1. Nama utai ti diasuh rasul John perundingka kitai, lalu nama kebuah?

RASUL John meransang kitai berunding enggau dalam pasal pengerindu Jehovah ti besai ke kitai. Ba 1 John 3:1, kitai macha: “Peda kita pemesai pengerindu Apai ke kitai!” Lebuh kitai belematika pemesai pengerindu Jehovah ke kitai enggau chara Iya ngayanka pengerindu ke kitai, kitai deka semak agi sereta rindu agi ke Iya.

2. Nama kebuah sekeda orang tusah deka nemu Petara rinduka sida?

² Sayau amat, sekeda orang enda nemu baka ni Petara ulih rinduka sida. Sida ngumbai Petara enda ibuhka orang. Sida engka ngumbai Petara semina ngaga adat, lalu ngukum orang ke enda ngasika Iya. Ketegal ajar ti bula, sekeda orang ngumbai Petara nya jai, lalu sida ngumbai diri enda ulih rinduka Iya. Bisi mega ngumbai Petara rinduka semua orang enda ngira nama utai ti dikereja sida. Tang, belajarka Bup Kudus udah nulung nuan nemu pemendar pasal Jehovah. Nuan nemu pengerindu nya kualiti Iya ti pemadu nyulut, lalu Iya meri Anak Iya nyadika tebus nuan. (Jhn. 3:16; 1 Jhn. 4:8) Tang, ketegal utai ke kala  nyadi ba pengidup nuan engka ngasuh nuan tusah deka nemu pemesai pengerindu Jehovah ke nuan.

3. Nama ulih nulung kitai nemu pengerindu Jehovah ke kitai?

³ Kena nulung kitai nemu pengerindu Jehovah ke kitai, keterubah iya kitai patut nemu Jehovah nya Petara ke ngaga kitai. Iya meri kitai nyawa. (Bacha Masmur 100:3-5.) Nya kebuah Bup Kudus ngumbai mensia keterubah nya ‘anak Petara.’ (Luk. 3:38) Lalu, Jesus ngajar kitai ngangauka Jehovah “Apai kami ti di serega.” (Mat. 6:9) Nyadi, Jehovah nya Apai kitai, lalu Iya rinduka kitai baka seiku apai ti manah ke rinduka anak iya.

4. (a) Jehovah nya Apai ke baka ni? (b) Nama deka dikerandauka kitai ba artikel tu enggau artikel ke pengudah tu?

⁴ Sekeda orang tusah deka ngambarka apai ke bisi pengerindu. Sida engka bisi pengalaman ke enda manah maya agi mit laban apai sida jai enggau sida. Jehovah enda kala baka nya enggau anak Iya. Iya Apai ti pemadu manah. (Mas. 27:10) Iya balat rinduka kitai sereta ngibun kitai ngena mayuh macham chara. Suah agi kitai ngasaika diri dikerinduka Jehovah, rindu agi kitai ke Iya. (Jas. 4:8) Ba artikel tu, kitai deka berandauka empat chara Jehovah ngayanka pengerindu Iya ke kitai. Lalu ba artikel pengudah tu, kitai deka berandauka empat chara kitai ulih ngayanka pengerindu kitai ke Iya.

5. Nama diberi Petara ke semua orang?

⁵ Lebuh rasul Paul ba Atens, di menua Gerika, iya meda nengeri nya penuh laban engkeramba, lalu orang ke dia pechaya petara sida meri sida nyawa. Nya alai, iya madahka sida pasal ‘Petara ke ngaga dunya enggau semua utai ti dalam dunya.’ Iya mega madahka Petara “ke meri pengidup enggau seput, enggau semua utai bukai” lalu ketegal Iya “kitai idup, engkebut.” (SKR. 17:24, 25, 28) Jehovah meri kitai semua utai ke diguna kitai kena idup sereta kena ngelantangka diri ba pengidup. Pikirka pasal sekeda utai ke udah diberi Iya ke kitai ketegal Iya rinduka kitai.

