1, 2. Baka ni Jehovah ngajar kitai rinduka Iya?

CHARA ti pemadu manah ke ulih dikena apai ngajar anak iya nya ari teladan iya empu. Lebuh iya ngayanka pengerindu ngagai anak iya, iya ngajar sida chara ngayanka pengerindu. Nadai orang bukai kala rinduka kitai baka ke digaga Apai kitai, Jehovah. Nya alai, kitai belajar ngayanka pengerindu ‘laban Petara udah dulu rinduka kitai.’—1 Jhn. 4:19.

² Baka ni chara Jehovah ngayanka Iya “dulu rinduka kitai”? Ku Bup Kudus: “Lebuh kitai agi nyadi orang ke bedosa, Kristus mati ngarika kitai!” (Rom. 5:8) Jehovah, Apai kitai ti bepengerindu, meri Anak Iya nyadika tebus kena ngelepaska kitai ari dosa enggau pemati. Pemeri ti berega tu ngasuh kitai ulih semak ngagai Jehovah sereta ngayanka pengerindu kitai ke Iya. Enggau nyediaka Jesus nyadika tebus, Jehovah udah netapka teladan. Iya ngasuh kitai ngayanka pengerindu ngena chara gerah jari sereta enda berundingka diri empu.—1 Jhn. 4:10.

3, 4. Baka ni kitai ngayanka diri rinduka Petara?

³ Pengerindu nya kualiti Jehovah ti pemadu nyulut. Nya alai, ki tai ulih nemu kebuah Jesus ngumbai pesan ti pemadu besai nya: ‘Kita enda tau enda rinduka Jehovah Petara kita, enggau pengabis ati kita, enggau pengabis semengat kita, enggau pengabis runding kita, enggau pengabis pengering kita.’ (Mrk. 12:30) Jehovah deka kitai rinduka Iya enggau “pengabis ati” kitai. Jehovah tusah ati enti kitai rinduka orang bukai tauka utai bukai lebih agi ari kitai rinduka Iya. Tang, pengerindu kitai ke Iya ukai semina ba ati aja. Jehovah mega deka kitai rinduka Iya enggau “pengabis runding” enggau “pengabis pengering” kitai. Reti nya, pengerindu kitai ke Jehovah nyengkaum pengawa sereta chara kitai berunding.—Bacha Mikah 6:8.

⁴ Nya alai, kitai patut rinduka Jehovah enggau naka ulih. Enggau ngenuluka Iya ba pengidup kitai, kitai ngayanka diri amat rinduka Iya. Ba artikel sebedau tu, kitai udah berandauka empat chara Jehovah ngayanka pengerindu Iya ke bala anak Iya. Diatu, aram kitai meda baka ni kitai ulih ngenalamka sereta ngayanka pengerindu kitai ngagai Jehovah.

5. Lebuh kitai berundingka semua utai ti udah digaga Jehovah ke kitai, nama deka digaga kitai?

⁵ Enti orang meri nuan hadiah, selalu iya nuan ngayanka diri beterima kasih. Lalu ketegal nuan beterima kasih ke hadiah nya, nuan mega ngena iya. James nulis: “Semua pemeri ti menyana, ti pemadu badas endang datai ari atas magang, nurun ari Apai penampak ke enda berubah, ke enda mindah kin kitu baka ayuk.” (Jas. 1:17) Kitai amat beterima kasih laban Jehovah meri semua utai ke diguna kitai ba pengidup sereta kena ngelantangka ati. Kitai nemu pemesai pengerindu Iya ke kitai, lalu kitai mega deka ngayanka pengerindu kitai ke Iya. Bisi nuan ngasaika nya?

6. Nama patut digaga orang Israel enti sida deka Jehovah terus merekatka sida?

⁶ Orang Israel bulih mayuh utai ke manah ari Jehovah. Betaun-taun Iya ngiring sida ngena adat Iya sereta meri sida utai ti diguna ba pengidup. (U-dat. 4:7, 8) Lalu orang Israel ulih ngayanka terima kasih sida ngagai Jehovah enggau ngasika adat tu. Chunto, lebuh sida meri pemeri ngagai Jehovah, sida patut meri Iya “buah bungas, ti pemadu manah” ari utai ti diketau. (P-sut. 23:19) Orang Israel nemu Jehovah deka terus merekatka sida enti sida ngasika Iya sereta meri Iya utai ti pemadu manah.—Bacha Ulang Adat 8:7-11.

