“Berita Manah pasal Perintah Petara Deka Ditusui”

‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’—MATTHEW 24:14.

Reti: Penulis Bup Kudus ke benama Luke madahka Jesus ‘bejalai nengah nengeri enggau genturung pendiau, nusui Berita Manah pasal Perintah Petara.’ (Luke 8:1) Jesus empu madah, ‘Aku enda tau enda mega nusui Berita Manah pasal Perintah Petara ngagai nengeri bukai, laban nya kebuah aku dikirumka.’ (Luke 4:43) Kelimpah ari nganjung bala murid iya nginjil ba nengeri enggau genturung pendiau, Jesus mega madah ngagai sida, ‘Kita deka nyadi saksi aku . . . ngagai ujung dunya.’—Surat Kereja Rasul 1:8; Luke 10:1.

Teladan Orang Kristian Abad Keterubah: Bala murid Jesus nitihka pesan iya enggau ransing. Bup Kudus madah, “Tiap hari, dalam Rumah Sembiang enggau dalam rumah sida empu, sida enda ngetu-ngetu ngajar sereta madahka Jesus nya Kristus.” (Surat Kereja Rasul 5:42) Semua bala murid iya ngereja pengawa tu, ukai semina raban ti spesial aja. Pakar sejarah ke benama Neander madahka, ‘Celsus, penulis keterubah ke ngelaban orang Kristian udah mechat sida laban sida orang biasa ke enda bepelajar sereta baruh pendiau tang sida deka nginjil pasal Jaku Petara.’ Jean Bernardi nulis dalam bup iya ke betajuk The Early Centuries of the Church, “[Orang Kristian] nginjil ngagai semua orang enda ngira dini endur sida. Enda ngira ba jalai, ba pasar, ba endur orang mayuh, tauka ba rumah. Sida ngereja nya enda ngira sekalika orang nerima tauka enda. . . . Sida nginjil ngagai ujung dunya.”

Sapa Nitihka Teladan Sida Kemayaharitu? David Watson, seiku paderi gerija Anglican madahka, “Siti ari kebuah pengarap orang majak lemi iya nya laban gerija enda ngemeratka pengawa nginjil sereta ngajar.” Ba bup Why Are the Catholics Leaving?, José Luis Pérez Guadalupe nulis tu pasal gerija bukai, gerija Evangelis, Adventis enggau kebukai “enda nginjil ari rumah ke rumah.” Iya madah tu pasal Saksi-Saksi Jehovah, “Sida nginjil enggau teratur ari rumah ke rumah.”

Nambahka agi, Jonathan Turley madah tu dalam Cato Supreme Court Review, 2001-2002, “Lebuh ninga nama Saksi-Saksi Jehovah, mayuh orang tepikirka orang ke nginjil ari rumah ke rumah. Ba Saksi-Saksi Jehovah, pengawa nginjil ari rumah ke rumah ukai semina ngerembaika pengarap sida, tang mega siti utai ti amat beguna ba sembah sida.”

[Kutak]

Ulih Nuan Meda Tanda Nya?

Pengudah berandauka syarat Bup Kudus ngagai orang Kristian ti bendar, ba runding nuan, sapa ke nitihka semua syarat tu? Kingatka meh, taja pan bisi beribu iti bansa pengarap Kristian, Jesus empu kala ngajar, ‘Ukai semua orang ke ngangauka aku “Tuan, Tuan” deka tama ngagai Perintah serega, tang semina orang ke ngereja peneka Apai aku ti di serega.” (Matthew 7:21) Nya alai, enti nuan nemu sapa ke ngereja peneka Apai lalu enggau sida, nuan mega deka ngembuan tanda orang Kristian ti bendar. Enggau nya, nuan tau bulih berekat ti meruan ba baruh Perintah Petara. Kami mai nuan bejaku enggau seiku ari Saksi-Saksi Jehovah kena nemu mayuh agi pasal Perintah Petara sereta berekat Iya.—Luke 4:43.