6. Baka ni gaya endur diau ke diberi Jehovah ke kitai? (Peda gambar ba pun artikel.)

⁶ Chunto, Jehovah meri kitai endur diau ke manah. (Mas. 115:15, 16) Ari semua planet ke digaga Iya, bumi enda baka planet bukai. Bala saintis udah matau dunya luar sereta udah tetemuka mayuh planet, tang sida enda tetemuka planet bukai ke ulih endur mensia idup. Jehovah ukai semina meri kitai semua utai ke diguna kena idup, tang Iya mega ngaga bumi tu manah, nyamai, sereta endur ti likun alai kitai ngelantangka diri ba pengidup. (Isa. 45:18) Lebuh kitai mikirka pasal endur diau ke udah diberi Apai kitai iya nya Jehovah, kitai amat ngasaika pemesai pengerindu Iya ke kitai.—Bacha Jop 38:4, 7; Masmur 8:3-5.

7. Baka ni chara Jehovah ngaga kitai nunjukka Iya amat rinduka kitai?

⁷ Siti da agi chara Jehovah udah ngayanka pengerindu Iya ke kitai iya nya enggau ngaga kitai ngambika ulih neladan Iya. (P-kal. 1:27) Reti nya, kitai ulih ngasaika pengerindu Iya ke kitai, lalu kitai mega ngayanka pengerindu kitai ke Iya. Jehovah nemu, tu meh utai ke amat ulih ngasuh kitai lantang ati. Pia mega, bala anak lantang amat ati lebuh sida ngasaika apai indai rinduka sida. Lalu kingatka ajar Jesus, enti kitai semak ngagai Apai kitai, Jehovah, kitai deka lantang ati. (Mat. 5:3) Iya meri kitai “semua utai kena kitai ngelantangka diri.” Endang amat, Iya gerah jari sereta balat rinduka kitai.—1 Tim. 6:17; Mas. 145:16.

8. Nama kebuah kitai deka Jehovah ngajar kitai?

⁸ Bala apai rinduka anak sida, lalu enggai anak sida ditesatka tauka ditipu. Tang, mayuh apai indai kemaya hari tu enggai nerima standard ari Bup Kudus pasal utai ke betul enggau salah. Nya alai, sida enda ulih ngiring anak sida enggau manah, lalu tu suah ngujungka anak sida nadai pengelantang sereta enda nemu ni bagi utai ke betul enggau ke salah. (J-lam. 14:12) Taja pia, Jehovah meri bala anak Iya iring ti pemadu manah laban Iya ‘Petara ti tetap ati.’ (Mas. 31:5) Iya rindu ati ngajar kitai pemendar pasal Iya Empu. Iya mega ngajar kitai chara nyembah Iya, lalu nunjukka kitai chara pengidup ti pemadu manah. (Bacha Masmur 43:3.) Nyadi, nama utai ti udah diajar Jehovah ke nunjukka pemesai pengerindu Iya ngagai kitai?

9, 10. (a) Nama kebuah Jehovah madahka kitai pasal Iya Empu? (b) Nama utai ti diajar Iya pasal tuju Iya ke kitai?

⁹ Keterubah iya, Jehovah madahka kitai pasal Iya Empu. Iya deka kitai ngelala Iya. (Jas. 4:8) Nya alai, Iya madahka kitai nama Iya. Iya ke amat, Bup Kudus nyebut nama Iya suah agi ari nama ke bukai. Jehovah mega madahka kitai sapa Iya ke bendar. Lebuh kitai meda utai ke digaga Iya, kitai nemu Iya bisi kuasa sereta bepenemu-dalam. (Rom. 1:20) Lalu lebuh kitai macha Bup Kudus, kitai belajar pasal pengelurus Iya enggau pemesai pengerindu Iya ke kitai. Seraya kitai nemu pemanah kualiti Jehovah, kitai ngasaika diri semak agi ngagai Iya.

