Esekiel 21:1-32
21 Ku Jehovah bejaku enggau aku baru:
2 “Anak mensia, malik meh ngagai Jerusalem, lalu benabi meh pasal ukum ke deka ninggang endur ti kudus enggau menua Israel.
3 Padahka ngagai menua Israel: ‘Tu meh utai ke dipadahka Jehovah: “Aku deka ngelaban nuan. Aku deka mansutka pedang Aku ari sarung iya, lalu ngena pedang nya munuh orang ke lurus enggau orang jai ke bisi ba nuan.
4 Ketegal Aku deka munuh orang ke lurus enggau orang jai ke bisi ba nuan, pedang Aku deka dipansutka Aku ari sarung iya, lalu Aku deka ngena nya munuh semua orang ari selatan ngagai utara.
5 Semua orang tentu deka nemu Aku, Jehovah, udah nyintak pedang Aku, lalu Aku enda agi nyimpan iya dalam sarung iya.”’
6 “Anak mensia, bedemuh meh sambil nuan getar-getar takut. Bedemuh meh enggau ati ti tusah ba depan sida.
7 Tang, enti sida nanya nuan: ‘Nama kebuah nuan bedemuh?’ nuan patut nyaut sida: ‘Laban berita ke diterima aku.’ Berita nya tentu deka datai, lalu ati tiap iku orang deka berasai takut. Jari semua sida deka nyadi lemi. Semua orang deka tusah ati, lalu ai deka neritik ari patung sida.* ‘Peda! Utai ke dipadahka ba berita nya tentu deka nyadi. Iya tentu deka dikeamatka,’ ku Jehovah, Tuan ti Pemadu Tinggi.”
8 Ku Jehovah bejaku ngagai aku baru:
9 “Anak mensia, benabi meh lalu padahka tu: ‘Tu meh utai ke dipadahka Jehovah: “Sebut tu: ‘Pedang! Pedang udah diansah sampai bekilat.
10 Pedang nya diansah kena munuh naka pemayuh orang. Pedang nya diansah ngambika beperenching baka selar kilat.’”’”
“Endaka kitai patut gaga ati?”
“‘Kati pedang nya* deka nulak tungkat pemerintah anak Aku Empu, baka ke udah digaga iya ngagai tiap iti pun kayu ke bukai?
11 “‘Pedang nya diberi ngambika diansah sampai bekilat lalu ulih dikena munuh orang. Pedang nya diansah sampai bekilat lalu diserahka ngagai orang ke diasuh ngukum.
12 “‘Anak mensia, besebana meh lalu rerauh meh nyabak, laban pedang nya udah datai nyerang bala nembiak Aku sereta semua tuai Israel. Sida meh ke deka nyadi mansa pedang sama enggau bala nembiak Aku. Nya alai, palu pah nuan enggau ati ti tusah.
13 Bala nembiak Aku udah diperesa. Nama penyadi enti pedang nya nulak tungkat pemerintah? Tungkat nya deka nadai agi,’ ku Jehovah, Tuan ti Pemadu Tinggi.
14 “Anak mensia, benabi meh. Tempikka jari nuan lalu sebut ‘Pedang!’ tiga kali. Nya meh pedang ke munuh mansa sereta ke munuh mayuh amat orang. Pedang nya deka ngelingi sida.
15 Ati sida deka berasai takut, lalu mayuh ari sida deka rebah ba pintu kuta sida. Aku deka ngena pedang munuh mayuh orang. Au, pedang nya beperenching baka selar kilat lalu diansah kena munuh orang!
16 Pantap ke kanan! Pantap ke kiba! Titihka penunga pedang nuan!
17 Aku mega deka nempikka jari lalu ngemuaska pengeringat Aku. Aku, Jehovah, udah bejaku.”
18 Ku Jehovah bejaku ngagai aku baru:
19 “Anak mensia, gaga tanda ba jalai ke deka ditengah pedang raja Babilon. Jalai nya deka berengkah ari siti menua, tang udah nya becabang nyadi dua lalu nuju ngagai dua iti kuta. Engkahka papan tanda ba endur jalai nya berengkah becabang.
20 Nuan patut nandaka jalai ke patut ditengah pedang kena nyerang Rabah, iya nya kuta orang Amon. Tandaka mega jalai ke siti da agi ke patut ditengah pedang kena nyerang Jerusalem, iya nya kuta ti bekubu ba Judah.
21 Nya ketegal raja Babilon deka ngetu ba pun jalai ke becabang nya, laban iya deka meramal ba dia. Iya deka ngusak anak panah iya, betanya ngagai bala patung ke disembah iya,* lalu begigaka tanda ari atau jelu.
22 Ramalan ba jari kanan iya nunjukka iya patut mansang ngagai Jerusalem, patut nyediaka kayu ti berat kena nganchurka kuta nya, meri jaku gerah ngambika beperang, nyerauh kena meri tanda beperang, masang kayu ti berat kena mechahka pintu kuta, ngaga tugung tanah, sereta ngaga benteng kena ngepung kuta nya.
23 Tang, orang* ke besumpah ngagai sida* deka ngumbai ramalan nya salah. Tang raja nya deka ingatka penyalah sida, lalu iya deka nangkap sida.
24 “Nya alai, tu meh utai ke dipadahka Jehovah, Tuan ti Pemadu Tinggi: ‘Kita udah ngasuh penyalah kita dikingatka, laban ari semua pengawa kita, orang ulih meda penyalah enggau dosa kita. Ketegal orang ingatka kita, kita deka ditaban ngena chara pejal.’
25 “O tuai orang Israel ke jai sereta ke balat bakal, hari nuan udah datai. Maya nuan nerima ukum nuan ti penudi udah datai.
26 Tu meh utai ke dipadahka Jehovah, Tuan ti Pemadu Tinggi: ‘Buka serban enggau makota nuan. Utai deka berubah. Orang ke baruh pendiau deka ditinggika. Orang ke tinggi penuduk deka dikemaruhka.
27 Tembawai! Tembawai! Aku deka ngaga makota nyadi tembawai. Makota nya enda diempu orang bukai, nyentukka orang ke bisi hak ti sah datai. Udah nya, Aku deka nyerahka makota ngagai orang nya.’
28 “O anak mensia, benabi meh lalu padahka tu: ‘Tu meh utai ke dipadahka Jehovah, Tuan ti Pemadu Tinggi, pasal orang Amon enggau jaku kelese sida.’ Padahka tu: ‘Pedang! Pedang disintak kena munuh orang! Pedang nya diansah kena mantap orang sereta ngambika beperenching baka selar kilat.
29 Utai ke dipadah nabi pasal nuan nya bula, lalu ramalan pasal nuan nya mega pelesu. Bangkai nuan tetap deka ditugungka begulai enggau orang ke udah dibunuh. Hari orang ke jai udah datai. Maya sida nerima ukum ti penudi udah datai.
30 Simpan pedang nya dalam sarung iya. Aku deka ngakim nuan ba menua asal nuan, iya nya ba endur alai nuan digaga.
31 Aku deka nuangka pengeringat Aku ba nuan. Aku deka nyemburka api pengeransi Aku ngagai nuan, lalu Aku deka nyerahka nuan ngagai orang ti kejam ke landik ngemunaska orang.
32 Nuan deka nyadi utai ke diempa api. Darah nuan deka naya ba menua nya, lalu nuan enda dikingatka agi laban Aku, Jehovah, udah bejaku.’”
