Joel 2:1-32
2 “Sepu meh terumpit* ba Sion!
Bantaika panjung perang ba gunung Petara ti kudus.
Awakka semua orang ba dunya getar-getar takut,Laban hari Jehovah deka datai! Hari nya udah semak!
2 Nya hari ke petang sereta suram,Hari ke mayuh remang* sereta ke balat petang.
Gaya hari nya baka penampak tumu pagi ke kena lindung gunung.
Bisi siti bansa ti besai sereta kering.
Nadai kala bisi bansa bukai ke baka nya.
Ari generasi ke generasi,*Nadai agi bansa bukai ke baka nya.
3 Api nganguska semua utai ba depan sida,Lalu api makai semua utai ke ba belakang sida.
Tanah ba depan sida baka taman Eden,Tang tanah ba belakang sida baka menua puang ti rangkai.
Nadai siti pan utai ke agi tinggal.
4 Gamal sida baka kuda,Lalu sida belanda baka kuda perang.
5 Lebuh sida merejuk ngagai tuchung gunung, bunyi sida baka bunyi guru kerita kuda ti mayuh,Sereta baka bunyi rumput rangkai ti meretih diempa api.
Sida bebaris baka raban soldadu ti kering ke sedia deka beperang.
6 Ketegal sida, orang deka getar-getar takut,Lalu mua semua orang deka puchat magang.
7 Sida nyerang baka pahlawan.
Sida betikika dinding baka soldadu.
Semua sida majak mansang ke depan,Lalu mimit pan sida nadai limpang ari jalai sida.
8 Sida nadai tetempuhka pangan diri.
Semua sida mengkang ba jalai sida.
Taja pan bisi ke rebah laban anak panah,Tang sida ke bukai nadai limpang ari jalai sida.
9 Sida beterudus tama ke dalam kuta lalu belanda ba sebelah dinding.
Sida betikika rumah lalu tama nengah jenila baka penchuri.
10 Ba depan sida, tanah berenyang lalu langit begetar.
Mata panas enggau bulan nyau petang,Lalu bintang nadai agi manchar.
11 Jehovah deka bejaku enggau nyawa ti inggar ba depan bala soldadu Iya ke enda alah diitung.
Iya amat kering lalu Iya ngamatka semua utai ke udah disebut Iya.
Hari Jehovah nya besai sereta balat ngenakutka!
Sapa ke ulih tan?”
12 Ku Jehovah: “Nya alai diatu, pulai meh ngagai Aku enggau pengabis ati.
Bepuasa meh, nyabak meh, sereta bekeduie meh.
13 Charikka ati kita, ukai gari kita,Lalu pulai meh baru ngagai Aku, Jehovah, Petara kita,Laban Aku pengasih sereta siru, lubah ringat sereta belimpah enggau pengerindu ti setia.
Aku deka ngubah runding Aku pasal penusah nya.
14 Arapka Aku deka nguing ari pengeringat Aku, ngubah runding Aku,Lalu meri kita berekat.
Enggau nya, kita ulih nyerahka pemeri bijirin enggau pemeri wain ngagai Aku, Jehovah, Petara kita.
15 Sepu meh terumpit ba Sion!
Tetapka siti hari alai bepuasa lalu atur siti gempuru ti kudus.
16 Gempuruka orang mayuh;* kuduska meh sida.
Gempuruka bala sida ke tuai, bala anak, enggau bala anak mit ke agi nusu.
Kangauka mega pengantin lelaki enggau pengantin indu pansut ari bilik tinduk sida.
17 Ba entara ruang depan enggau alta,Awakka bala imam ke gawa ke Jehovah nyabak lalu madah:
‘Kasih meh ke bala nembiak Nuan, O Jehovah.
Anang nejuka pesaka Nuan tu dikeleseka.
Anang nejuka bansa bukai nguasa sida.
Anang nejuka bansa bukai nanya: “Dini Petara kita?”’