7. Baka ni kitai ulih ngena utai ti “pemadu manah” kena ngayanka kitai rinduka Jehovah?

⁷ Kitai mega ulih ngayanka diri rinduka Jehovah enti kitai meri Iya utai ti “pemadu manah.” (J-lam. 3:9) Kitai ulih ngereja tu ngena utai ti dikemisi kitai kena ngemuliaka Iya. Chunto, kitai ulih meri pemeri kena nyukung pengawa rohani ba gempuru kitai sereta ba serata dunya. Sekalika kitai ulih meri mayuh tauka mimit, semua kitai ulih ngena utai ti dikemisi kitai kena ngayanka pengerindu kitai ngagai Jehovah. (2 Kor. 8:12) Tang, bisi chara bukai kitai ulih ngayanka diri rinduka Jehovah.

8, 9. Nama siti da agi chara kitai ngayanka diri rinduka Jehovah? Nama digaga Mike enggau sida sebilik?

⁸ Jesus ngasuh kitai ngiga dulu Perintah Petara sereta anang irau pasal pemakai enggau gari. Apai kitai besemaya deka meri utai ti diguna kitai. (Mat. 6:31-33) Kitai arapka Jehovah sereta nemu Iya deka ngamatka semaya Iya. Iya ke amat, enti kitai rinduka seiku-seiku orang, kitai arapka iya. Pia mega, arap agi kitai ke Jehovah, bendar agi kitai ngayanka diri rinduka Iya. (Mas. 143:8) Nya alai, kitai ulih nanya diri empu: ‘Kati utai ke deka digaga aku sereta chara aku ngena jam  enggau pengering nunjukka aku amat rinduka Jehovah? Kati aku amat ngarapka Jehovah nyediaka utai ti diguna aku ninting hari?’

⁹ Mike enggau sida sebilik arapka Jehovah. Lebuh Mike agi biak, iya seruran deka nginjil ba menua bukai. Indah pengudah iya kawin sereta bisi dua iku anak, iya agi bisi pengeran ke baka nya. Lebuh Mike enggau sida sebilik macha pasal bala menyadi Kristian bukai ke gawa ba endur ke begunaka mayuh penginjil, sida mutuska diri idup enggau pengumbas iya. Sida nyual rumah sida, lalu pindah ngagai endur ke mit agi. Mike mega ngurangka penyampau pelangan bisnes betuchi iya, lalu ngiga chara bejalaika bisnes iya ari menua bukai ngena Internet. Asil iya, Mike enggau sida sebilik ulih pindah ngagai menua bukai, lalu sida rindu amat enggau pengawa nginjil sida. Ku Mike, “Kami ngasaika pengamat jaku Jesus ke dipadah ba Matthew 6:33.”

10. Baka Raja David, nama kebuah nya manah belematika utai ti dipelajarka kitai pasal Jehovah?

¹⁰ Bisi sekali Raja David nulis: ‘Langit mandangka mulia Petara. Langit ngayanka enggau nyata utai ti udah dikereja Iya.’ Ku iya agi: ‘Adat Jehovah endang pemadu badas. Iya meri pengering ti baru. Pesan Jehovah endang tau dikarapka meri penemu-dalam ngagai orang ke nadai penemu-dalam.’ Seraya David belematika pemanah adat enggau utai ti digaga Jehovah, iya semak agi ngagai Jehovah sereta deka ngayanka pengerindu iya ngagai Jehovah. David madahka: ‘Awakka jaku enggau runding aku manah dipeda Nuan, O Jehovah! Laban Nuan Empu ke alai aku ngenduh, sereta nyadi penebus aku!’—Mas. 19:1, 7, 14.

11. Baka ni kitai ulih ngena penemu ke diberi Jehovah ngagai kitai kena ngayanka pengerindu kitai ngagai Iya? (Peda gambar ba pun artikel.)

