“Aku Udah Madahka Nama Nuan”

‘Aku udah madahka nama Nuan ngagai orang ke udah diberi Nuan ngagai aku ari dunya tu. . . . Aku udah madahka nama Nuan ngagai sida, lalu aku deka majak ngasuh sida nemu nama Nuan.’—JOHN 17:6, 26.

Reti: Jesus madah ngagai orang bukai pasal nama Petara maya iya nginjil. Lebuh Jesus macha ari ayat Bup Kudus, iya tentu udah nyebut nama Petara empu. (Luke 4:16-21) Iya ngajar bala murid iya besampi, “Apai: Kudus meh nama Nuan.”—Luke 11:2.

Teladan Orang Kristian Abad Keterubah: Rasul Peter madah ngagai bala tuai ba Jerusalem pasal Petara ke udah milih seraban bansa “nyadi nembiak iya.” (Surat Kereja Rasul 15:14) Lebuh nginjil, bala rasul enggau orang Kristian bukai ngajar, “Barang sapa ngangauka nama [Jehovah], deka diselamatka.” (Surat Kereja Rasul 2:21; Rome 10:13) Sida mega ngena nama Petara lebuh nulis Bup Kudus begian Sempekat Baru. The Tosefta, iya nya undang-undang orang Judah ke ditembuka kira-kira ba taun 300 Masihi, nyebut tu pasal utai ti ditulis orang Kristian ke ditunu bala munsuh. The Tosefta madah, “Bup Injil lalu bup minim [engka dituju ngagai orang Kristian bansa Judah] ditunu seretai enggau begian ti ngundan nama Petara.”

Sapa Nitihka Teladan Sida Kemayaharitu? Bup Kudus Revised Standard Version ke diresmika Majlis Kebangsaan Gereja-Gereja Kristus Amerika Syarikat madahka tu ba jaku pemuka iya, “Nama Petara empu enda dikena ba pengarap orang Judah sebedau jeman orang Kristian. Sida berasai Iya enda ibuh diasuh bebida ari petara bukai. Enti baka nya, nama Petara mega enda patut dikena ba semua Gerija Kristian.” Nya alai, nama Petara diganti enggau gelar baka “TUAN.” Baru-baru tu, Vatikan meri iring tu ngagai bala bishop sida: “Nama Petara dalam bansa tetragrammaton iya nya YHWH *, enda patut dikena tauka disebut dalam lagu tauka sampi.”

Kemayaharitu, sapa ke ngena sereta ngerembaika nama Petara? Lebuh Sergey agi nembiak sereta diau ba Kyrgyzstan, iya meda siti cherita ke nyebut nama Petara nya Jehovah. Pengudah kira 10 taun, iya enda ninga nama-nama utai pasal nama nya agi. Pengudah Sergey pindah ngagai Amerika Syarikat, dua iku Saksi-Saksi Jehovah datai ngagai rumah iya. Sida nunjukkan nama Petara dalam Bup Kudus. Iya amat gaga ati laban betemu enggau seraban orang ke ngena nama Jehovah. Peratika mega utai ti dipadah kamus Webster’s Third New International Dictionary ke meri penerang pasal leka jaku “Petara Jehovah.” Penerang nya madah, “Petara ti Pemadu Tinggi sereta seiku aja Petara ti disembah Saksi-Saksi Jehovah.”

[Nota Kaki]