18 Udah nya, Aku, Jehovah, deka ngelindung tanah ke enggi Aku,Lalu Aku deka kasihka bala nembiak Aku.
19 Aku, Jehovah, deka bejaku ngagai bala nembiak Aku:
‘Diatu Aku deka meri kita bijirin, wain ti baru, enggau minyak,Lalu kita deka makai sampai kita puas.
Aku enda nejuka kita dikeleseka bansa bukai agi.
20 Aku deka muru orang ari utara jauh ari kita.
Aku deka ngasuh sida ngachir ngagai menua ti rangkai sereta nadai orang nguan.
Soldadu ba baris depan raban nya deka diburu ke tasik tunga ke timur,*Lalu soldadu ba baris belakang deka diburu ke tasik tunga ke barat.*
Bangkai sida deka but,Lalu bau iya deka ngesuh ngagai serata menua nya.
Aku deka ngereja utai ti luar biasa.’
21 O menua, anang takut.
Rami gaga ati meh, laban Aku, Jehovah, deka ngereja utai ti luar biasa.
22 O jelu ti liar ba padang, anang meh takut,Laban rumput ba menua puang deka ijau baru,Lalu pun kayu deka bebuah.
Pun ara enggau pun anggur deka bebuah naka pemayuh.
23 O kita ke diau ba Sion, rami gaga ati meh laban Aku, Jehovah, Petara kita,Deka meri kita chukup ujan maya musin ruruh.
Aku deka meri ujan ti lebat ke kita.
Baka suba, Aku deka ngasuh ujan labuh maya musin ruruh enggau musin bungai.
24 Endur alai ngindik utai ke diketau deka penuh laban bijirin,Lalu wain ti baru enggau minyak deka melumpa ari endur alai nganchurka buah.
25 Aku deka nganti utai kita ke udah lenyau dalam timpuh beberapa taun nya,Lebuh utai tanam kita diempa raban buntak ke datai beraban-raban, anak buntak, buntak ke tegar makai, enggau buntak ke makai utai.*
Sida meh bala soldadu ti besai ke dianjung Aku ngagai kita.
26 Kita tentu deka makai sampai kenyang,Lalu kita deka muji nama Aku, iya nya Jehovah.
Aku udah ngereja utai ti luar biasa ke kita.
Bala nembiak Aku enda dikemaluka agi.
27 Kita deka nemu Aku bisi enggau Israel.
Aku meh Petara kita, Jehovah, lalu nadai Petara bukai!
Bala nembiak Aku enda dikemaluka agi.
28 Udah nya, Aku deka nuangka kuasa kudus* Aku ngagai semua macham orang.
Anak lelaki enggau anak indu kita deka benabi,Sida ke tuai deka bulih mimpi,Lalu sida ke biak deka meda utai ke dipandangka.
29 Maya nya, Aku mega deka nuangka kuasa kudus AkuNgagai bala nembiak Aku ke lelaki enggau ke indu.
30 Aku deka mandangka utai ti luar biasa ba langit sereta ba dunya:
Darah, api, enggau asap ti tebal.
31 Sebedau hari Jehovah ti besai sereta ngenakutka nya datai,Mata panas deka nyadi petang lalu bulan deka nyadi mirah baka darah.
32 Semua orang ke ngangauka nama Jehovah deka diselamatka.
Aku, Jehovah, udah madah bisi orang deka selamat ba Gunung Sion enggau Jerusalem,Iya nya orang ke udah dikangauka Aku, Jehovah.”
Nota Kaki
^ Tauka “tanduk.”
^ Tauka “awan.”
^ Tauka “Ari rebak ke rebak.”
^ Tauka “Gempuruka semua raban gempuru.” Peda Penerang Leka Jaku, “Raban gempuru.”
^ Iya nya, Tasik Mati.
^ Iya nya, Tasik Tengah; Tasik Mediterranean.
^ Teks Hebrew ngena leka jaku ti enda sama kena merujuk ngagai empat macham bansa buntak.
^ Peda Penerang Leka Jaku.
