Malaki 2:1-17
2 “O bala imam, tu pesan Aku ngagai kita.
2 Enti kita enggai mending sereta enggai bebendar ngemuliaka nama Aku, Aku deka ngasuh kita ditinggang sumpah. Semua berekat ke diterima kita deka diubah Aku nyadi sumpah. Aku indah udah ngubah tiap iti berekat nya nyadi sumpah, laban kita enda pedulika pesan Aku,” ku Jehovah, ketuai soldadu serega.
3 “Ketegal kita, Aku deka ngerusak benih ke udah ditanam kita. Aku deka ngelumur mua kita ngena tai jelu ke diserah kita nyadika korban maya pengerami kita. Udah nya, kita deka dibai ngagai tugung tai.*
4 Nya baru kita deka nemu, Aku udah meri pesan tu ngagai kita ngambika sempekat Aku enggau peturun Lewi enda dikinsil,” ku Jehovah, ketuai soldadu serega.
5 “Sempekat Aku enggau sida mai pengidup enggau pengelantang. Aku meri sida sempekat tu ngambika sida nangika* Aku. Suba, sida amat nangika Aku lalu ngeninggika nama Aku.
6 Sida ngajar adat* ti bendar lalu enda nyebut utai ti jai. Sida bisi kaul ti manah enggau Aku sereta ngereja utai ti lurus. Sida mega nulung mayuh orang nguing ari penyalah.
7 Laban imam bejaku ngarika Aku, Jehovah, ketuai soldadu serega, sida meh ke patut ngajar penemu ngagai bala nembiak Aku, lalu ngagai sida meh bala nembiak Aku patut begigaka adat* Aku.
8 “Tang, kita udah limpang ari jalai Aku. Kita nyau ngasuh mayuh orang tesangkut ketegal adat Aku.* Kita udah ngelanggar sempekat ke digaga Aku enggau peturun Lewi,” ku Jehovah, ketuai soldadu serega.
9 “Nya alai, Aku deka ngasuh semua orang begedi sereta ngemaruhka kita, ketegal kita enda nitihka jalai Aku sereta berat sepiak lebuh bejalaika adat Aku.”
10 “Ukai enda semua kitai bisi apai ti sama? Ukai enda semua kitai digaga Petara ti sama? Nyadi, nama kebuah kita enda setia ngagai pangan diri sereta ngelanggar sempekat aki ini kitai?
11 Judah enda setia ngagai Petara sereta ngereja utai ti dipegedika Iya ba Israel enggau ba Jerusalem. Sida udah ngeleseka Jehovah, Petara ke rinduka utai ti kudus,* lalu sida udah jadi enggau indu ke nyembah petara bukai.
12 Jehovah deka ngemunaska tiap iku orang ari langkau kain Jakop ke ngereja utai nya, taja pan sida nyerahka pemeri korban ngagai Jehovah, ketuai soldadu serega.”
13 “Bisi siti agi utai ke dikereja kita ke ngasuh alta Jehovah ampuh laban ai mata, sabak, enggau sebana. Ketegal nya, Iya enggai nerima pemeri kita sereta enggai rinduka nama-nama utai ke diberi kita.
14 Lalu kita nanya: ‘Nama kebuah?’ Laban Jehovah udah nyadi saksi entara kita enggau indu ke jadi enggau kita lebuh kita agi biak. Bini kita nya kaling pengidup kita, lalu kita enggau bini kita ditanggam dalam sempekat tikah,* tang kita enda setia ngagai bini kita.
15 Tang sekeda ari bala kita enda ngereja nya, laban sida agi nitihka iring kuasa kudus* Petara. Nama utai ti dikedekaka sida? Sida deka bisi peturun ke endang amat nembiak Petara. Nya alai, jaga meh runding kita. Anang enda setia ngagai bini ke enggau kita jadi lebuh kita agi biak.”
16 Ku Jehovah, Petara Israel: “Aku begedika pengawa sarak sereta orang ke begarika pengawa ti ganas.” Jehovah, ketuai soldadu serega, mega madahka: “Jaga runding kita, lalu anang enda setia.
17 “Kita udah ngasuh Jehovah leju mendingka jaku kita. Tang kita nanya: ‘Baka ni ku kami udah ngasuh Iya leju?’ Kita madahka: ‘Semua orang ke ngereja penyai dikumbai Jehovah manah, lalu Iya rinduka sida,’ tauka kita nanya: ‘Dini alai Petara ti adil nya?’”