¹⁰ Jehovah mega ngajar kitai pasal tuju Iya. Iya madahka kitai tu begian ari ruang bilik Iya. Iya mega nerangka utai ti dikedekaka Iya ari kitai ngambika kitai ulih bekerejasama sereta begulai manah enggau semua  orang ba ruang bilik Iya. Bup Kudus enggau terang nunjukka Petara enda meri kitai kuasa nentuka diri empu utai ti manah enggau utai ti jai lebuh Iya ngaga kitai. (Jer. 10:23) Jehovah nemu utai ti pemadu manah ke kitai. Lalu semina enggau nerima kuasa merintah Iya sereta ngasika Iya kitai tau bulih pemaik enggau pengidup ti ngemuaska ati. Jehovah ngajar kitai pemendar ti beguna tu laban Iya rinduka kitai.

11. Nama udah dipadah Apai kitai ti bepengerindu pasal jemah ila?

¹¹ Apai ti bepengerindu berunding enggau dalam pasal pengidup anak iya ke dudi hari. Iya deka anak iya bulih pengidup ti ngemuaska ati. Sayau amat, mayuh orang kemaya hari tu irau pasal utai ke jemah ila, sereta masau pengidup sida bekereja ngulihka utai ti enda tetap. (Mas. 90:10) Kitai amat beterima kasih ngagai Apai kitai, Jehovah, ke ukai semina udah ngajar kitai chara pengidup ti ngemuaska ati diatu, tang mega udah besemaya deka meri kitai utai ti amat manah ke jemah ila!

12. Baka ni Jehovah nguji deka nulung Kain enggau Baruk?

¹² Lebuh Jehovah meda Kain deka ngereja utai ti balat jai, Iya nguji nulung Kain. Ku Iya nanya: “Nama kebuah nuan ringat, lalu mengut-mengut? Enti nuan udah ngereja utai ti ngena, nuan tentu deka tuchum.” (P-kal. 4:6, 7) Kain enggai nerima tulung ari Jehovah, lalu tu ngujungka iya bulih penusah. (P-kal. 4:11-13) Ba maya bukai, Jehovah meratika runding Baruk ti salah udah ngasuh iya lelak sereta lemi semengat. Nya alai, Jehovah madahka Baruk pasal runding iya ke salah, lalu iya patut ngubah runding iya. Baruk mendingka jaku lalau ari Jehovah, lalu tu nyelamatka nyawa iya.—Jer. 45:2-5.

13. Nama utai ti dipelajar nembiak Jehovah ke tetap ati ari penguji?

¹³ Jehovah ngiring sereta disiplin kitai laban Iya rinduka kitai. Iya ukai semina disiplin kitai ba maya ti patut aja, tang Iya mega ngelatih kitai. (Heb. 12:6) Ba Bup Kudus, kitai macha pasal nembiak ke tetap ati ke dilatih Jehovah nyadi orang ke manah agi. Ngambika chunto, Josep, Moses, enggau David napi penguji ti besai. Lebuh sida kena penguji, Jehovah bisi enggau sida. Lalu utai ti dipelajar sida lebuh kena penguji nulung sida maya Jehovah meri sida tanggungjawap ke besai agi. Seraya kitai macha ba Bup Kudus pasal chara Jehovah nyukung sereta ngelatih nembiak Iya, kitai ngasaika Jehovah amat rinduka kitai.—Bacha Jaku Dalam 3:11, 12.

14. Lebuh kitai bisi ngereja penyalah, baka ni Jehovah ngayanka pengerindu ngagai kitai?

¹⁴ Indah lebuh kitai bisi ngereja penyalah, Jehovah mengkang ngayanka pengerindu ngagai kitai. Enti kitai mendingka disiplin Iya sereta nesal ati, Iya deka ngampunka kitai enggau “jampat.” (Isa. 55:7) Nama reti nya? Jaku David pasal Jehovah ke ngampunka kitai nunjukka Iya Apai kitai ti penyinu: “Iya ngampun semua dosa aku lalu ngeraika semua penyakit aku. Iya ngelepaska aku ari kubur lalu merekatka aku ngena pengerindu enggau pengasih. Baka timur ti jauh ari barat, baka nya meh penyauh Iya muai dosa kitai.” (Mas. 103:3, 4, 12) Jehovah ngiring sereta disiplin kitai enggau chara ti bebida. Kati nuan ngaga ubah enggau jampat? Kingatka, Jehovah disiplin kitai laban Iya rinduka kitai.—Mas. 30:5.

