Kpohọ eme nọ e riẹ eva

Kpohọ oria izoẹme

Ahwo Rom 10:1-21

  • Oghẹrẹ nọ a re ro kiẹrẹe evaọ obọ Ọghẹnẹ (1-15)

    • Ewhowho via kẹ amọfa (10)

    • Ese odẹ Jihova o rẹ wha esiwo ze (13)

    • Awọ etausiuwoma i wo erru (15)

  • A siọ usi uwoma na (16-21)

10  Inievo, ẹgwọlọ udu mẹ gbe oware nọ mẹ be yare Ọghẹnẹ kẹ ae họ re a wo esiwo.  Keme me bi se isẹri kẹ ae inọ a wo ajọwha Ọghẹnẹ ọgọ, rekọ a bi ru ei rọwokugbe eriariẹ egbagba ha.  Keme, fikinọ a riẹ ẹrẹreokie Ọghẹnẹ hẹ rekọ a be gwọlọ rehọ orọ obọrai mu, a be nya lele ẹrẹreokie Ọghẹnẹ hẹ.  Keme Kristi họ ekuhọ Uzi na, re ohwo kpobi nọ o bi fi ẹrọwọ họ iẹe ọ sai kiẹrẹe.  Keme Mosis o kere kpahe ẹrẹreokie nọ u re no Uzi na ze, inọ: “Ohwo nọ o bi ru eware nana o ti wo uzuazọ fiki rai.”  Rekọ Ikereakere na e ta kpahe ẹrẹreokie nọ u re no ẹrọwọ na ze, inọ: “Whọ jọ udu ra ta ha inọ, ‘Ono o ti muvrẹ kpobọ odhiwu?’ koyehọ, re ọ rehọ Kristi ziọ otọ,  hayo, ‘Ono o ti kpobọ uki?’ koyehọ, re ọ kpare Kristi no uwhu ze.”  Rekọ eme Ikereakere na e ta? E ta nọ: “Ẹme na ọ kẹle owhẹ, evaọ unu ra gbe evaọ udu ra”; koyehọ, “ẹme” ẹrọwọ na, onọ ma bi whowho na.  Keme whọ tẹ jọ ẹgbede rọ unu ra whowho inọ Jesu họ Olori, je wo ẹrọwọ evaọ udu ra inọ Ọghẹnẹ ọ kpare riẹ no uwhu ze, a ti siwi owhẹ. 10  Keme evaọ udu na ohwo o re jo wo ẹrọwọ nọ u re ru ei kiẹrẹe, rekọ unu na ohwo o re ro whowho via kẹ amọfa re o wo esiwo. 11  Keme ikereakere na e ta nọ: “Ohwo ọvuọvo nọ o fi ẹrọwọ họ iẹe nọ u re kiekpe ọ riẹ hẹ.” 12  Keme ohẹriẹ o rrọ udevie ahwo Ju avọ ahwo Griki hi. Olori ọvona o wuzou rai kpobi, ọnọ o re ku eghale ku* ahwo kpobi nọ a bi se odẹ riẹ. 13  Keme “ohwo kpobi nọ o bi se odẹ Jihova* a re ti siwi ei.” 14  Rekọ, ẹvẹ a re ro sei otẹrọnọ a ri fi ẹrọwọ họ iẹe he? Kọ ẹvẹ a re ro fi ẹrọwọ họ ọnọ a ri yo kpahe he? Kọ ẹvẹ a re ro yo ababọ ohwo jọ nọ o re whowho ovuẹ na? 15  Kọ ẹvẹ a re ro whowho ovuẹ na ajokpanọ a vi rai? Nwane wọhọ epanọ a kere nọ: “Rri erru nọ ọ rrọ awọ enọ e be ta usi uwoma orọ emamọ eware!” 16  Rekọ, orọnikọ aikpobi a dede usi uwoma na rehọ họ. Keme Aizaya ọ ta nọ: “Jihova,* ono o fi ẹrọwọ họ ẹme nọ a yo mi omai?” 17  Fikiere ẹme nọ ohwo o yo oye u re ru ei wo ẹrọwọ. Ẹme nọ a yo na họ ẹme kpahe Kristi. 18  Rekọ mẹ be nọ inọ, Kọ a yo ẹme na ha? A yo. Evaọ uzẹme, “edo rai o do ruọ otọakpọ na soso, yọ ovuẹ rai u te ọnyaba otọakpọ na.” 19  Rekọ mẹ be nọ inọ, Kọ emọ Izrẹl a gbẹ riẹ onana? A riẹ. Orọ ọsosuọ, Mosis ọ ta nọ: “Mẹ te rọ ahwo erẹwho efa ru owhai re ihri; mẹ te rọ orẹwho ogheghẹ ru owhai mu ofu ọgaga.” 20  Rekọ Aizaya ọ ta ududu inọ: “Enọ e jẹ gwọlọ omẹ hẹ a duku omẹ; enọ e jẹ nọ onọ mẹ hẹ a tẹ te riẹ omẹ.” 21  Rekọ ọ ta kpahe Izrẹl nọ: “Mẹ riẹ abọ mẹ oke krẹkri kẹ ahwo aghẹmeeyo, nọ a wo udu ogaga.”

Eme-Obotọ

Hayo “siobọno kẹ.”
Rri oria Otofa Eme.
Rri oria Otofa Eme.