26 Fikiere, ohwo nọ ọ yawo ho o te bi koko eware nọ e rrọ Uzi na, a re rri rie wọhọ ọnọ ọ yawo, o gbẹ rrọ ere?
27 Yọ ohwo nọ ọ yawo ho ọ te rọ ẹkwoma Uzi na nọ o bi koko ro brukpe owhẹ nọ ọ be raha uzi dedenọ who wo Uzi na nọ a kere fihọ otọ jẹ yawo.
28 Keme orọnikọ evaọ okafe a rẹ rọ jọ uvi ohwo Ju hu, yọ uvi oyawo o rrọ oware okafe he, orọ uwo na.
29 Rekọ ọnọ ọ rrọ ohwo Ju evaọ obeva họ uvi ohwo Ju, yọ oyawo riẹ orọ udu ẹkwoma ẹzi, orọnikọ ẹkwoma izi nọ a kere fihọ otọ họ. Obọ Ọghẹnẹ ajiri ohwo yena o re no ze orọnikọ obọ ahwo ho.
Eme-Obotọ
^ Hayo “uye-oruẹ-krẹkri.”