15. Nama agi chara bukai ke nunjukka Jehovah rinduka kitai?

¹⁵ Apai ti bepengerindu nyaga pengelikun ruang bilik iya. Tu meh utai ti digaga Apai  kitai Jehovah ke kitai. Ku pemasmur nyebut pasal Jehovah: “Iya nyaga seput bala nembiak Iya. Iya ngelepaska sida ari kuasa orang ke jai.” (Mas. 97:10) Uji pikirka tu: Baka kitai ke jampat nyaga orang ke dikesayauka kitai ketegal sida berega ba kitai, Jehovah mega jampat nyaga nembiak Iya laban sida berega ba Iya.—Bacha Sekariah 2:8.

16, 17. Baka ni Jehovah udah nyaga nembiak Iya suba enggau ke diatu?

¹⁶ Siti chara Jehovah udah nyaga nembiak Iya, kenyau ari suba nyentuk ke diatu, iya nya ngena bala melikat Iya. (Mas. 91:11) Seiku melikat munuh 185,000 iku soldadu Asiria dalam semalam aja, lalu nyelamatka nembiak Petara. (2 Raj. 19:35) Ba kurun ti keterubah, bala melikat ngelepaska Peter, Paul enggau sida ke bukai ari rumah jil. (SKR. 5:18-20; 12:6-11) Baru-baru tu, bisi siti perang ti balat nyadi ba siti nengeri di menua Afrika. Nengeri nya balat charut ketegal laya, ngenchuri, masung sereta munuh orang. Taja pan nadai bala menyadi kitai ke mati, tang mayuh ari sida lenyau semua utai ti dikemisi sida. Taja pia, semua sida ngasaika pengerindu Jehovah, lalu nemu Iya nyaga sida. Sida mengkang gaga ati taja pan napi pemerinsa nya. Lebuh pengari ari indu opis ngabas sida lalu nanyaka rita sida, ku sida nyaut, “Semua nadai ngawa, terima kasih ngagai Jehovah!”

¹⁷ Endang amat, sekeda ari nembiak Jehovah, baka Stepen enggau sida ke bukai, udah mati ketegal sida tetap ati. Kekadang, Jehovah enda nagang utai tu ari nyadi. Tang, Iya amat nyaga nembiak Iya dalam raban. Iya ngingatka sida pasal mayuh macham chara ke dikena Sitan nipu sida. (Eps. 6:10-12) Kitai ulih nemu utai tu ari Bup Kudus enggau litaricha ke dikeluarka gerempung Jehovah. Chunto, kitai ulih nemu penusah ke datai ari Internet, angkunka duit, sereta ulah ti kamah enggau pengawa jai ke bisi ba cherita wayang, ba bup tauka ba game. Endang amat, Jehovah rinduka kitai sereta deka nyaga kitai.

18. Baka ni asai ati kitai pasal pengerindu Jehovah ke kitai?

¹⁸ Lebuh Moses mikirka sepemanjai iya ke nyembah Jehovah, iya arap bendar Jehovah rinduka iya. Ku Moses: “Isi kami genap pagi enggau pengerindu Nuan ti meruan belama iya, ngambika kami ulih belagu lalu gaga ati sepemanjai umur kami.” (Mas. 90:14) Kitai ngasaika diri diberekat laban ulih nemu sereta ngasaika pengerindu Jehovah ke kitai. Endang basa ti besai laban dikerinduka Jehovah! Kitai ngasaika utai ti dipadah rasul John, ke nyebut: “Peda kita pemesai pengerindu Apai ke kitai!”—1 Jhn. 3:1.