Pengulu 21:1-25
-
Raban bansa Benjamin diselamatka (1-25)
21 Tu sumpah ke udah digaga orang Israel ba Mispah: “Nadai siku ari kitai deka meri anak indu kitai nyadika bini orang Benjamin.”
2 Nya alai, orang Israel ngagai Bethel lalu duduk ba depan Petara ti bendar sampai malam. Sida bendar amat nyabak.
3 Ku sida madah: “O Jehovah, Petara orang Israel, nama kebuah utai tu nyadi ba Israel? Nama kebuah seharitu siti ari raban bansa Israel patut dipunaska?”
4 Hari siti orang Israel dani tumu, lalu ngaga siti alta ba dia kena nyerahka pemeri tunu enggau pemeri bebaik.
5 Sebedau nya, orang Israel udah besumpah: Enti bisi orang ke enda datai ngagai Jehovah ba Mispah, orang nya mesti diukum bunuh. Nyadi, sida nanya: “Ari semua raban bansa Israel, sapa ke enda datai begelumu ba depan Jehovah?”
6 Orang Israel berasai amat tusah ati ke utai ke nyadi ngagai bala menyadi sida ari raban bansa Benjamin. Ku sida: “Seharitu, siti ari raban bansa Israel udah nadai agi.
7 Kitai udah besumpah ngagai Jehovah, madahka kitai enggai meri anak indu kitai nyadika bini sida. Nyadi, nama patut digaga kitai ngambika orang Benjamin ke agi idup bisi bini?”
8 Ku sida nanya: “Sapa ari raban bansa Israel ke enda datai ngagai Jehovah ba Mispah?” Maya nya, nadai orang ari Jabes-gilead datai ngagai kem alai orang Israel begelumu.
9 Pengudah sida ngira orang ke datai, sida sedar nadai siku pan orang ari Jabes-gilead datai.
10 Nya alai, sida ngasuh 12,000 iku orang ke paling kuat ngagai Jabes-gilead, lalu meri sida pesan tu: “Alai kita munuh orang ke diau ba Jabes-gilead ngena pedang, nyengkaum bala indu enggau anak mit.
11 Tu utai ke patut dikereja kita: Tiap iku lelaki enggau indu ke udah ngereja pengawa seks enggau lelaki mesti dipunaska magang.”
12 Ba Jabes-gilead, sida tetemuka 400 iku indu dara ke nadai kala ngereja pengawa seks enggau lelaki. Nyadi, sida mai semua indu nya ngagai kem ba Siloh, ke ba menua Kanaan.
13 Udah nya, orang Israel ngirumka pesan ngagai orang Benjamin ke ba bukit batu ba Rimon, laban deka mai sida bebaik.
14 Nya alai, orang Benjamin pan pulai. Orang Israel meri sida indu ari Jabes-gilead ke enda dibunuh orang Israel. Tang, penyampau bala indu nya enda chukup ke sida.
15 Orang Israel berasai amat tusah ati pasal utai ke nyadi ngagai orang Benjamin, laban Jehovah udah mechahka penyerakup entara raban bansa orang Israel.
16 Bala tuai orang Israel madah: “Semua indu orang Benjamin udah dibunuh magang. Nyadi, nama patut digaga kitai ngambika sida ke bukai nya mega bisi bini?”
17 Ku sida nyaut: “Orang Benjamin ke agi idup mesti diberi tanah pesaka, ngambika raban bansa sida enda dipunaska, tang tetap bisi ba Israel.
18 Taja pia, kitai enda tau meri sida anak indu kitai nyadika bini sida, laban orang Israel udah besumpah munyi tu: ‘Tulah meh orang ke meri anak indu sida nyadika bini orang Benjamin.’”
19 Udah nya, sida madah: “Ninting taun, bisi pengerami ke Jehovah ba Siloh ke ba entara Bethel enggau Lebonah. Siloh nya ba sepiak timur jalai raya ke nuju ngagai Shikem ari Bethel.”
20 Nya alai, sida madah ngagai orang Benjamin: “Alai kita ngipa ba kebun anggur.
21 Lebuh kita meda indu dara ari Siloh datai lalu betanda,* kita mesti pansut ari kebun anggur lalu ngambi siku indu nyadika bini. Udah nya, kita pulai ngagai menua Benjamin.
22 Enti apai tauka menyadi lelaki sida datai lalu madahka diri enda setuju enggau kitai, kami deka madahka sida: ‘Kasih meh ke kami enggau orang Benjamin, laban penyampau indu ke diulih kami maya beperang enda chukup nyadika bini sida. Nambahka nya, kita enda tau meri anak indu kita ngagai sida, enggaika kita ngelanggar sumpah.’”
23 Nyadi, orang Benjamin pan ngereja nya. Tiap iku sida ngambi siku indu ke benung betanda nya nyadika bini sida. Udah nya, sida pulai ngagai tanah pesaka sida. Sida nirika baru kuta sida lalu diau ba dia.
24 Orang Israel pan mupuk ari endur nya, lalu pulai ngagai tanah pesaka sida empu. Sida pulai ngagai raban bansa sida enggau ruang bilik sida.
25 Maya nya, Israel bedau bisi raja. Tiap iku orang ngereja utai nitihka peneka ati diri.*