¹¹ Kemaya hari tu, Jehovah ngajar kitai mayuh utai pasal Iya Empu, tuju Iya, utai ti digaga Iya, sereta Jaku Iya. Dunya tu meransang orang belajar, tang pelajar ke tinggi agi suah ngasuh sida lenyau pengerindu ngagai Petara. Tang, Jehovah ukai semina deka kitai bisi penemu. Iya deka nulung kitai bepenemu-dalam. Iya deka kitai ngena utai ke dipelajar pulaika pemanah kitai sereta dikena kitai nulung orang bukai. (J-lam. 4:5-7) Chunto, Iya deka kitai bekunsika “penemu pasal pemendar” enggau orang bukai, lalu nulung sida ngambika selamat. (1 Tim. 2:4) Kitai ngayanka pengerindu ngagai Jehovah enggau orang bukai enti kitai enggau naka ulih ngajar orang pasal Perintah Petara sereta nama deka digaga Perintah nya ke mensia.—Bacha Masmur 66:16, 17.

12. Nama dipadah seiku nembiak indu pasal hadiah ari Jehovah?

 ¹² Orang ke biak mega ulih belematika semua utai ke udah diberi Jehovah sereta diajar Iya ngagai sida. Shannon agi ingat baka ni asai ati iya lebuh iya enggau siti gempuru besai maya iya beumur 11 taun lalu menyadi indu iya beumur 10 taun. Ba siti sesi Gempuru Besai Tiga Hari “Godly Devotion”, semua nembiak nyengkaum Shannon enggau menyadi indu iya, diasuh duduk ba penuduk ke disediaka ngagai bala anak mit aja. Keterubah iya, Shannon berasai kesal. Tang udah nya, iya tekenyit lebuh tiap iku nembiak diberi bup Questions Young People Ask—Answers That Work. Baka ni asai ati iya pasal Jehovah pengudah nerima hadiah ti berega tu? Ku iya: “Berengkah ari nya, aku nemu Jehovah nya nyata, lalu Iya endang amat rinduka aku. Naka meh pengaga ati kami laban Petara Jehovah enggau gerah jari meri kami hadiah ti amat manah tu!”

13, 14. Baka ni gaya kitai lebuh Jehovah disiplin kitai, lalu nama kebuah?

¹³ Bup Kudus ngingatka kitai: ‘Petara madahka penyalah orang ke dikerinduka Iya, baka apai indai ke madahka penyalah anak ke dikemegahka sida.’ (J-lam. 3:12) Lebuh kitai nerima disiplin ari Jehovah sereta ngelakka Iya ngelatih kitai, kitai belajar ngereja utai ke ngena, lalu bisi pemaik. Endang amat, “lebuh kitai kena disiplin, utai nya asai ti pedis, ukai nyamai.” (Heb. 12:11) Taja pia, baka ni gaya kitai lebuh Jehovah disiplin kitai? Kitai enda patut nulak jaku lalau ari Jehovah tauka majak pedis ati enti kitai enda rinduka utai ti didinga kitai. Kitai rinduka Jehovah, nya alai kitai ningaka Iya, lalu ngaga ubah ke patut.

¹⁴ Maya jeman Malaki, mayuh orang Judah enda mendingka Jehovah. Sida enda bedulika pemeri sida ke enda ngelantangka ati Iya. Nya alai Jehovah meri sida jaku lalau ti berat pasal utai tu. (Bacha Malaki 1:12, 13.) Iya ke amat, Jehovah udah suah meri sida jaku lalau, tang sida enggai mending. Nya alai, ku Iya madahka sida: “Aku deka nyumpah kita. Aku deka nyumpah utai ti diterima lalu dikena kita nyukung diri.” (Mal. 2:1, 2) Endang amat, enti kitai mengkang enggai mendingka jaku lalau ari Jehovah, tauka ngasaika jaku lalau nya enda beguna, kitai deka lenyau kaul enggau Iya.

