Pengajar 2:1-26
2 Udah nya, ku aku bejaku dalam ati aku: “Aku deka nguji ngelantangka diri lalu deka meda nama asil iya.” Tang nya pan nadai guna.
2 Aku madahka: “Ketawa nya utai ti beli!”
Aku mega madahka: “Nama guna ngelantangka diri?”
3 Aku mutuska deka meda nama asil iya ngirup mayuh wain. Ba maya ti sama, aku deka nyaga penemu-dalam aku. Aku indah nyerahka diri ngagai pemeli laban deka nemu nama utai ti pemadu manah ke dikereja mensia sekumbang sida idup enda lama ba dunya tu.
4 Aku mega ngereja pengawa ti besai. Aku begagaka rumah sereta nanam mayuh anggur ke diri empu.
5 Aku ngaga taman enggau kebun ke diri empu, lalu nanam mayuh macham pun buah ba dia.
6 Aku ngaga kolam ai ke aku empu, ke mai ai ngagai pun kayu* ti galak.
7 Aku ngambi ulun lelaki enggau ulun indu, lalu aku bisi bala ulun ke ada ba rumah aku. Aku mega bisi mayuh amat jelu tupi, iya nya sapi, bedus, enggau kambin. Jelu tupi aku mayuh agi ari jelu tupi semua orang ke kala diau ba Jerusalem.
8 Aku mega ngumpul pirak enggau emas ke aku empu ari bala raja enggau ari endur bukai. Aku mega ngumpul bala penyanyi lelaki enggau indu sereta utai ke ngelantangka ati mensia, iya nya bala indu.
9 Aku nyadi bekuasa agi ari semua orang ke udah kala diau ba Jerusalem, lalu penemu-dalam aku mega seruran ngiring aku.
10 Utai ti dikinginka aku sigi ulih aku magang. Aku enda nagang diri ari ngelantangka diri empu. Ati aku gaga ketegal semua utai ke udah diulih aku, lalu nya meh upah* ke semua utai ti dikereja aku enggau bebendar.
11 Tang, lebuh aku berundingka semua utai ti udah dikereja aku enggau pemendar aku gawa ngereja utai nya, aku nyau sedar semua utai nya endang nadai guna magang, baka ke begagaika angin. Nadai siti pan ba dunya tu ke amat-amat berega.
12 Udah nya, aku beratika penemu-dalam, penadak, enggau pemeli. (Nama utai ke ulih dikereja orang ke deka datai pengudah aku ke nyadi raja? Sida semina ulih ngereja utai ke udah dikereja aku.)
13 Aku beratika penemu-dalam manah agi ari pemeli, baka penampak ti manah agi ari pemetang.
14 Orang ke bepenemu-dalam ulih meda enggau terang, tang orang ke beli bejalai dalam pemetang. Aku mega nemu pengujung semua sida endang sebaka magang.
15 Udah nya, aku madah dalam ati aku: “Utai ti deka nyadi ngagai orang ke beli deka mega nyadi ba aku.” Nya alai, nama guna aku nyadi orang ke amat bepenemu-dalam? Nyadi aku madah dalam ati aku: “Semua nya mega nadai guna.”
16 Enda ngira orang ke bepenemu-dalam tauka orang ke beli, nadai orang deka ingatka sida. Jemah ila, semua orang nadai agi dikingatka magang. Lalu baka ni orang ke bepenemu-dalam deka mati? Sama baka orang ke beli.
17 Nya alai, aku berengkah begedika pengidup tu, laban semua utai ke digaga ba dunya tu semina ngenusahka aku aja. Semua utai nya endang nadai guna magang, baka ke begagaika angin.
18 Aku begedika semua kereja ke udah digaga aku enggau bebendar ba dunya tu, laban aku patut ninggalka semua utai nya ngagai orang ke deka datai pengudah aku mati.
19 Enda ngira orang nya bepenemu-dalam tauka beli, pengujung iya orang nya deka ngambi semua utai ti udah dikereja aku ba dunya tu ngena pengering aku enggau penemu-dalam aku. Semua nya mega nadai guna.
20 Nya alai, lebuh aku berundingka semua kereja ke udah digaga aku enggau bebendar ba dunya tu, aku berengkah asa ati.
21 Orang bebendar gawa sereta ngereja utai ngena penemu-dalam, pemintar, enggau pengelandik, tang udah nya, iya terpaksa nyerahka semua utai ke udah diulih iya enggau bebendar ngagai orang ke nadai kala bebendar ngulihka utai nya. Nya mega nadai guna sereta penusah ti besai.
22 Mensia bebendar gawa ba dunya tu sereta bebendar nyapai juluk ati iya, tang nama utai ke diulih iya?
23 Seagi-agi iya idup, semua utai ke dikereja iya mai pemedis enggau ati ti asa. Indah lebuh malam hari, ati iya irau. Semua nya mega nadai guna.
24 Utai ti pemadu manah ke ulih dikereja mensia nya makai, ngirup, sereta ngelantangka diri ngena utai ti udah diulih iya enggau bebendar. Aku mega nyau sedar, nya mega pemeri ari Petara ti bendar.
25 Agi mega, sapa ke ulih ngasaika pemakai enggau ngirup utai ke manah agi ari aku?
26 Petara meri penemu-dalam, penemu, enggau pengelantang ngagai orang ke ngelantangka ati Iya. Tang, orang ke bedosa diasuh Iya gawa sereta ngumpul asil, lalu nyerahka nya ngagai orang ke ngelantangka ati Petara ti bendar. Semua nya mega nadai guna, baka ke begagaika angin.
