Kpohọ eme nọ e riẹ eva

Kpohọ oria izoẹme

Ahwo Rom 5:1-21

  • Ẹkwoma Kristi a rẹ rọ ruẹrẹhọ kugbe Ọghẹnẹ (1-11)

  • Ahwo a bi whu fiki Adamu, a bi wo uzuazọ ẹkwoma Kristi (12-21)

    • Uzioraha gbe uwhu i te ahwo kpobi oma (12)

    • Oware ukiẹrẹe ọvo (18)

5  Fikiere nọ a rọ fiki ẹrọwọ kuenu kẹ omai nọ ma kiẹrẹe no na, joma reawere udhedhẹ* kugbe Ọghẹnẹ ẹkwoma Olori mai Jesu Kristi,  ọnọ ma rọ fiki ẹrọwọ nọ ma fihọ iẹe dhesẹ uwowou ulogbo nana nọ ma be reawere riẹ na kẹ omai; yọ joma ghọghọ* fiki ẹruore oruaro Ọghẹnẹ nọ ma bi ti wo.  Orọnikọ ere ọvo ho, rekọ joma ghọghọ* nọ ma tẹ rrọ uye, nọ ma riẹ nọ uye o rẹ wha ithihakọ ze na;  ithihakọ o vẹ wha ọjẹrehọ Ọghẹnẹ ze; ọjẹrehọ Ọghẹnẹ o vẹ wha ẹruore ze,  yọ ẹruore na o re kiekpe ohwo ho; keme Ọghẹnẹ ọ rehọ ẹkwoma ẹzi ọfuafo riẹ nọ ọ kẹ omai rọ uyoyou riẹ vọ udu mai no.  Keme okenọ ma gbẹ jọ erahaizi, Kristi o whu kẹ enọ e riẹ Ọghẹnẹ hẹ evaọ ẹruoke nọ a fihọ.  Keme o re bẹbẹ re ohwo jọ o whu kẹ ohwo okiẹrẹe; rekọ ẹsejọhọ rọkẹ ohwo owoma, ohwo jọ ọ sae rọwo nọ o re whu kẹe.  Rekọ Ọghẹnẹ o dhesẹ uyoyou riẹ kẹ omai, keme nọ ma gbẹ jọ erahaizi, Kristi o whu kẹ omai.  Whaọ enẹna nọ a rọ ẹkwoma azẹ riẹ kuenu kẹ omai nọ ma kiẹrẹe no na, u muẹro nọ a te rọ ẹkwoma riẹ siwi omai no ofu Ọghẹnẹ. 10  Keme otẹrọnọ okenọ ma jọ ewegrẹ a ruẹrẹ omai họ kugbe Ọghẹnẹ ẹkwoma uwhu Ọmọ riẹ, enẹna nọ ma ruẹrẹhọ kugbei no na, u muẹro gaga nọ a ti siwi omai ẹkwoma uzuazọ riẹ. 11  Orọnikọ ere ọvo ho, ma be ghọghọ re fiki usu nọ ma wo kugbe Ọghẹnẹ ẹkwoma Olori mai Jesu Kristi, ọnọ ma rọ ẹkwoma riẹ ruẹrẹhọ kugbe Ọghẹnẹ no na. 12  Fikiere, wọhọ epanọ uzioraha o rọ ẹkwoma omọvo ruọ akpọ na, uwhu u je no uzioraha ze na, ere uwhu u ro te ahwo kpobi oma keme aikpobi a raha uzi no—. 13  Keme uzioraha o rrọ akpọ na no taure a tẹ te rọ Uzi na ze, rekọ a rẹ rọ uzioraha kru ohwo ọvo ho nọ uzi o gbẹ riẹ hẹ. 14  Ghele na, uwhu u su wọhọ ovie no oke Adamu rite oke Mosis, u je su makọ enọ e raha uzi wọhọ epaọ uzioraha Adamu hu, ọnọ ọ rọ idhere jọ tho ọnọ a je rẹro riẹ na. 15  Rekọ oware nọ okẹ na o wha ze u wo ohẹriẹ no oware nọ uzioraha na o wha ze. Keme otẹrọnọ uzioraha omọvo o wha uwhu se ahwo buobu, uwowou ulogbo Ọghẹnẹ gbe okẹ ọvọvẹ riẹ ẹkwoma uwowou ulogbo ọzae ọvo, Jesu Kristi o be wha irere buobu se ahwo buobu. 16  Ofariẹ, oware nọ okẹ ọvọvẹ na o wha ze u wo ohẹriẹ no onọ uzioraha ọzae ọvo na o wha ze. Keme uzioraha ọvo o wha riẹ ze nọ a ro brukpe ahwo kpobi, rekọ okẹ nọ Ọghẹnẹ ọ kẹ nọ ahwo a raha izi buobu no o wha riẹ ze nọ a ro rri ahwo buobu kiẹrẹe. 17  Keme otẹrọnọ fiki uzioraha ọzae ọvo uwhu u su wọhọ ovie ẹkwoma riẹ, u muẹro nọ enọ a dhesẹ uwowou ulogbo kẹ jẹ kẹ okẹ ọvọvẹ ẹrẹreokie na a te jọ ivie nọ i ti su je wo uzuazọ ẹkwoma omọvo nana, Jesu Kristi. 18  Fikiere wọhọ epanọ uzioraha ovo o wha obrukpe se oghẹrẹ ahwo kpobi na, ere ọvona oware ukiẹrẹe ọvo o wha riẹ ze nọ a bi ro kuenu kẹ oghẹrẹ ahwo kpobi nọ a kiẹrẹe rọkẹ uzuazọ. 19  Keme wọhọ epanọ aghẹmeeyo ọzae ọvo o ru ahwo buobu zihe ruọ erahaizi na, ere ọvona re a te rọ ẹkwoma ẹmeoyo omọvo ru ahwo buobu kiẹrẹe. 20  Whaọ a rehọ Uzi na ze re uzioraha u vihọ. Rekọ epanọ ahwo a raha izi bu te, ere uwowou ulogbo Ọghẹnẹ u bu te re. 21  Fiki ẹjiroro vẹ? Re wọhọ epanọ uzioraha u su wọhọ ovie, nọ o wha uwhu ze na, ere ọvona uwowou ulogbo u ti su wọhọ ovie evaọ ẹrẹreokie re o wha uzuazọ ebẹdẹ bẹdẹ ze ẹkwoma Jesu Kristi Olori mai.

Eme-Obotọ

Hayo o sae jọ nọ, “ma wo udhedhẹ.”
Hayo o sae jọ nọ, “ma be ghọghọ.”
Hayo o sae jọ nọ, “ma be ghọghọ.”