15. Nama chara berunding ke patut diseliahka kitai?

¹⁵ Dunya Sitan meransang orang nyadi sumbung sereta berundingka diri. Mayuh orang enggai diajar tauka diasuh ngereja utai ti patut. Sekeda orang semina mendingka jaku ajar ketegal iya enda ulih diseliahka. Kitai enda patut baka nya. Bup Kudus ngasuh kitai “anang nitihka chara dunya.” Tang, kitai patut nemu nama dikedekaka Jehovah  ari kitai sereta ngereja utai ti ngerinduka ati Iya. (Rom. 12:2) Iya ngena gerempung Iya meri kitai jaku ajar ba maya ti patut. Chunto, kitai diajar pasal chara begulai enggau orang ke enda sama penempa, chara milih kawan, sereta chara kitai patut belelak tauka bemain. Enti kitai sanggup nerima disiplin ari Jehovah sereta ngaga ubah ti ngerinduka ati Iya, kitai ngayanka diri beterima kasih ke iring ari Iya sereta ngayanka diri amat rinduka Iya.—Jhn. 14:31; Rom. 6:17.

16, 17. (a) Nama kebuah kitai patut nemu runding Jehovah sebedau kitai ngaga pemutus? (b) Nama digaga orang Israel ari ke arapka Jehovah?

¹⁶ Anak mit ngarapka apai indai nulung sereta nyaga sida. Indah anak ke udah besai engka minta tulung ari apai indai. Sida nemu taja pan sida ulih ngaga pemutus ke diri empu, apai indai ulih meri sida jaku lalau ti manah. Apai kitai, Jehovah, ngemendarka kitai ngaga pemutus kediri empu. Tang, ketegal kitai arap bendar ke Iya sereta rinduka Iya, kitai semampai minta tulung ari Iya, sereta enggau naka ulih deka nemu runding Iya sebedau kitai ngaga pemutus. Enti kitai bepanggai ba Jehovah, Iya deka meri kitai roh kudus Iya kena nulung kitai ngereja utai ti ngena.—Plp. 2:13.

¹⁷ Maya jeman Samuel, orang Israel alah beperang ngelaban orang Pilistin. Ari ke nanya Jehovah nama patut digaga sida, ku sida: ‘Aram kitai ngambi Peti Lampang Batu Adat Jehovah ari Siloh, ngambika Jehovah bejalai enggau kitai, lalu ngelepaska kitai ari kuasa munsuh kitai.’ Nama nyadi ketegal pemutus nya? ‘Mayuh amat orang Israel mati. Tiga puluh ribu iku sida mati. Peti Lampang Batu Adat Petara lalu ditabanka munsuh.’ (1 Sam. 4:2-4, 10, 11) Orang Israel ngumbai enti mai Peti Lampang Batu nya enggau sida, Jehovah deka nulung sereta nyaga sida. Tang, sida enda minta tulung ari Jehovah tauka deka nemu runding Iya. Sida ngereja utai ti dikumbai sida ngena, tang ngujungka sida balat tusah.—Bacha Jaku Dalam 14:12.

18. Nama diajar Bup Kudus pasal manggaika diri ba Jehovah?

¹⁸ Seiku pemasmur ke balat rinduka Jehovah sereta bepanggai ba Iya nulis: ‘Aku deka manggaika pengandal aku ba Petara, lalu aku deka sekali agi muji Iya ke Penebus enggau Petara aku. Di menua ti udah alai aku dibuai, ati aku balat tusah. Nya alai aku nguingka runding aku ngagai Jehovah.’ (Mas. 42:5, 6) Kati nuan mega ngasaika utai ti sama pasal Jehovah? Kati nuan ngasaika diri semak enggau Iya sereta manggaika diri ba Iya? Nuan ulih belajar manggaika diri ba Iya enggau mayuh agi. Bup Kudus ngasuh kitai: ‘Panggaika diri ba Jehovah enggau pengabis ati nuan. Anang manggaika diri ba penemu diri empu. Awakka Jehovah seruran ngiring nuan, nya baru Iya deka nunjukka jalai ti ngena ngagai nuan.’—J-lam. 3:5, 6.

19. Baka ni nuan deka ngayanka diri rinduka Jehovah?

¹⁹ Enggau rinduka kitai dulu, Jehovah udah ngajar kitai chara rinduka Iya. Aram kitai seruran berundingka pemayuh utai ke udah digaga Iya ke kitai sereta pemesai pengerindu Iya ke kitai. Lalu arapka kitai ngayanka pengerindu kitai ngagai Iya enggau pengabis ati, semengat, runding enggau pengering.—Mrk. 12:30.